2 ሳሜላ 22

1 መና ጎዳይ አ ሞርከቱዋ ኡባ ኩሽያፐነ ሳኦላ ኩሽያፐ አሼዳ ጋላስ ዳዊተ መና ጎዳዉ ሀ የ የጼዳ። 2 “መና ጎዳይ ታዉ ዎጋ ዛላ፤ ታን ኦላፐ ናገትያ ሚጻ፤ እ ታና አሽያዋ። 3 ታ ጾሳይ ታን አኮ ባቃትያ ታ ዎጋ ዛላ። እ ታ ጎንዳልያ፤ እ ታና አሽያ ዎልቃማ። እ ታን ቆሰታ አትያ ሳኣ፤ እ ታና ማካላንቻ አሳቱዋፐ አሼ። 4 ጋላታይ በስያ መና ጎዳ ታን ጼሳይ፤ እ ታ ሞርከቱዋፐ ታና አሼ። 5 “ሀይቁዋ ቤታይ ታ ሄራን ስርመቴ፤ ባሻይ ድኡዋዳን ታና ሙኬዳ። 6 ዱፉዋ ዎዶሩ ታና ቃቻና ሀኔ፤ ሀይቁ ጲርያዳን ታና ኦይቄዳ። 7 ታና መቱ ኢስና መና ጎዳ ጼሳድ፤ ‘ታና ማዳ’ ጋደ ታ ጾሳዉ ዋሳድ። እ ባረ ጌሻ ጎልያን ታ ኮሻ ስሴዳ፤ ታን ዋሴዳ ዋሱ አ ሀይን ዎዳ። 8 “ጾሳይ ሀንቀቴዳ ድራዉ፥ ቢታይ ዪቂዪቂደ ቃጼዳ፤ ደረቱዋ ጻጱ ጋጅ ጋጅ ኮኮሬዳ። 9 አ ሲያፐ ሀንቁዋ ጩዋይ ጩዋቴዳ፤ አ ዶናፐ ምያ ታማ ላጩነ ጹግያ ቦንቁ ከሴዳ። 10 ሳሉዋ እ ጳልቂደ፥ ዱገ ዎዳ። ሄ ዎደ አ ገድያፐ ጋርሳና መዳ ሻሪ ደኤ። 11 ቀፍያና ደእያ ኪታንቻቱዋን፥ ክሩበቱዋን ኡቲደ ፓሌዳ፤ ጫርኩዋ ቀፍያ ቦላን ቤቴዳ። 12 ባረና ማን ካሜዳ፤ አ ዱንካኒ እራና መዳ ሻርያ። 13 አ ስንን ደእያ ዎልቃማ ፖኡዋፐ ታማ ላጩ ከሴዳ። 14 “ቃይ መና ጎዳይ ጉጉንዳን ሳሉዋፐ ጉሜዳ። ኡባፐ ቂያ ጾሳይ ባረ ኮሻ ስሴዳ። 15 ባረ ዎንዳፍያ አዳ የዲደ፥ ባረ ሞርከቱዋ ላሌዳ። ዋልቃን ፖኡዋ ኪቲደ፥ ኡንቱንታ የደርሴዳ። 16 መና ጎዳይ ሴሬዳ ዎደነ፥ ሀንቀቲደ ፔኑቄዳ ዎደ፥ አባ ሃይ ግሴዳ ቢታይ በቴዳ። ቃይ ሳኣ ባሱካ ቆንጬዳ። 17 “ጾሳይ ቦላፐ ኩሽያ ዱገ የዲደ፥ ታና ኦይቄዳ፤ ጪማ ሃፐ ታና ከሴዳ። 18 እ ታና ታ ዎልቃማ ሞርክያፐነ ታና እጽያዋንቱፐ አሼዳ፤ አያዉ ጎፐ፥ ኡንቱንቱ ታዉ ሎይ ዳሮ ዎልቃማ። 19 ታ ዋይያ ጋላስ፥ ኡንቱንቱ ታ ቦላ ደንዴድኖ፤ ሽን መና ጎዳይ ታና ዘምፕስያዋ። 20 እ ታና አኮ ሳኣ ከሴዳ፤ ታናን ናሸቴዳ ድራዉ፥ ታና አሼዳ። 21 “ታ ጽሎተዳን መና ጎዳይ ታዉ ጭጌዳ፤ ታ ኩሽያ ጌሻተዳን እ ታዉ ዛሬዳ። 22 ታን መና ጎዳ ኦግያ ካላድ፤ ታን ታ ጾሳ አጋደ ዎራ ባበይከ። 23 ታን አ ህግያ ኡባ ናጋድ፤ አ ዎጋ ፖልያዋ አጋበይከ። 24 ታን አ ስንን ሱረ ደኣድ፤ ታን ታና ናጋራፐ ናጋድ። 25 ሄዋ ድራዉ፥ መና ጎዳይ ታዉ ታ ጽሎተዳንነ ታ ጌሻተዳን ዛሬዳ። 26 “አቤት ጾሳዉ፥ አማነትያዋንቶ ኔን አማነትያዋ፤ ሱረቶ ኔንካ ሱረ። 27 ጌሻቶ ኔንካ ጌሻ፤ ሽን ጌላቶ ኔን ጭንጫ። 28 ባረንታ ዝቂስያዋንታ አሻሳ፤ ሽን ባረንታ ቂስያዋንታ ዝቂሳናዉ ኔን ኡንቱንታ ጼላሳ። 29 አቤት መና ጎዳዉ፥ ታ ጾምፒ ኔና፤ መና ጎዳይ ፖእስና፥ ታ ማይ ክቼ። 30 ነ ማዱዋን ታን ታ ሞርከ ኦላንቻቱ ቦላ ዎራጃይ፤ ታ ጾሳን ታን ኡንቱንታ ሚጻ ጼራና ጉፓ አይ። 31 ጾሳ ኦጊ ሱረ። መና ጎዳ ቃላይ አማነትያዋ። አኮ ባቃትያ ኡባቶ እ ጎንዳለ። 32 መና ጎዳፐ አትና፥ ሀራ ጾስ ባዋ፤ ኑ ጾሳፐ አትና፥ ሀራ ዎጋ ዛል ባዋ። 33 ታዉ ዎልቃ እምያዌነ ታ ኦግያ ሳሮ ኦያዌ ጾሳቴ። 34 እ ታ ገድያ ገንእያ ገድያዳን ምንሴ። ታና ቃ ግሹዋን ሳሮተን ዎ። 35 እ ታ ኩሽያ ኦላ ሜዘዬ፤ ሄዋ ድራዉ፥ ታን ታ ቀስያን፥ ናሃስያ ግያ ብራታ ዎንዳፍያን ዳፋደ ዱካይ። 36 “ታና አሽያ ነ ጎንዳልያ ኔን ታዉ እማዳ፤ ነ ሎኦ ኦካይ ታና ግታዬ። 37 ታን ሀመትያ ሳኣ አሳሳ፤ ሄዋ ድራዉ፥ ታ ገዲ ሀልጽቤና። 38 ታ ሞርከቱዋ ታን የደርሳደ መንሬድ፤ ታን ኡንቱንታ ይሰናን ደኣደ ጉየ ስማበይከ። 39 ታን ኡንቱንታ ላኤን ደንደናዳን ሾጫድ፤ ኡንቱንቱ ታ ገድያን ኩንዴድኖ። 40 ኦላዉ ታና ዎልቃ ዳንጭሳዳ፤ ታናና ጋዳትያዋንታ ታዉ ጉልባትሳዳ። 41 ታ ሞርከቱዋ ታ ስንፐ ጉየ ባቃትሳዳ፤ ታና እጽያዋንታ ታን ይሳድ። 42 ባረንታ ማድያዋ ኮዬድኖ፤ ሽን ኦንነ ኡንቱንታ አሽቤና። መና ጎዳካ ኡንቱንቱ ጼሴድኖ፤ ሽን እ ኡንቱንቶ ኮይቤና። 43 ታን ኡንቱንታ ባናዳን ሊቅሳድ፤ ኦግያን ደእያ ኡርቃዳንካ ኡንቱንታ ድርጸሬደ የድ። 44 “ታ አሳ ማካላፐ ታና አሻዳ። ካዉተቱዋ ቦላ ሱንደ፥ ታና ናጋዳ፤ ታን ኤረና አሳይ ታዉ ሞደቴዳ። 45 አላጋ ጋደ አሳይካ ታ ስንን ጉልባቴ። ኡንቱንቱ ታ ዋርያ ስሲደ፥ ታዉ አዛዘቲኖ። 46 ኡንቱንቱ ዎዛና ካሃ ባዪኖ። ባረንቱ ናገትያ ሚጻፐ ኮኮሪደ ዪኖ። 47 “መና ጎዳይ ደኤ! ጾሳይ፥ ታ ዎጋ ዛላይ ጋላተቶ። ጾሳይ፥ ታና አሽያ ዛላይ፥ ቁ ቁ ጎ። 48 እ ታ ሀሉዋ ከስያ ጾሳ፤ ካዉተቱዋ ታፐ ጋርሳና ዎያዋ። 49 ታ ሞርከቱዋፐ ታና ከስ አክያዋ። አቤት ጾሳዉ፥ ኔን ታናና ጋዳትያዋንቱ ቦላን ታና ቁ ቁ ኦሳ። ማካላንቻ አሳቱዋፐ ኔን ታና አሻሳ። 50 ሄዋ ድራዉ፥ ታን መና ጎዳ ካዉተቱዋ ግዶን ጋላታና፤ ታን ነ ሱንካ ሳባና። 51 “ጾሳይ ባረ ካትያዉ ጾኑዋ ቦላን ጾኑዋ እሜ። ባረ ኦኬዳዎ፥ ዳዊተዉነ አ ዘረዉ፥ አገና ሲቁዋ መናዉ በሰ” ያጊደ የጼዳ።