ሌምሱዋ 24

1 ታ ናአዉ፥ ኢታ አሳቱዋ ማላ ግዳርክታሻ ጎፓ፤ ኡንቱንቱና ዳቦታናዉካ አሞቶፓ፤ 2 አያዉ ጎፐ፥ ኡንቱንቱ ኡባ ገደ ማካላባ ማቀቲኖ፤ ባረንቱ እንጻርሳን ገንያባ ሃሳዪኖ። 3 ጎሊ አዳ ኤራተን ኬጸቴ፤ አኬካንካ ምኔ። 4 ኤራይ ደኦፐ፥ ቆልኡ አልኦባንነ ሎኦባን ኡባን ኩሜ። 5 ዎዛናማ ኡራዉ ዎልቃማ ዎልቃይ ደኤ፤ ኤራንቻ አሳይካ ምኖተ ጉጄ። 6 ኔን ኦላዉ ከሳናፐ ካሰታደ ሀልቹዋ ሀልቻናዉ ኮሼ፤ ዳሮ ዞርያዋንቱ ዞርያን ጾኑ ቤቴ። 7 ቦዛይ አዳ ኤራተ አኬካናዉ ዳንዳየና፤ ሀቃ ያአንካ ኦድያዌ አይነ ባዋ። 8 ኢታ ኦናዉ ሀልችያ ኡራይ ገናንቻ ጌተታና። 9 ቦዛተ ቆፋይ ናጋራ፤ አሳይ ቅሊጭያዋ እጼ። 10 ኔን መቱዋ ጋላስ ላፎፐ፥ ነ ዎልቃይ ጉ ግያዋ። 11 ሀይቃናዉ በሰናን፥ ሀይቆ ፕርዲደ አፍያዋንታ አሻ፤ ዎና ሀንያ ዎደ ጮኡ ጋደ ጼሎፓ። 12 ኔን፥ “ኑን ሀዋ ኤርበይኮ” ያጎፐ፥ ዎዛና ኤርያዌ እ በኤኔ? ነ ደኡዋ ናግያዌ ኤረኔ? አሳ ኡባዉ አ ኦሱዋ ኦሱዋዳን ዛረኔ? 13 ታ ናአዉ፥ ኤሳ ማ፤ ኤሳይ ሎአ። ኤሳ እልሉ ጎጎጩዋን ማልኤ። 14 አዳ ኤራተይካ ሄዋ ማላ፤ እ ነ ሸምፖ ማልኦ ግድያዋ ኤራ። ኔን አ ደምያዋ ግዶፐ፥ ስንና ያና ህዶታይ ነዋ፤ ኔን አካና ጋደ ህዶታን ናግያዌካ የና። 15 ጽሉዋ ጎልያነ ማጹዋ ቦንቃናዉ ቆፕያ ኢታ አሳዳን ሀኖፓ። 16 ጽሎ አሳይ ላፑን ገደ ኩንዶፐካ ደንዴ፤ ሽን ኢታቱ መቱዋን ያና። 17 ነ ሞርኪ ኩንድያ ዎደ ናሸቶፓ፤ እ በትያ ዎደካ፥ “ሀሹ!” ጎፓ። 18 ኔን ናሸቶፐ፥ መና ጎዳይ ሄዋ በኢደ ናሸተና፤ አ ሀንቀትያዋካ አግ አጋና። 19 ኢታ ኦያዋንቱ ድራዉ ህርጎፓ፤ ኡንቱንቱ ማላ ግዳርክታሻ ጎፓ። 20 አያዉ ጎፐ፥ ኢታ ኡራዉ ስንና ያና ህዶታይ ባዋ፤ ኢታቱዋ ጾምፒካ ቶአና። 21 ታ ናአዉ፥ መና ጎዳዉነ ካትያዉ ያያ፤ ኡንቱንቶ ማካልያዋንቱናካ ዙፐቶፓ። 22 አያዉ ጎፐ፥ ሄዋ ማላ አሳቱዋ ቆፐና መቱ ጋኬ፤ ካትያፐነ ጾሳፐ ያና መቱዋ ኦኔ ኤርያዌ? 23 አዳ ኤራንቻቱ ጉጂደካ ሀዋዳን ያጌድኖ፦ ፕርዲደ ማድያዌ ሎአ ግደና። 24 ባይዛንቻ፥ “ኔን ባይዛባካ” ያግያ ዳና አሳይ ሸቃና፤ ካዉተቱካ አ እጻና። 25 ባይዛንቻ ሙርያዋንቱ ሎይ ናሸታናነ አንጀታና። 26 ሱረ ዛሩዋ ዛርያዌ ዳቦቶ ማላታ ማላ። 27 ካሰታደ ነ ጋድያ ኦ፤ ካካ ዘራ፤ ሄዋፐ ጉይያን፥ ነ ጎልያ ኬጻ። 28 ነ ሾሩዋ ቦላ ጋሱ ባይናን ማርካቶፓ፤ ነ ዶናንካ ጭሞፓ። 29 “እ ታዉ ኦዳዋዳን፥ ታን አዉ ኦና፤ ታን አዉ አ ኦሱዋ ኩሽያ ዛራና” ያጎፓ። 30 ታን እት ጋላስ፥ እት አዛላነ አኬካይ ፓጬዳ ብታንያ ጋደን ደእያ ዎይንያ ቱራ ግዱዋና አድ። 31 አያ ዎደ፥ አጉንይነ ሻራፋይ ጎዝ ዎዳ፤ ዩሹዋን ሹቻ ግምቢካ ኮለት ክቼዳ። 32 ታን አ በኤዳ ዎደ፥ ቆፓድ፤ ታን በኤዳዋፐ ትምርትያ ታማራድ። 33 ኔን ጉ ልጵ ጋ፤ ጉ ገምእሻ፤ ነ ኩሽያካ ሺሻደ ጉ ሸምፓ አካ። 34 ሄዋፐ ጉይያን፥ ህዬሳተይ ፓኑዋዳን ያና፤ ፓጫይካ ኦላ ሚሻ ኦይቄዳ አሳዳን ፑቱ ጋና።