2 ኦዱዋ 12

1 ሮብኣማ ካዉተይ ምን ኤቄዳ ዎደ፥ እነ እስራኤልያ አሳይ ኡባይ መና ጎዳ ህግያ አግ ባሼድኖ። 2 ኡንቱንቱ መና ጎዳዉ አማነተናን እጼዳ ድራዉ፥ ሮብኣመ ካተቴዳ እቼሻን ላይን ግብጼ ካቲ ሺሻቅ የሩሳላመ ካታማ ቦላ ዎራጄዳ። 3 አናና እትፐ ግብጼፐ ዬዳዌ እት ሻአነ ላኡ ጼቱ ፓራ ጋረቱዋ፥ ኡሱፑን ታሙ ሻአ ፓራ አሳቱዋና ፓይዱ ባይና ሊብያ ኦላንቻቱዋ፥ ሱካ ኦላንቻቱዋነ ቶጵያ ኦላንቻቱዋ። 4 ካቲ ሺሻቅ ግምበቴዳ ይሁዳ ካታማቱዋ ኦሞዲደ፥ የሩሳላመ ካታማ ዬዳ። 5 ሄዋፐ ጉይያን፥ ትምቢትያ ኦድያ ሻማኤ ሮብኣማኮነ ሺሻቃፐ ባቃቲደ፥ የሩሳላመን ሺቅ ኡቴዳ ይሁዳ ካለያዋንቱኮ ዪደ፥ “መና ጎዳይ ሀዋዳን ያጌ፤ ‘ህንተ ታና አጌዳ ድራዉ፥ ታንካ ህንተንታ ሺሻቃ ኩሽያን አጋድ’ ያጌ” ያጌዳ። 6 እስራኤልያ ካለያዋንቱነ ካቲ ሮብኣመ ባረንታ ካዉሺደ፥ “መና ጎዳይ ጽሉዋ” ያጌድኖ። 7 ኡንቱንቱ ባረንታ ካዉሼዳዋ መና ጎዳይ በኤዳ ዎደ፥ ሻማእያ መና ጎዳይ ሀዋዳን ያጌዳ፤ “ኡንቱንቱ ባረንታ ካዉሼዳ ድራዉ፥ ታን ኡንቱንታ ዉርሳ ይስከ፤ ታን ኡንቱንታ አሻና። ታ ሀንቁ ሺሻቃ ባጋና የሩሳላመ ቦላ ትገተና። 8 ግዶፐነ፥ ኡንቱንቱ ታዉ ሞደትያዋንነ ሀራ ቢታቱዋ ካተቶ ሞደትያዋን ደእያ ዱማተ ኤራና ማላ፥ ኡንቱንቱ ሺሻቃዉ ሞደታና” ያጌዳ። 9 ሄዋ ድራዉ፥ ግብጼ ካቲ ሺሻቅ የሩሳላመ ካታማ ኦለቲደ፥ መና ጎዳ ጌሻ ጎልያንነ ካትያ ጎለን ደእያ ሚሻ ኡባ አኬዳ። ቃይ ሶሎሞነ ዎርቃፐ ኦስሴዳ ጎንዳለቱዋካ አኪደ አፌዳ። 10 እ አፌዳ ዎርቃ ጎንዳለቱዋ ድራዉ፥ ካቲ ሮብኣመ ናሃስያ ብራታፐ ሀራ ጎንዳለቱዋ ኦስሴዳ፤ ካትያ ጎልያ ፐንግያ ናግያዋንቱ ካፑዋ ኩሽያን ዎዳ። 11 ካቲ መና ጎዳ ጌሻ ጎልያ ገልያ ዎደ ኡባን፥ ፐንግያ ናግያዋንቱ ዪደ፥ ሄ ጎንዳለቱዋ ኦይቄድኖ። ሄዋፐ ስሚደ፥ ኡንቱንቱ ዛሪደ፥ ናግያዋንቱ ጎለን ዎኖ። 12 ሮብኣመ ባረና ካዉሼዳ ድራዉ፥ እ ዉር የናዳን መና ጎዳ ሀንቁ አፐ ክቼዳ። ኡባ ይሁዳ ቢታዉ ሙልያዉ ሳአይ እንጀቴዳ። 13 ካቲ ሮብኣመ ባረና ምንሲደ፥ የሩሳላመን ካተቴዳ። ሮብኣመ ካተቴዳ ዎደ አ ላይይ ኦይታማነ እታ፤ መና ጎዳይ ባረ ሱን ያን ዎናዉ እስራኤልያ ቢታ ኡባፐ ዶሬዳ የሩሳላመ ካታማን ታማነ ላፑን ላይ ካተቴዳ። ሮብኣማ አታ አሞንያ ናእሞ። 14 ሮብኣመ መና ጎዳዉ ዎዛናፐ ጎይናናዉ ኮይቤና ድራዉ፥ ኢታባ ኦዳ። 15 ሮብኣመ ኮይሮፐ ዉርሰ ጋካናዉ ሀኔዳባይነ አ የለታ ማራይ ትምቢትያ ኦድያ ሻማእያ ታርክያ ማጻፋንነ እዱ በኤዳ ሳፃ ማጻፋን ጻፈት ኡቴዳ። ሮብኣምነ እዮርባም ኡባ ዎደ ኦለቲደ ደኤድኖ። 16 ሮብኣመ ሀይቂደ፥ ባረ ማይዛን ጋከቴዳ፤ እ ዳዊታ ካታማን ሞገቴዳ። አ ኮታን አ ናአይ አቢይ ካተቴዳ።