ዶመ 2

1 ሳሎቱነ ሳአይ ኡንቱንቱን ደእያዌ ኡባባይ ሀዋዳን መት ፖለቴዳ። 2 ጾሳይ ባረ ኦዳ ኦሱዋ ኡሱፑን ጋላስ ፖሊደ፥ ባረ ኦዳ ኦሱዋ ኡባፐ ላፑን ጋላስ ሸምፔዳ። 3 ቃይ ጾሳይ ላፑን ጋላሳ አንጄዳነ ጌሻ ኦዳ፤ አያዉ ጎፐ፥ ጾሳይ ባረ ኦያ ኦሱዋ ዉርሲደ ሸምፔዳዌ ሄ ጋላሳና። 4 ሳሉነ ሳአይ መቴዳዌ ሀዋዳና። መና ጎዳይ ጾሳይ ሳኣነ ሳሉዋነ መዳ ዎደ፥ 5 ሳኣ ቦላን ምይነ ማታይ ዶልቤና፤ ጫርሻይነ ጫርቤና፤ አያዉ ጎፐ፥ መና ጎዳይ ጾሳይ እራ ቡክስቤና፤ ቃይ ቢታ ኦያ አሳይካ ባዋ። 6 ግዶፐነ ሳኣፐ ሃይ ፑደ ከሲደ፥ ቢታ ኡባ እርጽሴ። 7 ሄዋፐ ጉየ፥ መና ጎዳይ ጾሳይ ቢታ ባናፐ እት አሳ መደ አ ሲያን ደኡዋ ሸምፑዋ ሸምፕ ገልሴዳ፤ ያትና ብታኒ ደኡዋን ደእያ አሳ ግዴዳ። 8 መና ጎዳይ ጾሳይ አዋይ ዶልያ ባጋና ኤደነ ግያ ሳኣን ገነትያ ቶኬዳ፤ ያን ባረ መዳ ብታንያ ዎዳ። 9 መና ጎዳይ ጾሳይ ጼላናዉ ሎእያ፥ ማናዉካ ማልእያ ኡባ ቆሞ ም ቢታፐ ዶልሴዳ። ገነትያ ግዱዋን ደኡዋ ምነ ሎኡዋነ ኢታ ኤርስያ ም ዎዳ። 10 ገነትያ ኡሽያ ሻፋ ሃይ ኤደነፐ ጎጌ። ኤደነፐ ከሴዳዋፐ ጉየ፥ ኦይዱ ሻፋ ከስ ሻከቴ። 11 ኮይሮ ሻፋ ሱንይ ፕሶና፤ ፕሶን ዎርቃይ ደእያ ኤዉላጻ ግያ ቢታ ኡባ ቦላን ጎጌ። 12 ሄ ቢታ ዎርቃይ ጌሻ ዎርቃ፤ ቃይ አልኦ ሽቱነ ሎይ ሎእያ ሹቻይ ያን ደኤ። 13 ላኤን ሻፋ ሱንይ ግዮና፤ ግዮን ቶጵያ ቢታ ኡባ ቦላን ጎጌ። 14 ሄዘን ሻፋ ሱንይ ጸግሮሳ፤ ጸግሮስ አሶረፐ አዋይ ዶልያ ባጋና ጎጌ። ቃይ ኦይደን ሻፋይ ኤፍራጺሳ። 15 ብታኒ ኤደነ ገነትያ ኦና ማላነ ናጋና ማላ፥ መና ጎዳይ ጾሳይ አ አፊደ ዎዳ። 16 መና ጎዳይ ጾሳይ ብታንያ፥ “ገነትያ ም ቴራ ኡባፐ ኔን ማና ጎፐ ማ፤ 17 ሽን ሎኡዋነ ኢታ ኤርስያ ም ቴራፐ ሞፓ፤ አያዉ ጎፐ፥ ኔን አፐ ሜዳ ጋላስ ቱሙ ሀይቃና” ያጊደ አዛዜዳ። 18 ሄዋፐ ጉየ መና ጎዳይ ጾሳይ፥ “ብታኒ ባረካ ደእያዌ ሎአ ግደና፤ ታን አዉ እንጀትያኖነ አ ማድያኖ መና” ያጌዳ። 19 መና ጎዳይ ጾሳይ መሄቱዋ ኡባ፥ ዶአቱዋ ኡባነ ሳሉዋ ካፎቱዋ ኡባ ቢታፐ መዳ፤ ቃይ ብታኒ ኡንቱንታ ዋግ ሱንነንቶነ በአናዉ አኮ አሄዳ፤ ብታኒ ደኡዋን ደእያ መታ ኡባ ሱንዳ ሱንይ ኡንቱንቱ ሱን ግዲደ አቴዳ። 20 ሄዋዳን ብታኒ መሄቱዋ ኡባ፥ ሳሉዋ ካፎቱዋነ ባዙዋ ዶአቱዋ ኡባ ሱንዳ፤ ሽን አዳማዉ እንጀትያነ አ ማድያዌ ቤትቤና። 21 ሄዋ ድራዉ መና ጎዳይ ጾሳይ ብታንያ ገምእሹዋ ካይሮዬዳ፤ እ ገምእሹዋ ካይሮት ደእሽን፥ አ ምይያ መቀፐ እቱዋ አኪደ፥ ሄ ሳኣ አሹዋ ኩንዳ። 22 መና ጎዳይ ጾሳይ ብታንያፐ አኬዳ መቀ ማጫውኖ ኦዳ፤ ያቲደ እዞ ብታንያኮ አሄዳ። 23 ያትና ብታኒ፥ “ሀያናሾ! ሀ መቀታ ታ መቀፐ፥ ሀ አሻታካ ታ አሹዋፐ አከቴዳውኖ፤ እዛካ አቱማ አሳፐ አከቴዳ ድራዉ፥ ማጫውኖ ጌተቱ” ያጌዳ። 24 ሄዋ ድራዉ አሳይ ባረ አዉዋነ ባረ አቶ አጊደ፥ ባረ ማቻትና እትፐ ደአና፤ ኡንቱንቱ ላኡ እት አሾ ግዳናዋንታ። 25 ብታኒነ አ ማቻታነ ላአቱካ ካሎ ጺራ ደእኖ፤ ሽን እቱ እቶ ዬላትክኖ።