ከሳ 13

1 መና ጎዳይ ሙሳ ሀዋዳን ያጌዳ፤ 2 “ባይራ የለቴዳ አቱማዋ ኡባ ታዉ ዱማያ። እስራኤልያ አሳ ግዶን ኡሉዋፐ የለቴዳ ባይራ ኡባይ፥ መህያ ግድና አሳ ግድና፥ ኡባይካ ታዋ” ያጌዳ። 3 ሄዋፐ ጉይያን ሙሴ አሳ፥ “ግብጼፐ፥ አይለተ ጋድያፐ ህንተንቱ ከሴዳ ጋላሳ፥ ሀ ጋላሳ ሀሳይተ፤ አያዉ ጎፐ፥ መና ጎዳይ ባረ ዎልቃማ ኩሽያን ህንተንታ ከሴዳ፤ ሄዋ ድራዉ፥ እርሹ ገሌዳዋ ኡባካ ሞፕተ። 4 ህንተንቱ ሀቼ፥ ላይዉ ኮይሮ ግዴዳ አቢባ አግናን ከሲታ። 5 መና ጎዳይ ካናነቱዋ፥ ሂተቱዋ፥ አሞራዋናቱዋ፥ ሂዌቱዋነ ያቡሳዋናቱዋ ጋድያ ህንተንታ ጋያ ዎደ፥ ህንተንቱ ሀ ፓስጋ ሀ አግናን ቦንቺታ። ሄ ቢታይ ጾሳይ ህንተዉ እማና ማላ፥ ካሰ ህንተንቱ አዋቶ ጫቂ ዎዳ ቢታ። ሄ ቢታይ ማይነ ኤሳይ ጎግያ ቢታ። 6 ህንተንቱ ላፑን ጋላሳይ ጋካናዉ እርሹ የገትቤና ኡክ ማንታ፤ ላፑን ጋላሳይ መና ጎዳ ባላ ግዳናዋ። 7 ሄ ላፑን ጋላሳቱዋን እርሹ የገትቤና ኡክ ህንተንቱ ማና፤ ህንተንቱ ግዶን እርሹዋና ደእያባይ አያይነ ቤቶፖ፤ ነ ቢታ ዛዋን ሀቃንነ እርሹ ቤቶፖ። 8 “ሄ ጋላስ ኔን ነ ናአዉ፥ ‘ታን ሀዋ ኦያዌ፥ ታን ግብጼፐ ከስያ ዎደ፥ መና ጎዳይ ታዉ ኦዳዋ ሀሳያናሳ’ ያጋደ ኦዳ። 9 መና ጎዳይ ህንተንታ ባረ ዎልቃማ ኩሽያን ግብጼፐ ከሴዳ ድራዉ፥ መና ጎዳ ዎጋይ ህንተንቱ ዶናፐ ዎናዳን፥ ሀ ቦንቼትያ ጋላሳይ ነ ኩሽያን ቃቼዳነ ነ ዴሙዋን ዎዳ ሀሳይስያዋ ማላ ግዳና። 10 ሄዋ ድራዉ፥ ህንተንቱ ሀ ዎጋ ላይን ላይን አ ዎድያን ቦንችተ። 11 “መና ጎዳይ ህንተንቱነ ህንተንቱ ማይዛ አዋቶ እማናዉ ጫቄዳዋዳን፥ እ ህንተንታ ካናነቱዋ ጋድያ ገልሲደ፥ ሄ ጋድያ ህንተንቶ እምያ ዎደ፥ 12 ኡሉዋፐ ባይራ የለቴዳ ኡባ መና ጎዳዉ ዱማያ፤ ነ ሚዛ ባይራ የለትያ አቱማዋ ኡባይ መና ጎዳዋ። 13 ባይራ የለትያ ሀርያ ኡባ ዶርሳ ማራን ዎዛ አካ። ዎዘናዋ ግዶፐ፥ አ ሞርግያ መን፤ ነ አቱማ ናና ግዶን ባይራ የለቴዳዋንታ ኡባ ዎዛ። 14 ስንና ያና ዎድያን ነ ናአይ ኔና፥ ‘ሀዌ አዬ?’ ያጊደ ኦቾፐ፥ ኔን አ፥ ‘መና ጎዳይ ኑና ዎልቃማ ኩሽያን ግብጼፐ፥ አይለተ ጋድያፐ ከሴዳ፤ 15 ግብጼ ካቲ ዶንጭሊደ ኑና የደናን እጽና፥ መና ጎዳይ ግብጼ ጋድያን ደእያ ባይራ ኡባ፥ አሳፐ ዶሚደ መህያ ባይራ ጋካናዉ ዎዳ። ታን አት ኡሉዋፐ ኮይሮ የለቴዳ አቱማዋ ኡባ መና ጎዳዉ ያርሽያዌነ ታ ባይራ አቱማ ናና ታን ዎዝያዌ ሄዋሳ’ ያጋ። 16 መና ጎዳይ ኑና ባረ ዎልቃማ ኩሽያን ግብጼፐ ከሴዳዎ፥ ሀዌ ህንተንቶ ኩሽያን ቃቼዳነ ዴሙዋን ዎዳ ማላ ማላ ግዳናዋ” ያጌዳ። 17 ካቲ አሳ የዴዳ ዎደ፥ ጾሳይ ኡንቱንታ ፕልስጼማ ቢታና አያ ኦጊ ማታ ግዶፐነ ሄ ኦግያና ካለቤና፤ አያዉ ጎፐ፥ ጾሳይ፥ “አሳይ ኦላ በኦፐ፥ ባረ ቆፋ ላሚደ፥ ጉየ ግብጼ ስመናዳን” ያጊደ ቆፔዳ። 18 ሄዋ ድራዉ፥ ጾሳይ አሳ መላ ቢታ ኦግያና ዩሺደ፥ ዞኦ አባኮ ካለዳ። እስራኤለቱ ግብጼ ጋድያፐ ኦላዉ ጊጊደ ፑደ ከሴድኖ። 19 ዮሴፎ እስራኤልያ አሳ ጫቀ ዎዳ ድራዉ፥ ሙሴ አ መቀ ባረናና አኪደ ቤዳ፤ ዮሴፎ ኡንቱንታ፥ “ጾሳይ ቱሙፐ ህንተንታ ማዳናዉ ያናዋ፤ ሄ ዎደ ህንተንቱ ታ መቀ ሀ ሳኣፐ ፑደ ህንተናና አኪደ ቢተ” ያጊደ ኦድ ዎዳ። 20 ኡንቱንቱ ሱኮተፐ ደንዲደ መላ ቢታ ዶናን ደእያ ኤታማን ኡቴድኖ። 21 መና ጎዳይ ኡንቱንቱ ጋላስነ ቃማ ሀመታና ማላ፥ ጋላሳን ኡንቱንታ ኦግያ በሳናዉ ሻርያ ቱሳን፥ ቃማን ኡንቱንቶ ፖእሳና ማላ ታማ ቱሳን ኡንቱንታ ካለዳ። 22 ጋላስ ሻርያ ቱሳይ ዎይ ቃማ ታማ ቱሳይ አሳ ስንፐ ክችቤና።