2 ሳሜላ 7

1 ካቲ ዳዊተ ባረ ካትያ ጎለን ኡቴዳዋፐ ጉይያንነ መና ጎዳይ አ፥ አ ሞርከቱዋ ኡባፐ ሸምፕሴዳዋፐ ጉይያን፥ 2 ትምቢትያ ኦድያ ናታና፥ “ታን ዝጋፐ ኬጸቴዳ ጎለን ደአይ፤ ሽን ጾሳ ታቦታይ ዱንካንያን ደኤ” ያጌዳ። 3 ናታን ዳዊታ፥ “ኦናዉ ነ ዎዛናይ ቆፔዳዋ ኡባ ኪተታ፤ መና ጎዳይ ኔናና ደኤ” ያጌዳ። 4 ሽን ሄ ጋላሳ ቃማ መና ጎዳ ቃላይ ናታናኮ ዪደ፥ 5 “ባ፤ ታ ቆማ ዳዊታ ሀዋዳን ያጋ፤ መና ጎዳይ ሀዋዳን ያጌ፤ ‘ታን ደአና ጎልያ ኬጻናዌ ታና ጋደ ቆፓይ? 6 አያዉ ጎፐ፥ ታን እስራኤላቱዋ ግብጼ ጋድያፐ ከሴዳ ጋላሳፐ ዶማደ ሀቼ ጋካናዉ ጎለን ደአበይከ፤ ታን ዱንካንያን ያነ ሃነ ዩያደ ደኣድ። 7 ታን እስራኤልያ አሳ ኡባና ዩዬዳ ሳኣ ኡባን፥ ታ አሳ እስራኤልያ ሄማና ማላ፥ ታን ሱንዳዋንቱፐ እቱዋነ ታዉ ዝጋ ጎልያ አያዉ ኬጻበይኪ? ጋደ ኦቻበይከ’ " ያጌ ያጋ። 8 “ሄዋ ድራዉ፥ ሀእካ ታ ቆማ ዳዊታዉ ኦዳ፤ ‘ኡባፐ ዎልቃማ መና ጎዳይ ኔና ሀዋዳን ያጌ፤ “ታን ኔና ሄን ጋደፐ፥ ዶርሳ ሄምያ ሳፐ ደንደ፥ ታ አሳ እስራኤልያ ካለናዳን አካድ። 9 ኔን ቤዳ ሳኣ ኡባን ታን ኔናና ግዳድ፤ ነ ሞርከቱዋ ኡባ ታን ነ ስንፐ ድጋድ። ሀእ ስም ታን ሀ ሳኣን ኤረቴዳ ዎልቃማ አሳቱዋ ሱንዳን ነ ሱን ግታያና። 10 ቃይ ታን ታ አሳዉ እስራኤልያዉ ሳኣ እማደ፥ ኡንቱንታ ሄ ሳኣን ቶካና። ሄዋ ድራዉ፥ ኡንቱንቱ ባረንቱ ሳኣን ደአና፤ ላኤን ኡንቱንቱ ሻባረትክኖ። በን ዎድያንነ ታ አሳ እስራኤልያ ቦላ ዳናትያዋንታ ታን ሱንዳ ዎድያዳን፥ ኢታቱ ኡንቱንታ ዛረደ ናቂክኖ። ቃይ ታን ኔና ነ ሞርከቱዋ ኡባፐ ሸምፕሳና። " ’ “ሄዋ ቦላንካ መና ጎዳይ ባረ ሁጲያዉ ነ ዛራቱ ደአናዳን ነዉ ጎልያ ኬጻናዋ ኦዴ። 12 ነ ላይይ ዉርና ሀይቃደ፥ ነ ማይዛ አዎቱዋን ጋከትያ ዎደ፥ ነ ጉልባታፐ የለቴዳ ናኣ ታን ደንና፤ አ ካዉተ ምንሳና። 13 ታ ሱንዉ ጎልያ ኬጻናዌ አ፤ ታን አ ካዉተ አራታ መናዉ ምንሳ ኤሳና። 14 ታን አዉ አዉዋ ግዳና፤ እካ ታዉ ናኣ ግዳናዋ። እ ባልያ ዎደ፥ ታን አ አሳ ጻምአን፥ አሳይ ሾጭያ ልሱዋን አ ሴራና። 15 ሽን ታን ነ ስንፐ ድጌዳ ሳኦላፐ ታ ሲቁ አከቴዳዋዳን፥ አፐ ኡባካ አከተና። 16 ነ ዛራቱነ ነ ካዉተይ ታ ስንን መናዉ ጋምአና፤ ነ ካዉተ አራታይካ መናዉ ምን ኤቃና” ያጌ’ ያጋ” ያጌዳ። 17 ናታን ጾሳይ አዉ ሳጻን ቆንጭሴዳ ቃላ ኡባ ዳዊታዉ ኦዴዳ። 18 ሄዋፐ ጉይያን፥ ካቲ ዳዊተ ዱንካንያ ገሊደ፥ መና ጎዳ ስንን ኡቴዳ። ሀዋዳን ያጊደ ዎሴዳ፤ “አቤት ኡባ ሞድያ መና ጎዳዉ፥ ኔን ሀዋ ኡባ ታዉ ኦናዉ ታን ኦኔ? ታ ሶ አሳይካ አዬ? 19 አቤት ኡባ ሞድያ መና ጎዳዉ፥ ሀዌ ነ አይፍያ ስንን ጉ ማላትና፥ ስንፐ ነ ቆማ ዛረቶ ሀናናዋካ ሃሳያዳ። ኡባ ሞድያ መና ጎዳዉ፥ ሀዌ ኔን አሳዉ ኦዉካ ኦያ ኦሱዋ ግደና። 20 “ሀዋፐ አያዋ ታን ዳዊተ ነዉ አይ ጋናዉ ዳንዳያይታ? ኡባ ሞድያ መና ጎዳዉ፥ ኔን ታና ነ ቆማ ኤራሳ። 21 ኔን ነ ቃላ ድራዉ፥ ነ ዎዛና ቆፋዳን ሀ ዎጋባ ኦደ፥ ታና ነ ቆማ ኤርሳዳ። 22 “አቤት ኡባ ሞድያ መና ጎዳዉ፥ ኔን አይ ኬሻ ግቴሻ! ነ ማል እቱነ ባዋ፤ ኑን ኑ ሀይን ስሴዳዋዳንካ፥ ኔፐ አትና ሀራ ጾሳይ ባዋ። 23 ኔን ነ አሳ ኦናዉ ዎዜዳ ነ አሳ እስራኤልያ ማላትያ ሀራ ካዉተ ሳኣ ቦላን ባዋ። ኔን ኡንቱንቶ ኦዳ ግታነ ማላልስያ ኦሶቱ ጋሱዋን ነ ሱንይ ቢታን ሳኣን ኤረቴዳ። ኔን ነ አሳ ስንፐ ሀራ ካዉተቱዋነ ኡንቱንቱ ጾሳቱዋ ላጋዳ። 24 ኔን ነ አሳ እስራኤልያ መናዉ ነዋ ኦዳ። አቤት መና ጎዳዉ፥ ኔንካ ኡንቱንቱ ጾሳ ግዳዳ። 25 “መና ጎዳ ጾሳዉ፥ ስም ሀእ ኔን ነ ቆማዉነ አ ዘረዉ ኦና ጌዳዋ መናዉ ናጋ፤ ኔን ኦና ጌዳዋዳንካ ኪተታ። 26 ሄዋን ነ ሱንይ መናዉ ግታታና፤ አሳይካ ኔና፥ ‘ኡባፐ ዎልቃማ ጾሳይ እስራኤልያ ጾሳ’ ያጋና። ነ ቆማ ዳዊታ ዛራቱካ ነ ስንን ምኒደ ኤቃና። 27 “አቤት ኡባፐ ዎልቃማ መና ጎዳዉ፥ እስራኤልያ ጾሳዉ፥ ኔን ሀዋ፥ ‘ታን ነ ዛራቱ ደአናዳን ኦና’ ያጋደ ታዉ ነ ቆማዉ ቆንጫዳ፤ ሄዋ ድራዉ፥ ታን ነ ቆማይ ኔና ሀ ዎሳ ዎሳናዉ ጻላድ። 28 አቤት ኡባ ሞድያ መና ጎዳዉ፥ ኔን ጾሳቴ! ነ ቃላይካ አማነትያዋ፤ ኔን ሀ ሎኦ ቃላ ታዉ ነ ቆማዉ ኦና ጋዳ። 29 ነ ስንን ያ መናዉ ጋምአናዳን፥ ነ ቆማ ዛርያ አንጃናዉ ህዶታዳ። አያዉ ጎፐ፥ አቤት ኡባ ሞድያ መና ጎዳዉ፥ ሄዋ ሃሳያዳ፤ ቃይ ነ አንጁዋን ነ ቆማ ዛራቱ መናዉካ አንጀታና” ያጋ ዎዳ።