2 ኦዱዋ 20

1 ሄዋፐ ጉይያን፥ ሞኣባቱነ አሞናቱ ቃይ ኡንቱንቱና እትፐ ማኡናቱ ዮሳፌጻ ቦላ ማዬድኖ። 2 ያትና፥ አማሬዳ አሳቱ ዪደ ዮሳፌጻዉ፥ “ማጽነ አባፐ ሄፍንና ደእያ ሶርያፐ ዳሮ ኦላንቻቱ ኔና ኦላናዉ ዬድኖ። በአ፥ ኡንቱንቱ ሀጻጾን-ታማራን ደኢኖ” ያጊደ ኦዴድኖ። (ሀጻጾን-ታማር ኤንጋዳዉ ሀራ ሱን።) 3 ያትና፥ ዮሳፌጸ ያዪደ፥ መና ጎዳ ኦቻናዉ ባረ ቆፋ ቃቼዳ፤ ይሁዳ ጋድያን ኡባን ጾማ አዋዬዳ። 4 ይሁዳ አሳይ ኡባይ መና ጎዳፐ ማዱዋ ኮያናዉ እትፐ ሺቄዳ፤ ኡንቱንቱ መና ጎዳፐ ማዱዋ ኮያናዉ ይሁዳ ካታማቱዋ ኡባፐ ዬድኖ። 5 ዮሳፌጸ ይሁዳነ የሩሳላመ ሽቁዋ ግዶን፥ መና ጎዳ ጌሻ ጎልያን ደእያ ኦራ ዳባባ ስንን ኤቄዳ። 6 ሀዋዳን ያጌዳ፥ “አቤት መና ጎዳዉ፥ ኑ አዎቱዋ ጾሳዉ፥ ሳሉዋን ደእያ ጾሳይ ኔና! ሳኣን ደእያ ካዉተቱዋ ኡባ ሞድያዌ ኔና! ግታተይነ ዎልቃይ ነ ኩሽያን ደእያ ድራዉ፥ ኔናና ኤቀታናዉ ዳንዳዬዳባይ ባዋ። 7 አቤት ኑ ጾሳዉ፥ ካሰ ሀ ቢታን ደእያዋንታ ነ አሳ እስራኤልያ ስንፐ የደርሳደ፥ ነ ሲቁዋ አብራሃማ ዘረቶ መናዉ እሜዳዌ ኔና! 8 ኡንቱንቱ ሀ ጋድያን ደኤድኖ፤ ኡንቱንቱ ሀዋን ነ ሱንዉ ጌሻ ጎልያ ኬጺደ፥ 9 ‘ኑ ቦላ ኢታባይ፥ ዎይ ኦላይ፥ ዎይ ኢታ ሀርጊ፥ ዎይ ኮሻይ ይንቶ፥ ኑን ነ ሱንይ ደእያ ሀ ጌሻ ጎልያ ስንንነ ነ ስንን ኤቂደ፥ ኑ መቱዋን ኔኮ ዋሳና። ኔን ኑ ዋሱዋ ስሳደ፥ ኑና አሻና’ ያጌድኖ። 10 “ሀእካ አሞናቱ፥ ሞኣባቱነ ኤዶማቱ ኑ ቦላ ማዬድኖ። በን ኑ አዎቱ ግብጼፐ ከሴዳ ዎደ፥ ኔን ኡንቱንቱ ሄ ቢታቱዋ ገለናዳን ድጋዳ፤ ሄዋ ድራዉ፥ ኑ አዎቱ ሄ ቢታቱነ ዩዪደ አድኖፐ አትና፥ ኡንቱንታ ይስበይክኖ። 11 ኑን ኦዳባዉ ኡንቱንቱ ኑዉ ዛሬዳባ በአ። ኔን ኑዉ እሜዳ ላታ ጋድያፐ ኡንቱንቱ ኑና የደርሳናዉ ዬድኖ። 12 አቤት ኑ ጾሳዉ፥ ኔን ኡንቱንቱ ቦላ ፕርድኪ? አያዉ ጎፐ፥ ኑና ኦላናዉ ዬዳ ሀ ዳሮ ኦላንቻቱዋና ኦለታናዉ ኑዉ ዎልቃይ ባዋ። ኑን ኦናባካ ኤሮኮ፤ ሽን ኑ አይፈቱ ኔና ጼልኖ” ያጌዳ። 13 ይሁዳ አሳይ ኡባይ ባረንቱ ቄር ናናቱዋና፥ ባረንቱ ማጫ አሳቱዋናነ ባረንቱ ናናቱዋና እትፐ ግዲደ፥ መና ጎዳ ስንን ኤቄድኖ። 14 ሄዋፐ ጉይያን፥ ዛካራሳ ናአይ ያሃዝኤል ሽቁዋ ግዶን ኤቂደእሽን፥ መና ጎዳ አያናይ አ ቦላ ዎዳ። ዛካራስ ባናያ ናኣ፤ ባናይ ይእኤላ ናኣ፤ ይእኤል ማታንያ ናኣ፤ ማታኔ ሌዊያ ዛረነ አሳፋ ያራ። 15 ጾሳ አያናይ ያሃዝኤላ ቦላ ዎና፥ ሀዋዳን ያጌዳ፤ “ካትያዉ ዮሳፌጻ፥ ይሁዳንነ የሩሳላመን ደእያ አሳዉ፥ ኡባይካ ስስተ! መና ጎዳይ ህንተንታ ሀዋዳን ያጌ፤ ‘ሀ ዳሮ ኦላንቻቱ ጋሱዋን ያዮፕተነ ዳጋሞፕተ። አያዉ ጎፐ፥ ኦላይ ጾሳዋፐ አትና፥ ህንተንቱዋ ግደና። 16 ህንተንቱ ዎንት ኡንቱንታ ቦላ ከስተ። ጺጻ ግያ ፑደን ይሩኤላ መላ ቢታን ደእያ ዛንጋራ ዉርሰን ህንተንቱ ኡንቱንታ ደማና። 17 ሀ ኦላ ኦለትያዋንቱ ህንተንታ ግድክታ። ህንተንቱ ሳኣ ሳኣ ኦይቂ ኤቂደ፥ መና ጎዳይ ህንተንታ አሽያዋ በኢታ’ ያጌ። ይሁዳ አሳዉ፥ የሩሳላመ አሳዉ፥ ያዮፕተነ ዳጋሞፕተ! ኡንቱንቱና ኦለታናዉ ዎንት ከስተ። መና ጎዳይ ህንተናና ግዳናዋ” ያጌዳ። 18 ዮሳፌጸ ዴሙዋ ሳኣ ጋደ ጎይኔዳ፤ ሄዋዳንካ፥ ይሁዳ አሳይ ኡባይነ የሩሳላመን ደእያ አሳይ ኡባይ መና ጎዳ ስንን ኩንዲደ፥ እስራኤልያ ጾሳዉ ጎይኔድኖ። 19 ቃሃታ ያራፐነ ቆራሀ ያራፐ አማሬዳ ሌዋቱ ኤቂደ፥ ባረንቱ ቃላ ቁ ኦደ፥ መና ጎዳ እስራኤልያ ጾሳ ጋላቴድኖ። 20 ኡንቱንቱ ጉራ ጉራን ደንዲደ፥ ታቆአ መላ ቢታ ባናዉ ከሴድኖ፤ ኡንቱንቱ ከሴዳ ዎደ ዮሳፌጸ ደንድ ኤቂደ፥ “ይሁዳንነ የሩሳላመን ደእያ አሳዉ፥ ታን ግያዋ ስስተ። መና ጎዳን፥ ህንተንቱ ጾሳን፥ አማነትተ፤ ህንተንቱ ምናና። ቃይ ትምቢትያ ኦድያዋንቱንካ አማነትተ፤ የዉዋ ኡባይ ህንተንቶ እንጀታናዋ” ያጌዳ። 21 ዮሳፌጸ አሳና ዞረቴዳዋፐ ጉይያን፥ ማዝሙርያ የጽያዋንታነ መና ጎዳ ጋላትያዋንታ ሱንዳ። ኡንቱንቱ ባኣላ ጋላሳ ማዩዋ ማዪደ፥ ኦላንቻቱ ስንና አደ፥ “መና ጎዳ ጋላትተ! አገና አ ሲቁ መናዋ” ያግ ያጊደ የጻናዳን አዛዜዳ። 22 ኡንቱንቱ ማዝሙርያ የጽያዋነ ጋላትያዋ ዶሜዳ ዎደ፥ ይሁዳ ኦላናዉ ዬዳ አሞናቱዋ ቦላ፥ ሞኣባቱዋ ቦላነ ኤዶማቱዋ ቦላ መና ጎዳይ ሻቢርሳ የዴዳ። 23 አሞናቱነ ሞኣባቱ ኤዶማቱዋ ቦላ ደንዲደ፥ ኡንቱንታ ኡባና ይሴድኖ። ኡንቱንቱ ኤዶማቱዋ ይሴዳዋፐ ጉይያን፥ ባረንቱ ግዶን እቱ እቱዋ ይሴድኖ። 24 ይሁዳ አሳይ መላ ቢታን ደእያ ዎችያ ሳኣ ዬዳ ዎደ፥ ባረንቱ ሞርከቱ ደእያ ሳኣ ጼሌድኖ፤ ኡንቱንቱ አሃይ ቢታን ግሴዳዋ በኤድኖ። ኡንቱንቱፐ እት አሳይነ ከስ አኪደ ብቤና። 25 ሄዋፐ ጉይያን፥ ዮሳፌጽነ አ አሳይ ኦሞዱዋ አካናዉ ቢደ፥ ዳሮ መሄቱዋ፥ ሽንቃቱዋ፥ ኦላ ሚሻቱዋ፥ ማዮቱዋነ ሀራ አልኦ ሚሻቱዋ ደሜድኖ። ሽን ኦሞዱዋ ኡባባ ቶክ አፋናዉ ዳንዳይበይክኖ። ኦሞደዳባይ ሎይ ዳሮ ግዴዳ ድራዉ፥ ሄዋ ሺሻናዉ ሄዙ ጋላሳ አኬዳ። 26 ሄዋፐ ጉይያን፥ ኡንቱንቱ ኦይደን ጋላስ በራካ ዎምባ ግያ ሳን ሺቄድኖ፤ ሄ ሳኣን መና ጎዳ ጋላቴድኖ። ሄዋ ድራዉ፥ ኡንቱንቱ ሄ ሳኣ ጋላታ ዎምባ ያጊደ ሱንድኖ። 27 ሄዋፐ ጉይያን፥ ይሁዳ አሳይ ኡባይነ የሩሳላመ አሳይ ኡባይ፥ ዮሳፌጸ ካለና፥ መና ጎዳይ ሞርከቱዋ ቦላ ጾኑዋ እም ናሸችና የሩሳላመ ስሜዳ። 28 ኡንቱንቱ የሩሳላመ ጋኪደ፥ ዲና፥ ማስንቁዋናነ ጹሩምባና መና ጎዳ ጌሻ ጎልያ ገሌድኖ። 29 እስራኤልያ ሞርከቱዋ መና ጎዳይ አላጋ ቢታን ደእያ ካዉተቱ ኡባይ ስሴዳ ዎደ፥ ኡንቱንቱ ጾሳዉ ያዬድኖ። 30 ያቲደ ጾሳይ ዮሳፌጻዉ ኡባ ባጋና ሸምፑዋ እሜዳ ድራዉ፥ አ ካዉተይ ሳሮተ ደሜዳ። 31 ዮሳፌጸ ይሁዳን ካተትያ ዎደ፥ አ ላይይ ሀታማነ እቼሻ፤ እ የሩሳላመን ላታማነ እቼሹ ላይ ካተቴዳ። አ አታ ሺልሀ ናቶ አዙቦ ጌተታዉ። 32 ዮሳፌጸ ባረ አዉዋ አሳ ኦግያን ሀመቴዳ፤ እ ሄ ኦግያፐ ሸርእ ግቤና፤ መና ጎዳ ስንን እ ሱረባ ኦዳ። 33 ግዶፐነ፥ ጎይንያ ቃ ሳኣ ይስቤና፤ አሳይ ብሮ ባረ ኩመን ዎዛናፐ ባረ ማይዛ አዎቱዋ ጾሳኮ ስምቤና። 34 ዮሳፌጸ ሀኔዳ ሀራባይ፥ ኮይሮፐ ዉርሰ ጋካናዉ እስራኤልያ ካተቱ ታርክያ ማጻፋን፥ ሀናና ናኣ ዬሁ ታርክያ ግዶን ጻፈት ኡቴዳ። 35 እት ዎደ፥ ይሁዳ ካቲ ዮሳፌጸ ኢታባ ኦዳ እስራኤልያ ካትያ አካዝያሳና እትፐተ ኦዳ። 36 ያቲደ ዮሳፌጸ አናና ዛልእያ ዎልቃማ ማርካባቱዋ መናዉ ማየቴዳ። ሄ ማርካባቱዋ ኤጽዮን-ጋብራ ካታማን መሴድኖ። 37 ሄዋፐ ጉይያን፥ ማሬሻፐ ዬዳ ዶዳዋ ናአይ ኤልኤዛር፥ “ኔን አካዝያሳና እትፐተ ኦዳ ድራዉ፥ ኔን ኦዳ ኪታ መና ጎዳይ ይሳና” ያጊደ፥ ዮሳፌጻ ቦላ ትምቢትያ ኦዴዳ። ሄዋ ድራዉ፥ ማርካባቱ መኤድኖ፤ ኡንቱንቱ ሀቃነ ባናዉ ዳንዳይበይክኖ።