ህዝቄላ 12

1 መና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ኔን ማካላንቻ አሳ ግዶን ደኣሳ። ኡንቱንቱ ማካላንቻ አሳ ግድያ ድራዉ፥ ኡንቱንቶ አይፊ ደኤ፥ ሽን ደምክኖ፤ ኡንቱንቶ ሀይይ ደኤ፥ ሽን ስስክኖ። 3 ሄዋ ድራዉ፥ አሳ ናአዉ፥ ኦሞዱዋን ብያ አሳዳን፥ ኔን አፋናዉ ዳንዳይያዋ ኡባ ሺሻ ቃቻደ፥ ጋላስ ኡንቱንቱ ጼልሽን ከሳደ፥ ነ ደኢያሳፐ ሀራ ሳኣ ባ። ኡንቱንቱ ማካላንቻ አሳ ግዶፐነ፥ ኦን ኤሪ፥ ኡንቱንቱ አኬካና። 4 ጋላስ ኡንቱንቱ ጼልሽን፥ ኦሞዱዋ ብያ አሳዳን፥ ኔን ቃቼዳዋ ካረ ከሳ፤ ቃይ ኦማርስ ኡንቱንቱ ጼልሽን፥ ኦሞዱዋ ብያ አሳዳን ከሳ። 5 ኡንቱንቱ ጼልሽን፥ ነ ጎልያ ጎዳ መንደ፤ ሄ መኦ ሳኣና ሙሉደ ከሳ። 6 ኔን ከሴዳ ሚሻ ኡንቱንቱ ጼልሽን፥ ነ ሀሽያን ቶካደ፥ ለምእ ለምእሽን ከሳ። ቢታ በኤናዳን፥ ነ ሶምኡዋ ካማ። ሀ ኔን ሀንያዌ እስራኤልያ አሳዉ ማላታ ግዳናዳን፥ ታን ኦድ” ያጌዳ። 7 ታንካ እ ታና አዛዜዳዋዳን ኦድ። ኦሞዶ ብያ አሳዳን፥ ጋላስ ታን ቃቼዳዋ ካረ ከሳድ። ኦማርሳን ቃይ ታ ጎልያ ጎዳ ታ ኩሽያን መንደ ከሳድ፤ ታን ከሴዳ ሚሻ ኡንቱንቱ ጼልሽን፥ ታ ሀሽያን ቶካደ፥ ለምእ ለምእሽና ባድ። 8 ዎንተ መና ጎዳ ቃላይ ታኮ ሀዋዳን ያጊደ ዬዳ፤ 9 “ላ አሳ ናአዉ፥ ሄ ማካላንቻ ዛራቱ፥ እስራኤልያ አሳቱ ኔና፥ ‘ኔን ኦያዌ አዬ?’ ጊደ ኦቼድኖ ግድክኖ? 10 ኔን ኡንቱንታ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ሀ ትምቢቲ የሩሳላመን ካፑዋባነ እስራኤልያ አሳ ኩመንባ” ያጋ’ ያጌ። 11 ኔን ኡንቱንታ፥ ‘ታን ህንተዉ ማላታ። ታን ኦዳዋዳን፥ ኡንቱንቱ ቦላ ሀናና፤ ኡንቱንቱ ኦሞደቲደ፥ ሀራ ቢታ ባና’ ያጋ። 12 “ኡንቱንቱ ግዶን ደእያ ካፑ ጎዳ ሉክ ከሲደ፥ ባረ ሚሻ ባረ ሀሽያን ቶኪደ፥ ለምእ ለምእሽና ባና፤ እ ቢታ በኤናዳን፥ ባረ ሶምኡዋ ካማና። 13 ታን ግትያ አ ስንን የጋና ታ ጲርያንካ ኦይቃና። ታን አ ባብሎነ ካታማ አሀና፤ ሽን እ ካላዳዌቱዋ ቢታ ባብሎነ ካታማ በኤናን ሀይቃና። 14 አ ዩሹዋን ደእያ አ ማድያዋንታነ አ ኦላንቻቱዋ ኡባ ታን ኡባ ሳኣ ፕስክ ኦና፤ ታን ኡንቱንታ ማሻን የደርሳና። 15 “ኡንቱንታ ታን ሀራ ቢታቱነ ካዉተቱዋ ግዶ ላልያ ዎደ፥ ታን መና ጎዳ ግድያዋ ኡንቱንቱ ኤራና። 16 ኡንቱንቱ ባረንቱ ብያ ካዉተቱዋ ግዶን ባረንቱ ቱና ኦሱዋ ፓጻና ማላ፥ ታን ኡንቱንቱፐ አማሬዳዋንታ ኦላፐ፥ ኮሻፐነ ኢታ ሀርግያፐ ከስ አካናዳን ኦና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና” ያጊደ ዬዳ። 17 መና ጎዳ ቃላይ ታኮ ሀዋዳን ያጊደ ዬዳ፤ 18 “ላ አሳ ናአዉ፥ ነ ኡክ ዳጋማን ማ፤ ቃይ ነ ሃካ ያሻን ኮኮራደ ኡሻ። 19 ቢታን ደእያ አሳዉ ሀዋዳን ያጋ፤ ‘ኡባ ሞድያ መና ጎዳይ እስራኤልያ ቢታን ደእያ የሩሳላመ አሳባ ሀዋዳን ያጌ፤ “ኡንቱንቱ ባረንቱ ኡክ ህርጋን ማና፤ ባረንቱ ሃካ ሻቢርሳን ኡሻና። አያዉ ጎፐ፥ ያን አሳይ ኡባይ ገናንቻነ ማካላንቻ ግዴዳ ድራዉ፥ ኡንቱንቱ ቢታይ ኦና ግዳናዋ። 20 ሀእ አሳይ ኩሜዳ ካታማቱ ያና፤ ቃይ ቢታይካ ኦና ግዳናዋ። ሄ ዎደ ታን መና ጎዳ ግድያዋ ህንተ ሄዋን ኤራና” ያጌ’ ያጋ” ያጊደ ዬዳ። 21 መና ጎዳ ቃላይ ታኮ ሀዋዳን ያጊደ ዬዳ፤ 22 “ላ አሳ ናአዉ፥ እስራኤልያ ቢታባዉ፥ ‘ጋላሳይ አዳ፤ ሳጻይ ኡባይካ መላ ግዴዳ’ ያጊደ ህንተንቱ ሌምስያዌ እ አዬ? 23 ሄዋ ድራዉ፥ ኡንቱንቶ ኔን፥ ‘ኡባ ሞድያ መና ጎዳይ ሀዋዳን ያጌ፤ “ታን ሀ ሌምሱ ላኤን ሀሳየተናዳን ኦና፤ ኡንቱንቱ ዛረደ፥ ሄዋ እስራኤልያ ቢታን ሌምስክኖ” ያጌ’ ያጋ። ቃይ ኡንቱንቶ፥ ‘ጋላሳይ ማታቴዳ፤ ሳጻይ ኡባይካ ፖለታና ሀኔ’ ያጋ። 24 ሀዋፐ ስንዉ እስራኤልያ አሳ ግዶን ዎርዱዋ ሳጻይነ ሙሩኑ ኡባይ ደኤና። 25 ታን መና ጎዳይ፥ ኦዳና ኮዮዋ ኦዳይ፤ ሄዌካ ጋምኤናን ፖለታና። ህንተኖ፥ ማካላንቻ አሳቶ፥ ታን ኦድያባ ኡባ ህንተ ላይን ታን ፖላና። ታን ኡባ ሞድያ መና ጎዳይ ሀዋ ኦዳይ” ያጊደ ዬዳ። 26 ቃይካ መና ጎዳ ቃላይ ታኮ ሀዋዳን ያጊደ ዬዳ፤ 27 “ላ አሳ ናአዉ፥ እስራኤልያ አሳይ ሀዋዳን ያጌ፤ ‘እ በኤዳ ሳጻይ ስንናዉ ዳሮ ላይሳ፤ ቃይ እ አዱሳ ዎድያን ሀናናዋ ኦዴ’ ያጌ። 28 ሄዋ ድራዉ፥ ኔን ኡንቱንቶ ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ታን ኦድያ ቃላይ ፖለታናፐ አትና፥ እቱካ ጋምኤና። ታን ኡባ ሞድያ መና ጎዳይ ሀዋ ኦዳይ” ያጌ’ ያጋ” ያጊደ ዬዳ።