2 ኦዱዋ 7

1 ሶሎሞነ ዎሳ በዳ ዎደ፥ ሳሉዋፐ ታማይ ዎደ፥ ጹግያ ያርሹዋነ ሀራ ያርሹዋ ሜዳ። ያትና፥ መና ጎዳ ቦንቹ ጌሻ ጎልያ ኩሜዳ። 2 መና ጎዳ ቦንቹ ጌሻ ጎልያ ኩሜዳ ድራዉ፥ ቄሳቱ መና ጎዳ ጌሻ ጎልያ ገላናዉ ዳንዳይበይክኖ። 3 እስራኤልያ አሳይ ኡባይ ታማይ ሳሉዋፐ ዎሺናነ መና ጎዳ ቦንቹ ጌሻ ጎልያ ኩምሽና በኤዳ ዎደ፥ ባረንቱ ዴሙዋ ቢታ ጋ ጉፋኒደ ጎይኔድኖ፤ “መና ጎዳይ ሎአ! አገና አ ሲቁ መናዋ” ያጊደ ጾሳ ጋላቴድኖ። 4 ሄዋፐ ጉይያን፥ ካቲነ አሳይ ኡባይ መና ጎዳ ስንን ያርሹዋ ያርሼድኖ። 5 ካቲ ሶሎሞነ ላታማነ ላኡ ሻአ ኮሩማቱዋነ ጼታነ ላታሙ ሻአ ዶርሳቱዋ ያርሼዳ። ሄዋዳን ኦደ፥ ካቲነ አሳይ ኡባይ መና ጎዳ ጌሻ ጎልያ አንጅሴድኖ። 6 ቄሳቱ ባረንቶ ጊጌዳ ሳኣን ኤቂና፥ ሌዋቱ ቃይ ካቲ ዳዊተ መና ጎዳ ሳባናዉ ካሰ ኦዳ፥ ማዝሙርያ የጽያ ሚሻ ኦይቂደ፥ ኡንቱንቱ ስንን ኤቂደ፥ “አገና አ ሲቁ መናዋ” ያጊደ የጺደ፥ መና ጎዳ ጋላቴድኖ። ቄሳቱ ሌዋቱ ስንን ኤቂደ፥ ጹሩምባቱዋ ፑኔድኖ፤ ፑንሽን እስራኤልያ አሳይ ኡባይ ኤቄዳ። 7 ሶሎሞነ መና ጎዳ ጌሻ ጎልያ ስንን ደእያ ግዶ ዳባባ ዱማዬዳ። ሄ ሳኣን ጹግያ ያርሹዋነ እትፐተ ያርሹዋፐ ሞዋ ያርሼዳ። እ ሄዋ ኦዳዌ ጾሳ ስንን ደእያ፥ ናሃስያ ጌተትያ ብራታፐ ኦሰቴዳ ያርሽያ ሳአይ ጹግያ ያርሹዋ፥ ካ ያርሹዋነ እትፐተ ያርሹዋፐ ሞዋ ያርሻናዉ ጉጼዳ ድራሳ። 8 ሄ ዎደ ሶሎሞንነ እስራኤልያ አሳይ ኡባይ ዳስያ ባላ ላፑን ጋላሳዉ ቦንቼድኖ፤ እስራኤልያ ዛዋን ሀማታ ፕኑዋፐ ቢደ፥ ግብጼ ሻፋ ጋካናዉ ደእያ ጮራ አሳይ ሄ ሳኣ ሺቄዳ። 9 አሳይ ያርሽያ ሳኣ አንጅስያ ባላ ላፑን ጋላሳ፥ ቃይ ዳስያ ባላ ሀራ ላፑን ጋላሳ ቦንቼዳ። ሆስፑን ጋላሳን ጌሻ ያአዉ አሳይ ሺቄዳ። 10 ሄዋፐ ጉይያን፥ ሶሎሞነ ላፑን አግናን፥ ላታማነ ሄዘን ጋላስ አሳ ሞይዜዳ፤ መና ጎዳይ ዳዊታዉ፥ ሶሎሞነዉነ ባረ አሳ እስራኤልያዉ ኦዳ ኬካተን አሳይ ናሸቲደነ ዎዛናፐ ፓሽኪደ፥ ባረ ሶ ባረ ሶ ቤዳ። 11 ሶሎሞነ መና ጎዳ ጌሻ ጎልያነ ካትያ ጎልያ ኬጺደ ዉርሴዳ፤ ሶሎሞነ መና ጎዳ ጌሻ ጎልያንነ ባረ ካትያ ጎለን ኦናዉ ባረ ዎዛናን ቆፔዳዋ ኡባ ፖሌዳ። 12 መና ጎዳይ ሶሎሞናዉ ቃማ ቤቲደ፥ ሀዋዳን ያጌዳ፤ “ታን ነ ዎሳ ስሳድ፤ ታን ሀ ሳኣ ታዉ ያርሹ ያርሸትያ ጌሻ ጎልያ ግዳናዳን ዶራድ። 13 ታን እራይ ቡከናዳን ሳሉዋ ጎርድና፥ ዎይ ሳኣ ካ ማናዳን ቦልያ አዛዝና፥ ዎይ ታ አሳ ግዶን ኢታ ሀርግያ የድና፥ 14 ታ ሱንን ጼሰቴዳ ታ አሳቱ ባረንቱ አሳተ ካዉሺደ ዎሶፐ፥ ኡንቱንቱ ታና ኮዮፐነ ባረንቱ ኢታ ኦግያፐ ስሞፐ፥ ታን ሳሉዋን ኡንቱንቱ ዎሳ ስሳና። ኡንቱንቱ ናጋራ አቶ ጋና፤ ኡንቱንቱ ቢታካ ፓና። 15 ሀእካ ሀ ሳኣን ዎሰትያ ዎሳ ታ አይፊ ጼላና፤ ታ ሀይይካ ስሳና። 16 ሀእካ ሀ ጌሻ ጎሊ መናዉ ታ ሱንይ አን ደአና ማላ ኦደ ታን ዶራድ፤ ዶራደካ ጌሻድ። ታ አይፊነ ታ ዎዛናይ ኡባ ዎደ ሀ ጌሻ ጎልያን ደአና። 17 “ኔና ግዶፐ፥ ኔን ነ አዉ ዳዊተ ሀመቴዳዋዳን ታ ስንን ሀመቶፐ፥ ታን አዛዜዳዋ ኡባ ኦፐነ ታ ዎጋነ ታ ህግያ ናጎፐ፥ 18 ታን ነ አዉዋ ዳዊታና፥ ‘እስራኤልያ ሞድያ አሳ ኔን ኡባካ ያካ’ ያጋደ ጫቀቴዳዋዳን፥ ነ ካዉተ አራታ ምንሳ ኤሳና። 19 “ሽን ህንተንቱ እስራኤልያ አሳቱ ዎራ ስሞፐ፥ ታን ህንተንታ አዛዜዳ ታ አዛዙዋነ ታ ዎጋ አግ ባሾፐነ ሀራ ጾሳቶ ኦናዉነ ጎይናናዉ ቦፐ፥ 20 ያቶፐ፥ ታን ካሰ ህንተንቶ እሜዳ ጋድያፐ ህንተንታ ቆላና፤ ታን ታ ሱንዉ ጌሼዳ ሀ ጌሻ ጎልያካ አጋና። ታን ሀ ጌሻ ጎልያ አሳ ኡባ ግዶን ቶስያባነ ቅሊጭያባ ኦና። 21 ሀእ ሎይ ቦንቼቴዳ ሀ ጌሻ ጎልያ ማታና መንያ አሳይ ኡባይ ዳጋሚደ፥ ‘መና ጎዳይ ሀ ጋድያነ ሀ ጌሻ ጎልያ አያዉ ሀዋዳን ኦዴ?’ ያጋና። 22 አሳይ፥ ኡንቱንታ ማይዛ አዎቱዋ ግብጼፐ ከሴዳ መና ጎዳ ባረንቱ ጾሳ ኡንቱንቱ አጊደ፥ ሀራ ጾሳቱዋ ካሌዳ ድራዉነ ኡንቱንቶ ኦደ ጎይኔዳ ድራዉ፥ ጾሳይ ኡንቱንቱ ቦላ ሀ ኢታባ ኡባ አሄዳ ያጊደ ዛራና” ያጌዳ።