1 ሳሜላ 8

1 ሳመል ጭሜዳ ዎደ፥ ባረ ናና እስራኤልያ ቦላ ዳና ኦደ ሱንዳ። 2 አ ባይራ ናኣ ሱንይ ዩኤላ፤ ቴፋ ናኣ ሱንይ አቢያ፤ ሄ ናናይ በርሳቤሀን ዳናቲኖ። 3 አ ናናይ አ ኦግያን ሀመትበይክኖ። ኡንቱንቱ በሰና ጎኣ ደማናዉ ዎራ ስሜድኖ፤ ማታይያ አኪደ፥ ጽሎ ፕርዳ ምርቄድኖ። 4 ሄዋ ድራዉ፥ እስራኤልያ ጭማቱ ኡባይ እትፐ ሺቂደ፥ ሳመላኮ ራማ ካታማ ዪደ፥ 5 “ሄኮ ኔን ጭማዳ፤ ነ ናናይ ነ ኦግያ ሀመትክኖ፤ ሀራ ካዉተ ኡባዳን ኑና አይሳናዉ ካትያ ሀእ ኑዉ ሱን” ያጌድኖ። 6 ኡንቱንቱ፥ “ኑና አይሳናዉ ካትያ ኑዉ እማ” ጌዳ የዉ ሳመላ ናሸችቤና። ሄዋ ድራዉ፥ ሳመል መና ጎዳ ዎሴዳ። 7 መና ጎዳይ ሳመላ፥ “አሳይ ኔና ግያ ቃላ ኡባ ስሳ፤ አያዉ ጎፐ፥ ታን ኡንቱንቱ ቦላ ካተተናዳን፥ ኡንቱንቱ ታና እጼድኖፐ አትና፥ ኔና እጽበይክኖ። 8 ኡንቱንቱ ታን ግብጼፐ ከሴዳ ጋላሳፐ ዶሚደ፥ ሀቼ ጋካናዉ ታና አጊደ፥ ሀራ ጾሳቶ ጎይኒደ ደኤድኖ፤ ስም ሀእ ኡንቱንቱ ታ ቦላ ኦዳዋ ኡባ ነ ቦላካ ኦኖ። 9 ሀእካ ኡንቱንቱ ቃላ ስሳ፤ ሽን ኡንቱንታ ምንሳደ ሴራ፤ ኡንቱንቱ ቦላን ካተታና ካትያ ዎጋ ኡንቱንታ ኤርሳ” ያጌዳ። 10 ካትያ ኦቼዳ አሳዉ መና ጎዳይ ኦዴዳ ቃላ ኡባ ሳመል ኦዴዳ። 11 እ ኡንቱንቶ ሀዋዳን ያጌዳ፤ “ህንተንቱ ቦላ ካተታና ካቲ ህንተንታ ኦናባይ ሀዋ: ህንተንቱ አቱማ ናና አኪደ፥ ጋርያ አሳቱዋነ ፓራ አሳቱዋ ከሳና፤ ኡንቱንቱ አ ጋርያ ስንን ዎጻና። 12 ኡንቱንቱፐ ሄዋ ሻላቃቱዋነ እሻታሙዋ ካፓቱዋ፥ ሀራቱዋ አ ጋድያ ጎሽያዋንታነ አ ካ ጫክያዋንታ፥ ቃይ ሀራቱዋ አ ኦላ ሚሻነ አ ፓራ ጋረቱዋ ሚሻ ኦያዋንታ ከሳና። 13 ህንተንቱ ማጫ ናናካ አፊደ፥ ባረዉ ሽቱዋ ጊግስያዋንታ፥ ካያዋንታነ ኡክያዋንታ ከሳና። 14 ህንተንቱ ጎሻፐ፥ ዎይንያ ቱራ ሳፐነ ዎጋራ ሳፐ ኡባፐ ሎእያዋ አኪደ፥ ባረ ኦሳንቻቶ እማና። 15 ካፐነ ዎይንያፐ ታሙዋፐ እት ኩሽያ እ አኪደ፥ ባረ ሱንቶነ ባረ ኦሳንቻቶ እማና። 16 ህንተንቱ አቱማ ቆማቱዋፐነ ማጫ ቆማቱዋፐ፥ ቃይ ህንተንቱ ሚዛፐነ ሀርያፐ ሎእያዋንታ አኪደ፥ ባረ ኦሱዋ ኦስሳናዋንታ። 17 ህንተንቱ ዶርሳፐነ ዴሻፐ ታሙዋፐ እት ኩሽያ እ አካና፤ ህንተንቱካ አ ቆማቱዋ ግዳና። 18 ሄ ጋላስ ህንተንቱ ህንተንቶ ዶሬዳ ካትያፐ ዋሳና፤ ሽን ሄ ጋላስ መና ጎዳይ ህንተንቱ ዋሱዋ ስሰና” ያጌዳ። 19 አሳይ ሳሜላ ቃላ ስሰናን እጺደ፥ “ቱይት! ቱይት! ኑዉ ካቲ ደኦ። 20 ያቶፐ፥ ኑንካ ሀራ ካዉተቱ ኡባ ማላ ግዳና። ኑ ካቲ ኑና አይሳና፤ ኑ ስን አደ፥ እ ኑ ድራዉ ኦለታናዋ” ያጌድኖ። 21 ሳመል አሳ ቃላ ኡባ ስሲደ መና ጎዳዉ ኦዴዳ። 22 መና ጎዳይ ሳመላ፥ “ኡንቱንቱ ቃላ ስሳ፤ ኡንቱንቱ ቦላ ካትያ ካዉ” ያጌዳ። ሳመል እስራኤልያ አሳ፥ “አሳይ ኡባይ ባረ ካታማ ካታማ ስሞ” ያጌዳ።