ኤርማሳ 50

1 ባብሎነ ቢታነ ባብሎነ አሳ ጼልያዋን ትምቢትያ ኦድያ ኤርማሳ ባጋና መና ጎዳይ ኦዴዳ ቃላይ ሀዋ: 2 “ካዉተቱዋ ግዶን ኦድተነ አዋይተ። ባንድራ ቁ ኦ ኦይቂደ፥ አያነ ቆሰናን፥ ሀዋዳን ያጊደ ኦድተ፤ ‘ባብሎነ ኩንዴዳ! ቤላነ ማርዱካ ጌተትያ አ ጾሳቱካ ዬላቴድኖነ መኤረቴድኖ። ቃይ አ ምስለቱነ አ ኤቃቱ መኤረቴድኖ። 3 ሁጲሳ ባጋ ቢታፐ እት ካዉተይ ያና፤ ባብሎነ ቢታ ባይዛና። ያቶፐ አሳይካ መሂካ ኡባይ ባቃታና፤ ኦንነ ያን ደኤና’ ያግተ” ያጌዳ። 4 መና ጎዳይ ሀዋዳን ያጌ፤ “ሄ ዎድያንነ ሄ ጋላሳቱዋን እስራኤልያ አሳይነ ይሁዳ አሳይ እትፐ ግዲደ፥ ዬኪደ ያና፤ መና ጎዳ ባረንቱ ጾሳ ኮያና። 5 ኡንቱንቱ ጽዮነ አፍያ ኦግያ ኦቺደ፥ ባረንቱ ስን ያ ዛሪደ፥ ‘ሃይተ!’ ኑን ኡባካ ዶገተና መና ጫቁዋ መና ጎዳና አነ ጫቀቴቶ ያጋና። 6 “ታ አሳይ ባዬዳ ዶርሳቱዋ ማላ ግዴዳ፤ ኡንቱንቱ ሄንንቻቱ ኡንቱንታ ባለደ፥ ደርያን ዎራ የዴድኖ። እት ሳፐ ሀራ ደርያ ቶይላካቲደ፥ ባረንቱ አቅያ ሳኣ ዶጌድኖ። 7 ደሜዳ ኡባይ ኡንቱንታ ሻንካቴዳ። ኡንቱንቱ ሞርከቱ፥ ‘ኑን አይነ ባይዝበይኮ፤ ሀዌ መቱ ኡባይ ኡንቱንታ ጋኬዳዌ፥ ኡንቱንቱ መና ጎዳ፥ ባረንቱ ሸምፑዋ ሳኣ፥ መና ጎዳ ባረንቱ ማይዛ አዎቱዋ ህዶታ ናቄዳ ግሻሳ’ ያጌድኖ። 8 “ህንተኖ፥ እስራኤልያ አሳቶ፥ ሀእ ስም ባብሎነ አሳ ግዶፐ ከሲደ ባቃትተ! ባብሎናቱዋ ቢታፐ ቢተ! ያቲደ ዉድያ ካለያ ዴሻ ኦርግያ ማላ ግድተ። 9 አያዉ ጎፐ፥ ታን ሁጲሳ ባጋ ቢታፐ ዎልቃማ ዎልቃማ ካዉተቱዋ ጭታቱዋ ደንደ፥ ባብሎነ ቦላ አሃደ ደአይ። ኡንቱንቱ አ ኦሊደካ ኦይቃና፤ ኡንቱንቱ ዎንዳፊ ዱኪደ የዴዳ ሂላንቻ ኦላንቻ ማላ። 10 ባብሎነ ቢታይ ቦንቀታና፤ አ ቦንቂያ ኡባይ ካላና። ታን መና ጎዳይ ሀዋ ኦዳይ። 11 “ህንተኖ፥ ባብሎነ አሳቶ፥ ታ አሳ ቦንቂያዋንቶ፥ ህንተ ናሸቲደ፥ ፖጩ ጌድታ። ቆሩዋ ካሌዳ ኡሳቲዳን፥ ህንተ ጲጽሌድታ፤ ዎታራ ፓራዳን ጫጌድታ። 12 ሽን ሀእ ህንተ ዋና ካታማይ ዬላታናነ ካዉሻና። ቃይ ካዉተቱዋ ግዶንካ ባብሎነ ኡባፐ ዉርሰ ግዳናዋ፤ ሃ ባይና መላ ቢታ ግዳናዋ። 13 መና ጎዳ ሀንቁዋ ጋሱዋን፥ ባብሎነ አሳይ ደኤናሳ ግዳናዋ፤ እ ኡባና ኮለተና። አ ላንቂያና አያ ኡባይ አ ቦላን ጋኬዳ ቦሻ በኢደ፥ ዳጋማናነ፥ ‘ፖራ!’ ጋና። 14 “ህንተኖ፥ ዎንዳፍያ ዱክያዋንቶ፥ ባብሎነ ኦላናዉ አ ዩሹዋን ሳልፕተ፤ እ መና ጎዳ ቦላን ናጋራ ኦዳ ድራዉ፥ ህንተ ፖቱዋን ኡባን አ ዱክተ። 15 ኡባ ባጋናካ ባብሎነ ቦላን ኦላ ዋሱዋ ዋስተ! ባብሎነ ኩሽያ እሜዳ፤ አ አዱሳ ግምበቱ ኩንዴድኖ፤ አ ግምቢያ ድርሳይካ ኮለቴዳ። መና ጎዳይ አ ቦላን ሀሉዋ ከሲደ ደእያ ድራዉ፥ ህንተካ አ ቦላን ሀሉዋ ከስተ! እ ሀራቱ ቦላን ኦዳዋ ህንተካ አ ቦላን ኦተ! 16 ዘረ ዘርያዋነ ጫካ ዎደ ሺሻናዉ ከስያዋ ኡባ ባብሎነፐ ይስተ። ኡንኤያዋንቱ ማሻዉ ያዬዳ ድራዉ፥ ሄ ቢታን ደእያ አሳይ ኡባይ ባረ ያራኮ ያራኮ ስሚደ፥ ባረ ቢታ ቢታ ባቃታና። 17 “እስራኤሊ ጋሙ የደርሲደ ላሌዳ ዶርሳ ማላ። ኮይሮ አሶረ ካቲ አ አሹዋ ሜዳ፤ ዉርሰን ቃይ ባብሎነ ካቲ ናቡካዳናጾር አ መቀ ጌዳ። 18 ሄዋ ድራዉ፥ ኡባፐ ዎልቃማ መና ጎዳይ፥ እስራኤልያ ጾሳይ፥ ታን ሀዋ ኦዳይ: አሶረ ካትያ ታን ሙረዳዋዳን፥ ባብሎነ ካትያካ አ ቢታካ ሙራና። 19 ሽን እስራኤልያ እ ሄመትያ ሳኣ ዛራና፤ ቃርመሎሳነ ባሳነ ደረቱዋን እ ሄመታና። ቃይ ኡንቱንቱ ኤፍሬማ ገዝያንነ ጋላኣደ ገዝያን ካሊደ ማና። 20 ሄ ዎድያንነ ሄ ጋላሳቱዋን አሳይ እስራኤልያን ባይዙዋ ኮያና፤ ሽን ባይዙ ያና፤ ይሁዳን ናጋራ ኮያና፤ ሽን ቤተና። አያዉ ጎፐ፥ ሀይቁዋፐ ታን አሼዳ እስራኤልያ አሳ አቴዳዋንቱ ናጋራ ታን አቶ ያጋና። ታን መና ጎዳይ ሀዋ ኦዳይ” ያጌ። 21 ቃይካ መና ጎዳይ ሀዋዳን ያጌ፤ “ምራታይማ ቢታነ ፕቆዳ ቢታን ደእያ አሳ ቦላን ደንድተ፤ ኡንቱንታ ኦልተ፥ ዎተነ ኡንቱንታ ሙለ ይስተ። ታን ህንተና አዛዜዳዋዳን ኡባባ ኦተ። 22 ሄ ቢታን ኦላ ዋሱ ስሰቴ፤ ዎልቃማ ባሻይካ ጋኬዳ። 23 ቢታ ሳኣ ኡባ ሊቅስያ ድጅኑ አይ መኡዋ መኤዴ! አይባ ሊቁዋ ሊቄዴ! ካዉተቱዋ ኡባ ግዶን ባብሎነ አይባ ዳጋንያባ ግዴዴ! 24 ኔኖ፥ ባብሎነ፥ ታን ኔና ኦይቃናዉ ጲርያ ዎድ፤ ኔን ኤረናን ደኣደ ገላደ ኦይቀታዳ። ኔን ታናና፥ መና ጎዳና ጋዳቴዳ ድራዉ ኦይቀታዳ። 25 ታን መና ጎዳይ ታ ኦላ ሚሻ ዎያ ጎልያ ዶያድ፤ ታ ሀንቁዋ ኦላ ሚሻ አፐ ከሳድ። አያዉ ጎፐ፥ ታን ጎዳይ፥ ኡባፐ ዎልቃማ መና ጎዳይ ባብሎነ ቢታን ኦያ ኦሱ ደኤ። 26 ያና ሃና አ ቦላ ዶድተ! ካይ ደእያ አ ጎታራቱዋ ፖግተ፤ ኦሞዱዋካ ካዳን እት ዲራን ጉፕተ! አያነ አሸናን ዉርስ ይስተ! 27 ቦራቱዋ ሹክያዋዳን፥ ኡንቱንቱ ኦላንቻቱዋ ሲፍተ! ባብሎነ አሳዉ አየ አና! አያዉ ጎፐ፥ ኡንቱንቱ ጋላሳይ፥ ኡንቱንቱ ሙረትያ ዎዲ ጋኬዳ። 28 “ኦሞደቴዳ አሳቱ ባብሎነፐ ከስ አኪደ፥ የሩሳላመ ባቃታና። ባብሎነ ቢታ አሳይ ጌሻ ጎልያ ቦላን ኦዳባዉ መና ጎዳይ ኡንቱንቱ ጾሳይ ሀሉዋ ከስያዋ ኡንቱንቱ ጽዮነን ሃሳያና። 29 “ባብሎነ ኦላናዉ ዎንዳፍያ ዱክያዋንታ ኡባ ጼግተ፤ እቱነ ከስ አከናዳን፥ ኡንቱንቱ አ ዩሹዋን ዶድኖ። መና ጎዳ ቦላ፥ እስራኤልያ ጌሻ ቦላ፥ እ ኦቶረቴዳ ድራዉ፥ አዉ አ ኦሱዋዳን ዛርተ። እ ሀራቱ ቦላን ኦዳዋዳን፥ አ ቦላንካ ኦተ። 30 ሄዋ ድራዉ፥ አ ያላጋ አቱማ አሳቱ ካታማ ግዶ ኦግያን ሀይቃና፤ ሄ ጋላስ አ ኦላንቻቱ ኡባይ ያና። ታን መና ጎዳይ ሀዋ ኦዳይ” ያጌ። 31 ጎዳይ፥ ኡባፐ ዎልቃማ መና ጎዳይ ሀዋዳን ያጌ፤ “ኔኖ፥ ኦቶራንቻዉ፥ ታን ነ ቦላ ደንዳድ። አያዉ ጎፐ፥ ነ ጋላሳይ፥ ኔን ሙረትያ ዎዲ ጋኬዳ። 32 ኦቶራንቻይ በቲደ ኩንዳና፤ አ ፑደ ደንያዌካ ደኤና። ታን አ ካታማቱዋ ግዶን ታማ ኤና፤ ሄ ታማይ ዩሹዋን ደእያ ኡባ ም ድጋና” ያጌ። 33 ኡባፐ ዎልቃማ መና ጎዳይ ሀዋዳን ያጌ፤ “እስራኤልያ አሳይነ ይሁዳ አሳይ እትፐ ናቀቴዳ። ኡንቱንታ ኦሞዲደ አፌዳዋንቱ ኡንቱንታ ዎልቃፐ ምንስ ኦይቄድኖ፤ የደናን ድጌድኖ። 34 ሽን ኡንቱንታ ዎዝያዌ ምና፤ አ ሱንይካ ኡባፐ ዎልቃማ ጾሳ። እ ኡንቱንቱ ቢታዉ ሸምፑዋ እማናዉ፥ ኡንቱንቱ ድራዉ ሞተቴ። ሽን ባብሎነ ቢታን ደእያዋንቱ ሻቢርሳ እማና። 35 “ባብሎነ አሳይነ ባብሎነ ቢታን ደእያዋንቱ ማሻን ሀይቂኖ! “አ ካፓቱነ አ አዳ ኤራንቻቱ ማሻን ሀይቂኖ! ታን መና ጎዳይ ሀዋ ኦዳይ። 36 “አ ዎርዱዋ ትምቢትያ ኦድያዋንቱ፥ ኤያቱ ማሻን ሀይቂኖ! “አ ዎልቃማ ኦላንቻቱ፥ ዳጋሜዳዋንቱ ማሻን ሀይቂኖ! 37 “አ ፓራቱዋ ቦላነ አ ፓራቱዋ ጋረቱዋ ቦላ፥ ቃይ ማጫ አሳ ማላ ግዴዳ አ አላጋ ኦላንቻቱዋ ቦላ ማሻይ ዮ! “አ ዱረታ ምንጅያ ጎልያ ቦላ ማሻይ ዮ! ያቶፐ አ ዱረታይ ኡባይ ቦንቀታና። 38 “አ ቦላ ኮሻይ ዮ! ያቶፐ አ ሃይ መላና። አያዉ ጎፐ፥ ባብሎነ ቢታይ ኤቃ ምስለቱ ኩሜዳ ቢታ፤ ሄ ምስለቱ አሳ ዳጋንኖነ ኤያይኖ። 39 “ሄዋ ድራዉ፥ ባብሎነ ባዞ ዶአቱነ ዎራካናቱ ደእያ ሳኣ ግዳናዋ፤ ቃይ ሶጎነቱካ አን ደአና። አን መናዉካ አሳይ ደኤና፤ የለታ ኡባንካ አሳይ አን ኡተና። 40 ጾሳይ በን ሶዶማነ ጋሞራ ኡንቱንቱ ዩሹዋን ደእያ ካታማቱዋና እትፐ ይሴዳዋዳን፥ ባብሎነን ኦንነ ደኤና፤ አሳይ ኡባካ ያን ኡተና። ታን መና ጎዳይ ሀዋ ኦዳይ። 41 “በእተ፥ አሳይ ሁጲሳ ባጋ ቢታፐ ዬ፤ ምኖ ካዉተቱነ ዳሮ ካተቱ ሳኣ ጋጻፐ ያናዉ ደንዲኖ። 42 ኡንቱንቱ ባረንቱ ዎንዳፍያነ ቶራ ኦይቄድኖ፤ ኡንቱንቱ መቀ ኢታነ የድ ማረና አሳ። ኡንቱንቱ ባረንቱ ፓራ ቶጊደ ብያ ዎደ፥ ቤታይ ሾጭያ አባ ጉንዳን ሀኔ። ኔኖ፥ ባብሎነ፥ ኡንቱንቱ ኡባይካ ኦላዉ ጊጌዳ አሳ ግዲደ፥ ነ ቦላን ሳልፔድኖ። 43 “ባብሎነ ካቲ ኡንቱንቱ ኦዱዋ ስሴዳ፤ አ ኩሺ ዳቡሪደ፥ ህልስ ጌዳ፤ ኦይይ ኦይቄዳ ምሽራቲዳን፥ ኡንኡ አ ኦይቄዳ። 44 “ዮርዳኖሳ ሻፋ ላንቂያን ደእያ ዎራፐ ሎኦ ቆሩ ደኢያሳ ቆፐናን ከስያ ጋሙዋዳን፥ ታን ያደ፥ ባብሎነ አሳ ኡንቱንቱ ቢታፐ የደርሳና። ሄዋፐ ጉይያን፥ ታ ዶሬዳ አሳ አ ቦላን ሱንና። አያዉ ጎፐ፥ ታ ማል ባዋ፤ ታን ኦና ጌዳዋካ ተአናዉ ዳንዳይያ አሳይ ባዋ። አይ ሄንንቻይ ታናና ኤቀታናዉ ዳንዳዪ? 45 ሄዋ ድራዉ፥ ታን መና ጎዳይ ባብሎነ አሳ ቦላንነ ባብሎነ ቢታ ቦላን ሀልቼዳዋነ ቆፔዳዋ ስስተ! ኡንቱንቱ ናናቱዋ ዎልቃን ጎቺደ አፋና፤ ሄዋ ጋሱዋን ኡንቱንቱ ሶ አሳይ ኡባይ ዳጋማና። 46 ባብሎነ ኩንደ ጊረይ ቢታ ቃና፤ ባብሎናቱዋ ዋሱካ ካዉተቱዋ ኡባን ስሰታና” ያጌ።