ህዝቄላ 31

1 ኑን ኦሞደቴዳ ታማነ እተን ላይን፥ ሄዘን አግናን፥ ኮይሮ ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ 2 “ላ አሳ ናአዉ፥ ግብጼ ካትያዉነ አሳ ኡባዉ ሀዋዳን ያጋደ ኦዳ፤ ‘ነ ግታተን ኔና ታን ኦናና ልኮ? 3 " ‘ኔን ሎኦ ዳሻ ኩዋይ ደእያ ሊባኖሳ ዝጋ ማላ። እ አዱቂደ ድጬዳ፤ አ ጼራይካ ሻርያ ጋኬዳ። 4 ሄዋን አ ድችያ ሃይ ደኤ፤ ጪሙዋፐ ከስያ ፑልቶቱካ እ ቶከቴዳ ሳኣን ዩሹዋን ኡባን ጎጊኖ፤ ሄ ፑልቶቱ ምይ ሞክያሳ ኡባ ጋኪደ ኡሺኖ። 5 ሄ ምይ ሃይ ዳሬዳ ድራዉ፥ ዎራን ደእያ ሀራ ም ኡባፐ ጌሳ አዱቄ፤ አ ዳሻቱካ ኦርደነ አዱሳ። 6 ሳሉዋ ካፎቱ ኡባይ አ ዳሻን ባረንቱ ጎልያ ኬጼድኖ፤ ባዙዋ ዶአቱካ አ ዳሻ ጋርሳን ማራ የሌድኖ፤ ዎልቃማ ካዉተቱ ኡባይ አ ኩዋን ኡቲኖ። 7 ሄ ምይ ባረ ግታተናነ ባረ ዳሻ አዱሳተና አያ ሎኢ! ባረ ጻጱዋካ ሃ ጪማዉ ዱገ የድ ዎዳ። 8 ሀራይ አቶ ጾሳ ጋናትያንካ ሄ ዝጋና ልከትያ ዝግ ባዋ፤ አዋ ማላ ዳሻይ ደእያ ጺዳይካ ባዋ፤ ሄዋ ማላ ቦእያ ምካ ባዋ። ጾሳ ጋናትያንካ ሄዋ ማላ ሎኦ ምይ ባዋ። 9 " ‘ታን አ ዳሮ ዳሻን ፑላንቻ ኦድ። ኤደነ ግያ ጾሳ ገነትያን ደእያ ምቱ ኡባይ አ ቃናቴድኖ። 10 " ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ሄ ምይ አዱቂደ ድጬዳ ድራዉ፥ አ ጼራይካ ሻርያ ጋኬዳ ድራዉነ እ ባረ ጌሳን ኦቶረቴዳ ድራዉ፥ 11 ታን አ አጋ አጋድ፤ ያታደ ዎልቃማ፥ አላጋ ካዉተዉ አደ እማድ። ሄ ካዉተይ አዉ አ ኢታተዳን ኦና። 12 መቀ ኢታ አላጋቱ ሄ ም ቃንጽ ኦላና፤ ቃንጼዳ ታሸቱ ደረቱዋን፥ ዎምባቱዋንነ ዛንጋራቱዋን ኦለት አታና። አ ኩዋን ኡትያ ሀራ ካዉተቱ ኡባይ ሄ ሳኣ አጊደ ባና። 13 ሳሉዋ ካፎቱ ዪደ ኩንዴዳ ም ቦላ ኡታና፤ ባዙዋ ዶአቱካ አ ታሸቱዋ የና። 14 ሃ ማታን ድጭያ ምቱ ግዶን አዋዳን አዱቂደ፥ ጼራይ ሻርያ ጋክያ ምይ ደኤና። ሀይቂያ አሳ ቦላ ጋክያ ሀይቁዋ ፕርዳይ ሄ ም ቦላ ጋካናዋ፤ ሄ ፕርዳይ እ ሀይቂደ፥ ዱፉዋን ገልያዋንቱና ስኦልያን ገላናሳ” ያጌ። 15 " ‘ኡባ ሞድያ መና ጎዳይ ሀዋዳን ያጌ፤ “ሄ ምይ ስኦልያን ገልያ ጋላስ ጪሙዋፐ ከስያ ፑልቶቱ አዉ ካዮታናዳን ታን ኦና፤ ሄ ፑልቶቱዋ ሃይ ጎገናዳን ታን ኦና፤ ሊባኖስካ አ ድራዉ ካዮታናዳን ኦና። ቃይ ዎራ ምይ ኡባይ ሹላና። 16 ታን ሄ ም ስኦልያን ኦልያ ዎደ፥ አ ኩንደ ኮሻን ካዉተይ ኡባይ ቃጻና። ኩንዲደ ስኦልያን ገሌዳ ኤደነ ምቱነ ሃ ኡሽያ ዶረቴዳነ ሎኦ ሊባኖሳ ምቱ ኡባይ አ ኩንደን ምነታና። 17 ካዉተቱዋ ግዶን አናና ማደቴዳነ አ ኩዋን ኡቴዳ ኡባይ ካሰ ማሻን ሀይቄዳዋንቱና ጋከታናዉ አናና እትፐ ስኦልያን ገላና። 18 ኤደነ ጋናትያ ግዶ ምቱዋንካ ሄዋ ኬሻ ግታይነ ሎኡ ባዋ፤ ሽን ሀእ ኤደነ ምቱዋዳን፥ እካ ሀይቂ ስኦልያን ገሌ፤ ሄዋን እ ማሻን ሀይቄዳ አማንቤናዋንቱ ኡባን ጋከታና። " ’ “ሄ ምይ ግብጼ ካትያነ አ አሳ ኡባ ሌምሶ። ታን ኡባ ሞድያ መና ጎዳይ ሀዋ ኦዳይ” ያጌ’ ያጋ” ያጊደ ዬዳ።