ኢዮባ 22

1 ሄዋፐ ጉይያን፥ ተማና ቢታፐ ዬዳ ኤልፋዝ ሀዋዳን ያጊደ ዛሬዳ፤ 2 “አሳይ ጾሳ ጎአናዉ ዳንዳዪ? ሀራይ አቶ አዳ ኤራንቻ ግድንቶካ፥ እ ባረና ጎአናፐ አትና፥ ጾሳ ጎኤና። 3 ኔን ጽሉዋ ግዶፐ፥ ሄዌ ኡባ ዳንዳይያ ጾሳ ናሸቺ? ነ ኦጊ ቶሺ ባይናዋ ግዶፐ፥ ሄዋን እ አያ ዎያ ደሜዴ? 4 “ኔን አ ቦንችያ ድራዉ፥ እ ኔና ሴሪነ ፕርዲ? 5 ነ ኢታተይ ዳራ ግደኔ? ነ ናጋራዉ ዛዋይ ባዋ። 6 ኔን ነ እሻቱዋ ጋሱ ባይናን ዋስያ ጼስሳዳ፤ አሳ ማዩዋካ ቃራደ ኡንቱንታ ካሎ አሻዳ። 7 ኔን ሳመቴዳዋንታ ሃ ኡሻባካ፤ ኮሻቴዳዋንታካ ቁማ ድጋዳ። 8 ኔን ነ ዎልቃንነ ነ ማታን ዘምፓደ፥ ሀራ አሳ ቢታ ነዉ ጮ አካዳ። 9 አምኤቱዋ መላ ኩሽያ የዳዳ፤ አዉ ባይናዋንታካ ኡቁናዳ። 10 ነ ዩሹዋን ግቲ ዶድ ኡቴዳዌ፤ አኬከናን ያሻይ ኔና ኮኮርስያዌካ ሄዋሳ። 11 ኔን በኤናዳን፥ ነዉ ምያዌ፤ ቃይ ኩን ሃይ ኔና ሙክያዌካ ሄዋሳ። 12 “ጾሳይ ቦላ ቃ ሳሉዋን ኡቲደ፥ ቃን ደእያ ጾልንተቱዋ ዱገ ጼሌ። 13 ሽን ኔን፥ ‘ጾሳይ አያ ኤሪ? እ ሄዋ ማላ፥ ጵ ጎ ማ ግዱዋናካ ፕርዳናዉ ዳንዳዪ? 14 ሳሉዋነ ሳኣ ዳንዋ ቦላ እ ስመረትያ ዎደ፥ እ በኤናዳን፥ ስኬዳ ሻሪ አ ጎዜ’ ያጋሳ። 15 “ናጋራንቻቱ ሀመቴዳ በን ኦግያን ባናዉ ቆፋ ቃቻዲ? 16 ኡንቱንቱ ባረንቱ ዎዲ ጋከናን ደእሺና ሀይቄድኖ፤ ኡንቱንቱ ደኡዋ ባሱካ ድኡዋን ሜጨት ዬዳ። 17 ኡንቱንቱ ጾሳ፥ ‘ኑፐ ሃካ! ኡባ ዳንዳይያ ጾሳይ ኑዉ አያ ኦናዉ ዳንዳዪ?’ ያጌድኖ። 18 ግዶፐነ፥ ኡንቱንቱ ጎልያን ሎኦባ ኩንዳዌ ጾሳ። ሄዋ ድራዉ፥ ኢታ አሳቱዋ ቆፋይ ታዉ ገለና። 19 “ኢታ አሳቱዋ ቦላ ጋክያዋ በኢደ፥ ጽሎቱ ናሸቲኖ፤ ሱረ አሳቱካ ሀዋዳን ያጊደ፥ ኡንቱንቱ ቦላ ቅሊጪኖ፤ 20 ‘ቱሙዋፐ ኑ ሞርከቱ ዬድኖ፤ ኡንቱንቱ ዱረተካ ታማይ ሜዳ’። 21 “ኢዮባ፥ ሀእካ ጾሳዉ ሞደታ፤ አናና ሳሮ ደአ። ያቶፐ፥ ኔን አንጀታና። 22 አ ዶናፐ ትምርትያ አካ፤ አ ቃላቱዋካ ነ ዎዛናን ዎ። 23 ኔናተ ሆክሳደ፥ ኡባ ዳንዳይያ ጾሳኮ፥ ኔን ስሞፐ፤ ኢታ ኦሱዋ ኡባ ነ ሶፐ ድጎፐ፤ 24 ነ ዎርቃ ሳኣን ኦሎፐ፤ ነ በርተ ዎርቃካ ሻፋ ሹቻን ኦሎፐ፤ 25 ኡባ ዳንዳይያ ጾሳይ ነዉ ዎርቃነ ዶረቴዳ ብራ ግዳናዋ። 26 “ሄዋፐ ጉይያን፥ ኔን ኡባ ዳንዳይያ ጾሳን ቱሙ ናሸታና፤ ዬላተናን ጾሳኮ ፑደ ጼላና። 27 ኔን ጾሳ ዎሳና፤ እ ስሳና፤ ቃይ ኔን ነ ቃንግያ አዉ ጋና። 28 ኔን ዞረታደ ቃቼዳዌ ነዉ ፖለታና፤ ነ ሀመትያ ኦግያንካ ፖኡ ፖአና። 29 አያዉ ጎፐ፥ ጾሳይ ኦቶረትያዋንታ ካዉሼ፤ ሽን ባረንታ ሆክስያዋንታ አሼ። 30 እ ሱረ አሳ ዎ አኬ። ነ ኩሺ ናቁዋፐ ጌሻ ግዶፐ፥ እ ኔና አሻና” ያጌዳ።