ኢስያሳ 65

1 ጾሳይ ሀዋዳን ያጌ፤ “ታን ታና ኦችቤናዋንቶ ቆንጫድ፤ ቃይ ታና ኮይቤናዋንቶ ቤታድ። ታን ታ ሱን ጼስቤና ካዉተዉ፥ ‘ታ ሀዋና! ታ ሀዋና!’ ያጋደ ኮያድ። 2 ባረ ቆፋ ካሊድ፥ ሎኦ ግደና ኦግያን ሀመትያ ማካላንቻ አሳቱዋኮ ጋላሳ ኡባን ታ ኩሽያ ምጫድ። 3 ሀ አሳይ አታክልትያ ግዶን ያርሺደነ ጹብያ ቦላን እጻና ጩዋዪደ፥ ታን ጼልሽን፥ ታና ኡባ ዎደ ሀንቀኖ። 4 ቃይ ኡንቱንቱ ዱፉዋ ግዶን ኡትያዋንታ፤ ጌማ ሳኣን ቃማ አቅያዋንታ። ጉዱን አሹዋ ምያዋንታ፤ ኡንቱንቱ ጻሩዋን ቱና አሹዋ ጫባይ ደእያዋንታ። 5 ሄዋ ኦደ፥ ኡንቱንቱ ቃይ ሀራቱዋ፥ ‘ያን ህንተንቶ ደእተ፤ ኑን ህንተፐ ጌሻ ግድያ ድራዉ፥ ኑኮ ሺቆፕተ!’ ያጊኖ። ኡንቱንቱ ታ ሲ ግዶፐ ከስያ ጩዋነ ጋላሳ ኡባ ኤጽያ ታማ። 6 “በእተ፥ ታ ስንን ጻፈት ኡቴዳ፤ ታን ኡንቱንቶ ዛራናፐ አትና፥ ጮኡ ጊከ፤ ኡንቱንታ ሙራናዉ ቃቻድ። 7 ኤ፥ ታን ኡንቱንቱ ባይዙዋነ ኡንቱንቱ አዎቱዋ ባይዙዋ አጩዋ እትፐ ኡንቱንቶ ዛራና። አያዉ ጎፐ፥ ኡንቱንቱ ደርያ ቦላን እጻና ጩዋዬድኖ፤ ቃይ ዞዘቱዋ ቦላን ታና ቦሬድኖ። ኡንቱንቱ ካሰ ኦዳ ኦሱዋ አጩዋ ታን ኡንቱንቶ ዛራና” ያጌ መና ጎዳይ። 8 መና ጎዳይ ሀዋዳን ያጌ፤ “ዎይንያ አይፊ ዎይንያ ቱራን ደእያ ዎደ አሳይ፥ ‘አ ግዶን አንጁ ደእያ ድራዉ፥ አ ይሶፕተ’ ግያዋዳን፥ ታን ታ ቆማቱ ድራዉ፥ ሄዋዳን ኦና፤ ታን ኡንቱንቱ ኡባ ይስከ። 9 ታን ያቆባፐ ዘረ፥ ይሁዳፐካ ታ ደረቱዋ ላትያዋንታ ከሳና፤ ታን ዶሬዳዋንቱ አ ላታና፤ ታ ቆማቱካ ያን ደአና። 10 ታና ኮዬዶ ታ አሳዉ ሳሮና ግያ ደምባይ ዶርሳ ዉድያ ሄምያ ሳ ግዳናዋ፤ ቃይ አኮራ ዎምባይ ሚዛ ዉድያ አላጽስያ ሳ ግዳናዋ። 11 “ሽን ህንተኖ፥ መና ጎዳ አጌዳዋንቶ፥ ታ ጌሻ ደርያ ዶጌዳዋንቶ፥ ካጫ ግያ ኤቃዉ ማዳ ጊግሴዳዋንቶ፥ ቃይ ህንተ ዉርሰ ኤራናዉ፥ ሳማ ግያ ኤቃዉ ዋላካ ዎይንያ ኤሳ ዋንጫን ኩንዳዋንቶ፥ 12 ታን ህንተ ዉርሰ ማሻዉ አደ እማና፤ ህንተ ኡባይካ ጎራኤታናዉ ሆካና። አያዉ ጎፐ፥ ታን ህንተና ጼስና ኮይበይክታ፤ ሃሳዪደ ስስበይክታ” ያጌ። ህንተ ታ ስንን ኢታባ ኦድታ፤ ታን ዶሰናባካ ዶሬድታ። 13 ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “በእተ፥ ታ ቆማቱ ማና፤ ሽን ህንተ ኮሻታና። ታ ቆማቱ ኡሻና፤ ሽን ህንተ ሳመታና። ታ ቆማቱ ናሸታና፤ ሽን ህንተ ዬላታና። 14 በእተ፥ ታ ቆማቱ ዎዛናን ናሸቲደ የጻና፤ ሽን ህንተ ዎዛናን ካዮቲደ ዋሳና። ቃይ ህንተ አያናይ መኤዳ ድራዉ፥ ህንተ ዝላሊደ ዬካና። 15 ህንተ ህንተ ሱን ታ ዶረቴዳዋንቶ ሸቃዉ እማና። ኡባ ሞድያ መና ጎዳይ ህንተና ዎና፤ ሽን እ ባረ ቆማቱዋ ዱማ ሱንን ጼሳና። 16 ሄ ጋድያን አንጁዋ ኮይያ ኡባይ ቱማተ ጾሳይ አንጃናዳን ዎሳና። ሄ ጋድያን ጫቁዋ ጫቂያ ኡባይካ ቱማተ ጾሳን ጫቃና፤ አያዉ ጎፐ፥ ካሰ መቶቱ ዶገቴድኖ፤ ታ አይፍያ ስንፐካ ጌሜድኖ” ያጌ። 17 ጾሳይ ሀዋዳን ያጌ፤ “በእተ፥ ታን ኦራ ሳሎቱዋነ ኦራ ሳኣ መይ፤ ካሰባይ ኡባይ ሀሳየተናነ ቆፈተና። 18 ሽን ታን መያባን መናዉ ናሸትተነ ሀሹ ጊተ። አያዉ ጎፐ፥ ታን መዳ የሩሳላማ ናሸቻን ኩሜዳኖ ግዳና፤ የሩሳላመ አስካ ሀሹተነ ግያዋ ግዳና። 19 ታን የሩሳላመን ናሸታና፤ ታ አሳንካ ሀሹ ጋና። ሀዋፐ ስንናዉ ዬክያዋ ኮሻይነ ኡንኤቲደ ዋስያዋ ኮሻይ ያን ስሰተና። 20 “የሩሳላመ ግዶን ሀዋፐ ስንናዉ፥ ጉ ዎደ ጻላላ ደኢደ ሀይቂያ ቄር ናእ፥ ዎይ ባረ ላይ ዉርሰናን ሀይቂያ ጭማ አሳይ ደኤና። ጼቱ ላይና ሀይቂያ ኡራይ ዳሮ ያላጋን ሀይቄዳ ጌተታና፤ ጼቱ ላይ ጋናን ሀይቂያዌ ሼቀቴዳዋዳን ፓይደታና። 21 ሄ ዎደቱዋን አሳቱ ጎለቱዋ ኬጺደ፥ ኡንቱንቱን ደአና፤ ዎይንያ ቱራቱዋካ ቶኪደ፥ ኡንቱንቱ አይፍያ ማና። 22 ኡንቱንቱ ኬጽና፥ ሀራይ ደኤና፤ ሀራይ ማናዉ ቶክያዋ ቶክክኖ። ታ አሳ ላይይ ም ላይዳን አዱቃና፤ ቃይ ታን ዶሬዳዋንቱ ባረንቱ አዱሳ ዎድያዉ ባረንቱ ኩሽያ ኦሱዋን ናሸታና። 23 ኡንቱንቱ ጮ ዳቡርክኖ፤ ዎይ ናናቱዋ ቦሻዉ የልክኖ፤ አያዉ ጎፐ፥ ኡንቱንቱ ባረንቱ ናናቱዋናካ መና ጎዳን አንጀቴዳ ዘረ ግዳናዋ። 24 ኡንቱንቱ ታና ጼሳናፐ ካሰታደ ታን ኡንቱንቶ ኮያና፤ ቃይ ኡንቱንቱ ብሮ ሃሳይሽን፥ ታን ኡንቱንታ ስሳና። 25 ኦኮሩነ ዶርሳ ማራይ እትፐ ሄመታና፤ ጋሙካ ቦራዳን፥ ኡቱላ ማና። ቃይ ሾሻዉ ባናይ ቁማ ግዳናዋ። ሄ ዎደቱዋን ታ ጌሻ ደርያን ኡባን፥ ኡንቱንቱ ቆሄትክኖነ ባይክኖ። ታን መና ጎዳይ ሀዋ ኦዳይ” ያጌ።