ኤርማሳ ሴላ 4

1 ጶልያ ዎርቃይ ባረ ማላ ዋኒደ ታሴዴ። ጌሻ ዎርቃይ ዋኒደ ማላ ዬደ። ጌሻ ጎሊ ኬጸቴዳ ሹቻይ ካታማቱዋ ኦግያ ኡባ ዶናን ላለት ኡቴዳ። 2 ካሰ ቦንቼቴዳ ዎርቃ ላገ ግዴዳ ጽዮነ ናናቱ ሀእ ኩሽያ ሂላይ ኡርቃፐ መዳ ሚሻ ማላ ግዴድኖ። 3 ሀራይ አቶ ዎራካናቱዋነ ባረ ማራ ንዉ፤ ሽን ታ አሳይ ባዙዋን ደእያ ሶጎንያዳን፥ ባረ ናናቶ መቀ ኢቴዳ። 4 ሳሙዋ ጋሱዋን ምያ ናናቱዋ እንጻርሳይ ኮክያና ኦይቀቴዳ፤ ናናቱ ቁማ ዎሴድኖ፤ ሽን ኡንቱንቶ እምያዌ እቱነ ባዋ። 5 ካሰ ማልእያ ቁማ ጻላላ ሜዳዋንቱ ሀእ ኦግያ ዶናን ኮሻን ዉሪኖ፤ ቃይ ካሰ እሻሉዋን ድጬዳዋንቱ ሀእ ብድን ቦላ ዛቁሌድኖ። 6 ታ አሳ ናጋራይ ኦ ኩሺነ ቦቼናንነ ቆፐናን አ ዎዳ ሶዶማ ካታማ አሳ ናጋራፐካ ዳሬዳ 7 ይሁዳ ካፓቱ ካሰ ሻቻፐ አዳ ጌሻነ ማፐ አዳ ቦ። ኡንቱንቱ ቦላይ ዞኦ እንቁዋፐ አዳ አርሳ፤ ኡንቱንቱ ማላይካ ሳምፔርያ ግያ አልኦ እንቁዋ ማላ። 8 ሽን ሀእ ኡንቱንቱ ሶምኢ ሻላፐ አደ ካረጼዳ፤ አሳይ ኦግያን በኢደ ኡንቱንታ ኤረና። ኡንቱንቱ ጋልባይካ ኡንቱንቱ መቀና ኦይቀቲደ፥ ምዳን መሌዳ። 9 ምያባ ዪደ፥ ሎዱ ጊደ፥ ኮሻን ሀይቄዳዋንቱፐ ኦላን ሀይቄዳዋንቱ ኬካ። 10 ታ አሳ ቦላን ዬዳ ባየ ጋሱዋን፥ ቃረትያ አየቱ ባረንቱ የሌዳ ናናቱዋ ዶይሲደ፥ ባረንቶ ቁማ ከሲደ ሜድኖ። 11 መና ጎዳ ሀንቁዋ ጹአይ ኩሜዳ፤ እ ባረ ሱልያ ሀንቁዋ ትጌዳ። የሩሳላመ ካታማ ባሱዋና ሜዳ ታማ ኤ ከሴዳ። 12 ሀ ሳኣን ደእያ ካተቱዋፐ ዎይ ካዉተቱዋ ግዶን ደእያ አሳፐ ኦንነ ሞርኪ የሩሳላመ ፐንግያና ገላና ጊደ አማንቤና። 13 ሽን ሀዌ ሀኔዳዌ አ ናበቱነ አ ቄሳቱ ኦዳ ናጋራ ድራሳ፤ ቃይ ኡንቱንቱ ጽሎቱዋ ሱ አ ግዶን ጉሴዳ ድራሳ። 14 ኡንቱንቱ ቆቀ አሳዳን፥ ኦግያን ታታፊኖ፤ ቃይ ኡንቱንቱ ሱን ቱኔዳ ድራዉ፥ ኡንቱንቱ ማዩዋ ኦንነ ቦቻናዉ ኮየና። 15 ሄዋ ድራዉ፥ አሳይ ኡንቱንታ፥ “ክችተ! ህንተ ቱና! ክችተ! ኑና ቦቾፕተ!” ያጊደ ኡንቱንቱ ቦላ ዋሴዳ። ያትና፥ ኡንቱንቱ ባቃቲደ ቶይላካቴዳ ዎደ፥ ካዉተቱዋ ግዶን ደእያ አሳይ ኡንቱንታ፥ “ህንተ ኑናና ሀዋን ደአናዉ ዳንዳይክታ” ያጌድኖ። 16 መና ጎዳይ ባረ ሁጲያን ኡንቱንታ ላሌዳ፤ እ ኡንቱንቶ ላኤን ቆፐና። ኡንቱንቱ ቄሳቱ ካ ቦንቼትበይክኖ፤ ኡንቱንቱ ጭማቱካ ናሸትበይክኖ። 17 ኑ አይፊ ማዱዋ ደማናዉ ጼሊደ፥ ጮ መላ ዳቡሬዳ። ኑና አሻናዉ ዳንዳየና ካዉተቱዋ፥ ኡንቱንቱ ያና ጊደ ዎቼዶ። 18 አሳቱ ኑ ቃታማ ካልያ ድራዉ፥ ኑ ካታማ ኦግያን ሄመታናዉ ዳንዳይበይኮ። ኑ ዉርሰይ ማታቴዳ፤ ኑ ላይይ ዉሬዳ፤ ኑ ይያ ዎዲካ ጋኬዳ። 19 ኑና የደርስያዋንቱ ሳሉዋና ፓልያ አርጋንፐካ አደ ኤሌሊኖ። ኡንቱንቱ ኑና ደርያ ሁጲያና የደርሴድኖ፤ ቃይ ባዙዋን ዙጊደ፥ ኑና ናጌድኖ። 20 መና ጎዳይ ኦኬዳ ካትያ፥ ኑን ሲያና ሸምፕያ ኑ ሸምፑዋ፥ ኡንቱንቱ ባረንቱ ጲርያን ኦይቄድኖ። ኑን አ ኩዋ ጋርሳን ኡቲደ፥ ካዉተቱዋ ግዶን ደአና ጊደ ቆፔዶ። 21 ህንተኖ፥ ኡጻ ቢታን ደእያ ኤዶማ አሳቶ፥ ናሸትተነ ፖጩ ጊተ። ሽን ሀንቁዋ ጹአይ ህንተኮካ ጋካናዋ፤ ህንተካ ማቲደ፥ ካሎ አታና። 22 ህንተኖ፥ ጽዮነ አሳቶ፥ ህንተ ባይዙዋ ሙሩ ፖለቴዳ። ሀዋፐ ስንን እ ህንተና ኦሞዱዋን ዎና። ሽን ኤዶማ አሳቶ፥ ህንተ ባይዙዋ እ ሙራና፤ ህንተ ናጋራካ ቆንጭሳና።