ኤራንቻ 10

1 ሀይቄዳ ኡዱንጸቱ ሳዊያ ዛይትያ ሽቱዋ ጽንቀናዉ ዳንዳዪኖ፤ ሄዋዳንካ፥ ጉ ኤያተይ አዳ ኤራተነ ዎልቃማ ቦንቹዋ ባይዜ። 2 አዳ ኤራንቻ አሳ ዎዛናይ አ ኡሸቻዉ ካለ፤ ሽን ቦዛ አሳ ዎዛናይ ሀድርሳዉ ካለ። 3 ኤያ አሳይ ኦግያን ሀመትያ ዎደካ፥ አዉ አኬክ ባዋ፤ ሄዋፐ ደንዴዳዋን እ ቦዛ ግድያዋ አሳይ ኡባይ ኤሬ። 4 ነ ካፑ ነ ቦላን ሀንቀቶፐነ፥ ነ ሱንቴዳ ሳኣፐ ክቻ ክቾፓ፤ አያዉ ጎፐ፥ ጮኡ ጊደ ዳንዳይያዌ ዎልቃማ ባይዙዋካ አቶ ጊሴ። 5 ሳሉዋ ጉፋንን ታን በኤዳ ሀራ ኢታባይ ደኤ፤ ሄዌካ ደርያ ሞድያዋንቱ ኦያ ናቁዋ። 6 ኤያቱ ዳሮ ቃ ሱንተ ኦይቂደ ደእያ ዎደ፥ ዱረቱ ህርክ ዝቃ ሳኣን ኡቴድኖ። 7 ታን፥ አይለቱ ሞድያዋንቱዳን ፓራ ቶጊደ ቢሺናነ ቃይ ሞድያዋንቱ አይለቱዋዳን ገድያን ሀመትሽን በኣድ። 8 ኦላ ቦክያ ኡራይ ሄ ኦላን እ ኩንዳና፤ ቃይ ግምቢያ ድርሳ ኮልያ ኡራ ሾሻይ ዱካና። 9 ሹቻ አ ሳኣፐ አ የግያ ኡራይ ሄ ሹቻን ደሸቴ፤ ቃይ ም ቆእያ ኡራይካ ሄ ምን ደሸቴ። 10 ዱልዱሜዳ ካልታ ፖሸናን ጮ ቆኦፐ፥ ዳሮ ዎልቃ ዉርሴ፤ ሽን አዳ ኤራን ኦያዌ ኦሱዋ ዳርሴ። 11 ሾሻይ ዱክ ድግና፥ ሾሻ ጆልሳናዉ አያንቲያ አያንቱ ሄ ኡራዉ አይነ ማደና። 12 አዳ ኤራንቻ ሃሳያይ አዉ ቦንቹዋ እምሴ፤ ሽን ኤያይ ባረ ዶናፐ ከሴዳ ቃላን እ ባረዉ መቱዋን ገሌ። 13 ኤያይ ባረ ሃሳያ ቦዛ ቃላን ዶሚደ፥ ኢታተንነ ጎሻን ፖሌ። 14 ኤያይ ዳሮባ ሃሳዬ። ግዶፐነ፥ ስንፐ ሀናናዉ ደእያዋ ኦንነ ኤረና። አስ ሀይቂ ክችና፥ ሀናናዉ ደእያዋ አዉ ኦዳናዉ ዳንዳይያዌ ባዋ። 15 ኤያ አሳይ ባረ ኦሱዋን ዳቡሬ፤ እ ባረ ጎለ ብያ ኦግያ ኤረና። 16 ቄር ናኣ ግዴዳ ካዉነ ዎንታ ጉራና ግብራ ጊግሲደ፥ ባረንቶ ምያ ካፓቱ ደእያ ቢታይ ነዉ አየ አና! 17 ቦንቼቴዳ ካዉነ ማዋሳ ግደናን ዎልቃነ ምኖተ ደማናዉ ማራን ምያነ ኡሽያ ካፓቱ ደእያ ቢታታ ጋላተቴዳኖ። 18 ብታኒ አዛላ ግዶፐ፥ አ ካራይ ዎዴ፤ አ ኩሺ ኦሱዋ ብሎዋል ግዶፐ፥ አ ጎሊ አ። 19 ቁማ ምያዋንነ ዎይንያ ኤሳ ኡሽያዋን ናሸቻይ ቤቴ፤ ሽን ሚሻይ ኡባባ ሻሜ። 20 ስስያዌ ባዋ ጋደ ነ ዎዛና ቆፋን ግዶፐነ፥ ካትያ ቦሮፓ፤ ዎይ ነ ግስያ ክፍልያን ዱርያ ቦሮፓ፤ አያዉ ጎፐ፥ ነ ጌዳዋ ሳሉዋ ካፉ ዎይ፥ ቀፍያና መታቱ ቢደ፥ ኡንቱንቶ ኦዳና።