ከሳ 8

1 ሄዋፐ ጉይያን መና ጎዳይ ሙሳ፥ “ባ፤ ግብጼ ካትያኮ ባደ፥ ‘መና ጎዳይ ሀዋዳን ያጌ፤ “ታዉ ጎይናና ማላ፥ ታ አሳ የዳ። 2 ኔን ኡንቱንታ የደናን እጾፐ፥ ታን ነ ቢታ ኡባን ሸያ ኩንና። 3 ናይለ ሻፋን ሸ ሾሀካታና። ኡንቱንቱ ሾሀካት ከሲደ ነ ሶ፥ ነ ስርጻ፥ ነ ግሱዋ ግዶ፥ ነ ኦሳንቻቱዋ ጎልያ ግዶ ገላና፤ ነ አሳ ቦላ ከሳና፤ ነ ጮጭያነ ነ ልያ ዎያ ከርያን ገላና። 4 ሸቱ ነ ቦላ፥ ነ አሳ ቦላነ ነ ኦሳንቻቱዋ ኡባ ቦላ ከሳና” ያጌ’ ያጋደ ኦዳ” ያጌዳ። 5 ሄዋፐ ጉይያን መና ጎዳይ ሙሳ፥ “ኔን አሮና፥ ‘ነ ጻምኣ ኦይቃደ፥ ሻፋቱዋ ቦላ፥ ዜሬቶ ሃቱዋ ቦላነ ድኡዋ ኦላ ቦላ ነ ኩሽያ ምጫደ ሸቱ ግብጼ ጋድያ ቦላን ከሳናዳን ኦ’ ያጋደ ኦዳ” ያጌዳ። 6 አሮነ ግብጼ ሃቱዋ ቦላ ባረ ኩሽያ ምጭና ሸቱ ከሲደ፥ ግብጼ ጋድያ ማዬድኖ። 7 ሻሬቻቱካ ባረንቱ ማሹዋን ሄዋዳን ኦድኖ፤ ኡንቱንቱካ ግብጼ ጋድያን ሸ ከሳናዳን ኦድኖ። 8 ካቲ ሙሳነ አሮና ጼስሲደ፥ “ሀ ሸቱዋ ታፐነ ታ አሳፐ ድጋና ማላ፥ መና ጎዳ ህንተንቱ ዎስተ፤ ያቶፐ መና ጎዳዉ ያርሹዋ ያርሻና ማላ፥ ታን አሳ የዳና” ያጌዳ። 9 ሙሴ ካትያ፥ “ካትያዉ ሸቱ ኔፐነ ነ ሶፐ ያና ማላነ ናይለ ሻፋ ጻላላን አታና ማላ፥ ታን ነዉ፥ ነ ኦሳንቻቶነ ነ አሳዉ ዎሳና ዎድያ ኔን ኬራ” ያጌዳ። 10 ካቲ፥ “ዎንታ” ያጌዳ። ሙሴ፥ “መና ጎዳ ኑ ጾሳ፥ ማላይ ኦንነ ባይናዋ ኔን ኤራና ማላ፥ ኔን ጌዳዋዳን ሀናናዋ። 11 ሄ ሸቱ ኔፐ፥ ነ ጎልያፐ፥ ነ ኦሳንቻቱዋፐነ ነ አሳፐ ያናዋንታ፤ ኡንቱንቱካ ናይለ ሻፋ ጻላላን አታናዋንታ” ያጌዳ። 12 ሙሴነ አሮነ ካትያ ማታፐ ከሴድኖ፤ ካትያ ቦላ መና ጎዳይ አሄዳ ሸቱዋባ ሙሴ መና ጎዳኮ ዎሴዳ። 13 መና ጎዳይ ሙሴ ኦቼዳዋዳን ኦዳ፤ ሸቱ ሶን ካረንነ ደምባን ሀይቄድኖ። 14 ግብጼ አሳይ ኡንቱንታ ሺሽ ሺሺደ ዶሬድኖ፤ ቢታይ ሄዋ ጽንቁዋን ዜኤዳ። 15 ሽን ካቲ ሸቱ ባይናዋ በኤዳ ዎደ አ ዎዛናይ ዶንጭሌዳ፤ መና ጎዳይ ኦዴዳዋዳንካ፥ እ ሙሴነ አሮነ ኦዴዳ ኦዱዋ ስሰናን እጼዳ። 16 መና ጎዳይ ሄዋፐ ጉይያን፥ ሙሳ “ኔን አሮና፥ ‘ነ ጻምኣ ምጫደ፥ ቢታ ባና ሾጫ’ ያጋደ ኦዳ። ግብጼ ቢታ ኡባን ባናይ ጩቻ ከሳናዋ” ያጌዳ። 17 ኡንቱቱ ሄዋዳን ኦድኖ፤ አሮነ ጻምኣ ኦይቂደ ባረ ኩሽያ ምጪደ፤ ባረ ጻምአን ቢታ ባና ሾጭና አሳነ፥ መህያ ቦላ ጩቻይ ዬዳ። ግብጼ ጋድያን ሀ ጋጻፐ ያ ጋጻ ጋካናዉ፥ ባና ኡባይ ጩቻ ከሴዳ። 18 ሻሬቻቱካ ባረንቱ ማሹዋን ሄዋዳን ኦናዉ ባጸቴድኖ፤ ሽን ዳንዳይበይክኖ። ጩቻይ አሳ ቦላነ፥ መህያ ቦላ ኩሜዳ። 19 ሻሬቻቱ ካትያ፥ “ሀዌ ጾሳ ኦሱዋ” ያጌድኖ። ሽን ካትያ ዎዛናይ ዶንጭሌዳ፤ ጾሳይ ጌዳዋዳንካ፥ እ ኡንቱንቱ ኦድያዋ ስሰናን እጼዳ። 20 መና ጎዳይ ሙሳ፥ “ጉራን ደንዳደ፥ ካቲ ሻፋ ቢሽን አናና ጋከታደ ኔን አ፥ ‘መና ጎዳይ ያጌ፤ “ታዉ ኦና ማላ፥ ታ አሳ የዳ፤ 21 ኔን ታ አሳ የደናን እጾፐ፥ ታን ነ ቦላ፥ ነ ኦሳንቻቱዋ ቦላ፥ ነ አሳ ቦላነ ነ ጎለቱዋ ግዶ ኡዱንጽያ ዉድያ የዳና፤ ግብጼቱዋ ጎለንነ ኡንቱንቱ ደእያ ቢታ ኡባን ኡዱንጺ ኩማናዋ። 22 ሽን ሄ ጋላስ ታ አሳይ በተ ግዲደ ደእያ ጎሸና ጋድያን ኡዱንጺ ኩመናዳን ታን ተኣደ፥ ኡንቱንቱ ቢታ ሻካና፤ ታን መና ጎዳይ፥ ሀ ጋድያ ኡባን ደእያዋ ኔን ሄዋን ኤራና። 23 ታን ታ አሳነ ነ አሳ ሻካና፤ ሀ ዎልቃማ ማላታይ ዎንት ሀናና” ያጌ’ ያጋደ ኦዳ” ያጌዳ። 24 መና ጎዳይ ሄዋፐ ጉይያን፥ ጌዳዋዳን ኦዳ፤ ካትያ ሶንነ አ ኦሳንቻቱዋ ሶን ዳሮ ኡዱንጽያ ዉዲ ዬዳ፤ ግብጼ ጋድያ ኡባ ባይዜዳ። 25 ሄ ዎደ ካቲ ሙሳነ አሮና ጼስሲደ፥ “ቢተ፤ ሀ ጋድያን ህንተንቱ ጾሳዉ ያርሽተ” ያጌዳ። 26 ሽን ሙሴ፥ “ሄዌ ልከ ግደና፤ ኑን መና ጎዳ ኑ ጾሳዉ ሺሽያ ያርሾቱ ግብጼቱዋ ሸነይያዋ ግዳናዋ፤ ኑን ኡንቱንታ ሸነይያ ያርሾቱዋ ኡንቱንቱ ጼልሽን ያርሾፐ፥ ኡንቱንቱ ኑና ሹቻን ጫድክኖ? 27 ኑን መና ጎዳ፥ ኑ ጾሳዉ፥ ያርሾቱዋ ሺሻናዉ እ ኑና አዛዝያዋዳን፥ ሄዙ ጋላሳ ኦግያ መላ ቢታ ባና ኮሼ” ያጌዳ። 28 ካቲ፥ “መና ጎዳዉ፥ ህንተንቱ ጾሳዉ፥ ህንተንቱ መላ ቢታ ቢደ ያርሻና ማላ፥ ታን ህንተንታ የዳና፤ ሽን ህንተንቱ ሃኪደ ቦፕተ፤ ታዉ ሀእ ዎስተ” ያጌዳ። 29 ሙሴ፥ “ታን ነ ማታፐ ከሶ ሳኣናካ መና ጎዳ ዎሳና፤ ሀ ኡዱንጽያ ዉዲ ዎንት ካትያፐ፥ አ ኦሳንቻቱዋፐነ አ አሳፐ ክቻናዋ። ሽን መና ጎዳዉ ያርሻናዉ አሳ የደናን እጻናዉ ካቲ ኑና ዛር ጭመና ማላ አኬኮ” ያጌዳ። 30 ሄዋፐ ጉይያን ሙሴ ካትያ ማታፐ ከሲደ፥ መና ጎዳ ዎሴዳ። 31 መና ጎዳይ ሙሴ ኦቼዳዋዳን ኦዳ፤ ኡዱንያ ካትያፐ፥ አ ኦሳንቻቱዋፐነ አ አሳፐ እቱነ አተናን ክቼዳ። 32 ሽን ሀእካ ቃይ ካትያ ዎዛናይ ዶንጭልና፥ አሳ የደናን እጼዳ።