ኢያሳ 24

1 ሄዋፐ ጉይያን ኢያሱ እስራኤልያ ዛራቱዋ ኡባ ሰኬማ ጌተትያ ካታማን ሺሼዳ። ጭማቱዋ፥ ካፓቱዋ፥ ዳናቱዋነ ኦላ ጋዳዋቱዋ ኡባ ጼስና ኡንቱንቱ ጾሳ ስንን ሺቄድኖ። 2 ኢያሱ አሳዉ ኡባዉ ሀዋዳን ያጌዳ፤ “መና ጎዳይ እስራኤልያ ጾሳይ ሀዋዳን ያጌ፤ ‘በን ህንተንቱ አዎቱ ኤፍራጺሳ ሻፋፐ ሄፍንን ደኤድኖ፤ ኡንቱንቱ ሀራ ጾሳቶ ኦድኖ። ኡንቱንቱፐ እቱ አብራሃማነ ናኮራ አዉዋ ታራ። 3 ሄዋፐ ጉይያን ህንተንቱ አዉዋ አብራሃማ፥ ሄ ሻፋፐ ሄፍንን ደእያ ጋድያፐ ጼሳደ፥ ካናነ ቢታ ኡባን ካለድ። አ ዛርያካ ጮራያድ፤ ይሳቃካ አዉ እማድ። 4 ይሳቃዉካ ያቆባነ ኤሳ እማድ። ኤሳዉ ኤዶማ ገዝያ ላታናዳን እማድ፤ ሽን ያቆብነ አ ናናይ ዱገ ግብጼ ቤድኖ። 5 " ‘ጉየፐ ሙሳነ አሮና ኪታደ ታን ያን ኦዳዋን ግብጼ ጋድያ አሳ ቦሻን ሾጫድ፤ ሄዋፐ ጉይያን ህንተንታ ከሳድ። 6 ታን ህንተንቱ አዎቱዋ ግብጼፐ ከስና፥ ዞኦ አባኮ ዬድታ፤ ግብጼቱ ህንተንቱ አዎቱዋ ፓራቱ ጎችያ ጋረቱዋንነ ፓራዋቱዋን የደርሴድኖ። 7 ኡንቱንቱ መና ጎዳዉ ዋሴዳ ዎደ፥ ኡንቱንቱፐነ ግብጼቱዋፐ ግዱዋን ማ የጋድ፤ ያታደ፥ አባይ ኡንቱንቱ ቦላ ስማናዳንነ ኡንቱንቱ ሙካናዳን ኦድ። ታን ግብጼቱዋ ቦላ ኦዳዋ ህንተንቱ ህንተንቱ አይፍያን በኤድታ። ህንተካ ዎራን ዳሮ ዎድያ ደኤድታ። 8 " ‘ሄዋፐ ጉይያን ዮርዳኖሳ ሻፋፐ አዋይ ዶልያ ባጋና ደእያ አሞራዋናቱዋ ጋድያ ታን ህንተንታ አሃድ። ኡንቱንቱ ህንተናና ኦለትና፥ ታን ኡንቱንታ ህንተንቱ ኩሽያን አደ እማድ፤ ህንተንቱ ጋድያ ላቴድታ። ቃይ ታን ኡንቱንታ ህንተንቱ ስንፐ ይሳድ። 9 ሄዋፐ ጉይያን ጽፖራ ናአይ ባላቅ፥ ሞኣበ ጋድያ ካቲ ደንዲደ፥ እስራኤላቱዋና ኦለቴዳ። ባኦራ ናአይ ባላም ህንተንታ ሸቃናዳን፥ ኪቲደ ጼስሴዳ፤ 10 ሽን ታን ባላመባ ስሳበይከ። ሄዋ ድራዉ እ ህንተንታ አንጄዳ፤ ያትና፥ ታን ህንተንታ ባላቃ ኩሽያፐ አሻድ። 11 " ‘ዮርዳኖሳ ሻፋ ፕኒደ፥ ያርኮ ዬድታ፤ ያርኮ አሳይነ አሞራዋናቱ፥ ፓርዛዋናቱ፥ ካናነቱ፥ ሂተቱ፥ ገርጌሰቱ፥ ሂዌቱነ ያቡሳዋናቱ ህንተናና ኦለትና፥ ታን ኡንቱንታ ህንተንቱ ኩሽያን አደ እማድ። 12 ካጅያ ህንተፐ ስንዉ ኪታደ፥ አሞራዋናቱዋ ካተቱዋ ላአቱዋ ህንተንቱ ስንፐ ከሳድ። ሀዌ ኡባይ ሀናናዉ ዳንዳዬዳዌ፥ ህንተንቱ ማሻንነ ህንተንቱ ዎንዳፍያን ግደና። 13 ህንተንቱ ጎሺደ ከስቤና ጋድያነ ህንተንቱ ኬጽቤና ካታማቱዋ ታን ህንተንቶ እምና፥ አን ደኢታ። ሀእ ህንተንቱ ቶክቤና ዎይንያ ቱራ አይፍያነ ዎጋራ አይፍያ ሚታ’ ያጌ። 14 “ሄዋ ድራዉ ሀእካ መና ጎዳዉ ያይተ፤ ቱሙ ዎዛናፐ አማነቲደ አዉ ጎይንተ። ህንተንቱ ማይዛ አዎቱ ኤፍራጺሳ ሻፋፐ ሄፍንንነ ግብጼን ጎይኔዳ አላጋ ጾሳቱዋ ዎራ ኦሊደ፥ መና ጎዳዉ ጎይንተ። 15 መና ጎዳዉ ጎይንያዌ ህንተንታ ኢቶፐ፥ ህንተንቱ አዎቱ ሻፋፐ ሄፍንን ደኢደ ጎይኔዳ ጾሳቱዋ ግድና፥ ዎይ ሀእ ህንተንቱ ደእያ አሞረ ጋድያ አሳ ጾሳቱዋ ግድና፥ ህንተንቱ ጎይንያዋ ሀቼ ዶርተ። ሽን ታናነ ታ ጎልያ አሳ ግዶፐ፥ ኑን መና ጎዳዉ ጎይናና” ያጌዳ። 16 አሳይ ዛሪደ፥ “መና ጎዳ አግ ባሺደ፥ ሀራ ጾሳቶ ጎይናናዌ ኑፐ ሃኮ! 17 ግብጼ ጋድያፐ፥ አይለተ ጎልያፐ፥ ኑናነ ኑ አዎቱዋ ከሲደ አሄዳዌ፥ ሄ ዎልቃማ ማላታቱዋ ኑ ጼልሽን ኦዳዌ፥ ኑን ቤዳ ኦግያ ኡባንነ አዳ ቢታቱዋ ኡባ ግዱዋን ኑና ናጌዳዌ፥ መና ጎዳ ኑ ጾሳተነ። 18 ቃይ መና ጎዳይ አሳ ኡባ፥ ሄ ጋድያን ደእያ አሞረ አሳቱዋናካ ኑ ስንፐ ላጊደ ከሴዳ። ሄዋ ድራዉ ኑንካ መና ጎዳዉ ጎይናና፤ አያዉ ጎፐ፥ እ ኑ ጾሳ” ያጌዳ። 19 ሽን ኢያሱ አሳ ሀዋዳን ያጌዳ፤ “ህንተንቱ መና ጎዳዉ ጎይናናዉ ዳንዳይክታ። አያዉ ጎፐ፥ እ ጌሻ ጾሳ፤ እ ቃናትያ ጾሳ፤ እ ህንተንቱ ናቁዋ ዎይ ህንተንቱ ናጋራ አቶ ጌና። 20 ህንተንቱ መና ጎዳ አጊደ፥ አላጋ ጾሳቶ ጎይኖፐ፥ እ ህንተንቶ ሎኦባ ኦዳዋፐ ጉይያን፥ ስሚደ ህንተንታ ቆሀናነ ይሳና” ያጌዳ። 21 አሳይ ኢያሳ፥ “ቱይት፥ ግደና! ኑን መና ጎዳዉ ጎይናና” ያጌዳ። 22 ኢያሱ አሳ፥ “ህንተንቱ መና ጎዳዉ ጎይንያዋ ዶሬዳዎ ህንተንቱ ሁጲያዉ ህንተንቱ ማርካ” ያጌዳ። ኡንቱንቱ፥ “ኤ ኑን ማርካ!” ያጌድኖ። 23 ኢያሱ፥ “ያቶፐ፥ ህንተንቱ ግዱዋን ደእያ አላጋ ጾሳቱዋ ድግተ፤ ህንተንቱ ዎዛና መና ጎዳኮ፥ እስራኤልያ ጾሳኮ ዛርተ” ያጌዳ። 24 ኡንቱንቱ፥ “ኑን መና ጎዳዉ፥ ኑ ጾሳዉ፥ ጎይናና፤ አ አዛዙዋካ ፖላና” ያጌድኖ። 25 ሄ ጋላስ ኢያሱ አሳና ቃላ ጫቁዋ ጫቀቴዳ፤ ሰኬማን ህግያነ ዎጋ ኡንቱንቶ ከሴዳ። 26 ኢያሱ ሄ ቃላቱዋ ጾሳ ህግያ ማጻፋን ጻፌዳ። ሄዋፐ ጉይያን፥ እት ዎልቃማ ሹቻ አኪደ፥ መና ጎዳ ዱንካንያ ማታን ደእያ ዎላ ጋርሳን ኤሴዳ። 27 ኢያሱ አሳዉ ኡባዉ፥ “በእተ፥ መና ጎዳይ ኑዉ ሃሳዬዳ ቃላ ኡባ ሀ ሹቻይ ስሴዳ ድራዉ፥ እ ኑ ቦላ ማርካ ግዳናዋ። ህንተንቱ ጾሳ ቦላን ማካሎፐ፥ ሀ ሹቻይ ህንተንቱ ቦላ ማርካ ግዳናዋ” ያጌዳ። 28 ሄዋፐ ጉይያን፥ ኢያሱ አሳ ኡባ የድና፥ ኡባይካ ባረ ላታ ጋድያ ጋድያ ስሚደ ቤዳ። 29 ሄዋፐ ጉይያን መና ጎዳ ቆማይ፥ ነዌ ናአ ኢያሱ፥ ላይይ ጼታነ ታሙዋ ግድና ሀይቄዳ። 30 አሳይ ጋኣሻ ደርያፐ ሁጲሳ ባጋን፥ ኤፍሬማ ገዝያን ደእያ አ ላታ ጋድያን፥ ትምናት-ሴራን ሞጌድኖ። 31 ኢያሱ ፓጻ ደኤዳ ዎደ ኡባንነ ኢያሱፐ ስምና ደኢደ፥ መና ጎዳይ እስራኤላቶ ኦዳ ኦሱዋ ኡባ ኤሬዳ ጭማቱዋ ዎደ ኡባን እስራኤላቱ መና ጎዳዉ ጎይኔድኖ። 32 እስራኤልያ አሳይ ግብጼ ጋድያፐ አሄዳ ዮሴፎ መቀ ሰኬማን ሞጌድኖ። ሄ ሳኣ ያቆብ ሸኬማ አዉዋ ሀሞራ ናናቱዋፐ ጼቱ ጻጋራ ብራን ሻሜዳ፤ ጉየፐ ዮሴፎ ዛራቱ ላቴድኖ። 33 አሮና ናአይ ኤልኣዛረ ሀይቄዳ፤ አ ናኣ ፒንሃሳዉ እመቴዳ ኤፍሬማ ገዝያን ደእያ ግብኣ ጌተትያ ካታማን ሞጌድኖ።