ኪቴዳዋንቱ ኦሱዋ 26

1 አግሪጳይ ጳዉሎሳ፥ “ኔን ነባ ሃሳያናዉ ዳንዳያ” ያጌዳ። ሄ ዎደ ጳዉሎስ ባረ ኩሽያ ምጪደ ሀዋዳን ያግ ዛሬዳ። 2 “ካትያ አግሪጳ፥ አይሁዳቱዋ ዎጋነ ፓሉማ ኡባ ኔን ሎይደ ኤርያ ድራዉ፥ ታና አይሁዳቱ ሞትያ የዉዋ ኡባ ሀቼ ታን ነ ስንን ዛርያዎ ታ ካጫይ ዳርስ ሎአ ያጋደ ቆፓይ፤ ሄዋ ድራዉ፥ ኔን ታ ሃሳያ ሳለተናን ስሳና ማላ፥ ኔና ዎሳይ። 4 “ታን ናአተፐ ዶማደ ታ አሳ ግዶንነ የሩሳላመን ደኤዳ ታ ደኡዋ አይሁዳ ኡባቱ ካሰፐ ዶሚደ ኤሪኖ። 5 ታን ኮይሮፐ ዶማደ፥ ኑ አማኑዋ ህግያ ኦፐነ ምንሲደ ናግያ ፓርሳዋቱዋ ባጋ ፓርሳዌ ግዳደ ደእያዋ፥ ኡንቱንቱ ማርካታናዉ ኮዮፐ ኤሪኖ። 6 ታን ሀእካ ጾሳይ ኑ አዋቶ እማና ጌዳዋ ናሸቻን ናግያ ድራዉ፥ ፕርደታናዉ ሀዋን ኤቃይ። 7 ቃይ ታማነ ላኡ ኑ አዎቱዋ ዛራቱ ጾሳዉ ቃማነ ጋላስ ኡባደ ምንስ ጎይኒደ፥ ጾሳይ እማና ጌዳዋ አካናዉ ናሸቻን ናጊኖ፤ ካትያ አግሪጳ፥ አይሁዳቱ ታና ሞትያዌ ታን ሄዋ ናሸቻን ናግያ ድራሳ። 8 አይሁዳቶ፥ ጾሳይ ሀይቄዳዋንታ ደንያዋ አያዉ አማንክቴ? 9 “ታን ታ ሁጰዉካ ናዝሬትያ የሱሳ ኤቀታናዉ በሴ ጋደ ካሰ ቆፓድ። 10 ታን የሩሳላመን ኦዳዌ ሀዋ፤ ቄሳቱዋ ካፓቱዋፐ ማታ አካደ፥ ጾሳ አሳቱዋፐ ጮራቱዋ ቃሽሳድ፤ ኡንቱንታ ዎያ ዎደካ ኡንቱንቱ ሀይቂያዋ ዶሳድ። 11 አይሁዳ ዎሳ ጎለ ኡባን ዳሮ ዎደ ኡንቱንታ ሙራደ፥ ባረንቱ አማኑዋ ኡንቱንቱ አጋና ማላ ጎደታድ፤ ታን ዎጋይ ባይናዋ ኡንቱንቶ ሀንቀታደ፥ ሀራይ አቶ፥ ሀራ ጋድያ ካታማ ጋካናዉካ ኡንቱንታ መቶይ። 12 “ታን ሀ የዎ ቄሳቱዋ ካፓቱዋፐ ማታነ አዛዙዋ አካደ ዳማስቆ ባድ። 13 ካተዉ፥ ታን ሴታ ጋላስ ኦግያን ደእሽን፥ አዋ ፖኡዋፐ ሎይ አያ ፖኡ ታናነ ታናና ቤዳዋንታ ዩይ አደ፥ ሳሉዋፐ ፖእሽን በኣድ። 14 ኑን ኡባይ ሳኣን ኩንዴዳ ዎደ፥ እብራይስጸ ቃላን፥ ‘ሳኦላ፥ ሳኦላ፥ ታና አያዉ የደሳን መቶይ? ኔን ታና እጹሳን ኔና ቆሃሳ’ ያጊደ ታዉ ኦድሽን ስሳድ። 15 “ያታደ፥ ‘ታ ጎዳዉ፥ ኔን ኦኔ?’ ያጋድ። “ጎዳይ፥ ‘ታን ኔን የደሳን መቶያ የሱሳ። 16 ሽን ደንዳ ኤቃ፤ አያዉ ጎፐ፥ ሀቼ ኔን ታና ቤኤዳዋነ ታን ኔና ስንፐ በሳናዋ ሀራንቶ ማርካታና ማላ፥ ታዉ ኦያዋ ኡዳደ ኔና ሱንናዉ ነዉ ቆንጫድ። 17 ኡንቱንቱ ታና አማንና፥ ኡንቱንቱ ናጋራይ አቶ ጌተታናዳን፥ ጾሳይ ዶሬዳ አሳ ግዶን ኡንቱንቱ ባረንቱ ደኢያሳ ደማናዳን፥ ቃይ ማፐ ፖኡዋ ስማናዳንነ ጻላህያ ጎዳተፐካ ጾሳኮ ስማናዳን፥ ኡንቱንቱ አይፍያ ኔን ዶያና ማላ፥ እስራኤልያ አሳፐነ ታን ኔና ኡንቱንቱኮ ኪትያ አይሁዳ ግደናዋንቱፐ ኔና አሻና’ ያጌዳ። 19 “ካትያ አግሪጳ፥ ሄዋ ድራዉ፥ ታዉ ሳሉዋፐ ቤቴዳ ሳጻዉ ታን አዛዘታናዋ እጻበይከ። 20 ሽን ታን ካሰታደ፥ ዳማስቆንነ የሩሳላመን ሄዋፐ ጉይያን፥ ይሁዳ ጋድያ ኡባን ደእያዋንቱስነ አይሁዳ ግደናዋንቶ ባረንቱ ናጋራፐ ስማና ማላ፥ ቃይ ናጋራፐ ስማናዉ በስያዋ ኦደ፥ ጾሳኮ ስማና ማላ ቃላ ኦዳድ። 21 ሄዋ ድራዉ፥ አይሁዳቱ ታና ጌሻ ጎልያን ኦይቂደ ዎናዉ ኮዬድኖ። 22 ሄዋ ድራዉ፥ ታን ጾሳ ማዱዋ አካደ፥ ዳሮነ ጉዉ ሀቼ ጋካናዉካ ኤቃደ ማርካታይ። ናባቱነ ሙሴ፥ ‘ክርስቶስ መቶታናዉ በሴ፤ ቃይ ሀይቁዋፐ ኮይሮ ደንዲደ፥ አይሁዳቶነ አይሁዳ ግደናዋንቶ አቶተ ፖኡዋ ኦዳናዉ በሴ’ ጌዳዋዳን፥ ታንካ ኡንቱንቱ ሃሳዬዳዋፐ ሀራ እትባነ ሃሳዬዳባይ ባዋ” ያጌዳ። 24 ጳዉሎስ ባረንቱባ ሀዋዳን ያጊደ ዛርሽን፥ ፕስጾስ ኮሻ ቁ ኦደ አ ሃሳያ ባናዉ፥ “ጳዉሎሳ፥ ኔን ጎያ፤ ኔን ዳሪ ታማሬዳዌ ኔና ጎሻና ሀኔ” ያጌዳ። 25 ሽን ጳዉሎስ ሀዋዳን ያጌዳ፤ “ቦንቼቴዳ ፕስጾሳ፥ ታን ቱማተን ሎኦ የዉዋነ ዎዛና ቆፋ ሃሳይያዋፐ አትን ጎይከ። 26 ታን ካትያ አግሪጳዉ ሀ የዉዋ ቆንጭያን ኦድያዋ እ ኤሬ፤ አያዉ ጎፐ፥ ሀ የዉ ጌማን ኦሰትቤና ድራዉ፥ ሀዋፐ እቱነ አፐ ጌመናዋ ታን ጌሻደ ኤራይ። 27 “ካትያ አግሪጳ፥ ኔን ናባቱ ጌዳዋ አማናይ? ኔን ኡንቱንቱ ጌዳዋ አማንያዋ ታን ኤራይ” ያጌዳ። 28 ካትያ አግሪጳይ ጳዉሎሳ፥ “ሀእ ሀ ቃን ዎዳትንካ ታና አማንናዉ ኮያይ?” ያጌዳ። 29 ሄዋፐ ጉየ ጳዉሎስ፥ “ዳሮ ዎደ ግድና፥ ጉ ዎደ ግድና፥ ነ ጻላላ ግዳካ፤ ሽን ሀቼ ታን ኦድያዋ ስስያ ኡባይ ቃይ ታዋዳን ቃሸቶፕኖ አትን፥ ታ ማላ ግዳናዳን ጾሳ ዎሳይ” ያጌዳ። 30 ሄዋፐ ጉይያን ካቲ፥ ሞድያ ፕስጾሰ፥ ባርኒቀነ፥ ኡንቱንቱና ደእያ ኡባይ ደንድ፥ 31 እት ባጋ ስሚደ፥ እቱ እቱዋና፥ “ሀ ብታኒ ሀይቁሳይ አቶ ሽን፥ ቃሹዋስካ በስያባ ኦቤና” ያግ ሃሳዬድኖ። 32 አግሪጳይ ፕስጾሳ፥ “ሀ ብታኒ፥ ‘ቄሳሪ ታባ ፕርዶ’ ግቤነንቶ፥ ብለታናዉ ዳንዳዬ ሽን” ያጌዳ።