ሌምሱዋ 28

1 ኢታቱ ኦንነ የደርሰናን ባቃቲኖ፤ ሽን ጽሎቱ ጋሙዋ ማላ ጻላ። 2 እት ካዉተይ ማካላንቻ ግዶፐ፥ አ ሞድያዋንቱ ላመት ላመት ሞድኖ። ሽን ካለያዋንቱ አዳ ኤራንቻነ አኬካንቻ ግድያ ዎደ፥ ምኖ ግዲደ፥ ዳሮ ዎድያ ታኬ። 3 ህዬሳቱዋ ኡቁንያ ዳናይ ካ ይስያ ዎልቃማ እራ ማላ። 4 ህግያ ቦንቼና ኡራይ ባይዛንቻ ሳቤ፤ ሽን ህግያ ቦንችያዌ ባይዛንቻቱዋ ቆፋ ጳልቄ። 5 ኢታ አሳቶ ሱረ ፕርዳባይ ገለና፤ ሽን መና ጎዳዉ ጎይንያዋንቶ ኡባባይካ ገሌ። 6 ጌላ አሳ ግዲደ፥ ዱረ ግድያዋፐ ሱረ አሳ ግዲደ፥ ህዬሳ ግድያዌ ኬካ። 7 ህግያ ናግያ ዎዳላይ አኬካንቻ። ሽን ፓና ሹፉሮቱዋና ዙፐትያዌ ባረ አዉዋ ዬላዬ። 8 ሚሻ ድቻዉ እምያዋንነ የሉዋን ዱረትያ አሳይ ሄ ማጹዋ ህዬሳቶ ኬክያ አሳዉ ሺሼ። 9 ህግያ ስሳናፐ ጊደ፥ ባረ ሀይ ዎራ ዛርያ ኡራ ዎሳይ ጾሳ ሸነይያዋ። 10 ሱረቱዋ ኢታ ኦግያ ካለያ ኡራይ ባረ ቦኬዳ ኦላን ባረዉ ኩንዳና፤ ሽን ጌሻ አሳይ ሎኦባ ላታና። 11 ዱረ አሳይ ባረና አዳ ኤራንቻ ጊደ ቆፔ፤ ሽን አኬካይ ደእያ ህዬሳይ አ ፓጬ። 12 ጽሎቱ ጾኔዳ ዎደ፥ አሳይ ኡባይ ናሸቴ፤ ሽን ኢታቱ ማታ ኦይቄዳ ዎደ፥ አሳይ ቆሰቴ። 13 ባረ ናጋራ ገንያ ኡራይ አጨና፤ ሽን ፓጽያዌነ ናጋራ አግያዌ ማረታናዋ። 14 መና ጎዳዉ ኡባ ገደ ያይያ አሳይ አንጀቴዳዋ፤ ሽን ባረ ዎዛና ጉዙንያ አሳይ መቱዋን ገላና። 15 ህዬሳ አሳ ሞድያ ኢታ ዳናይ ጉድያ ጋሙዋነ ኮሻቴዳ ባባርቂያ ማላ። 16 ዎዛን ፓጬዳ ዳናይ ባረ አሳ ናቄ፤ ሽን አሳ ናቂያዋ እጽያዌ ዳሮ ላይ ሞዳና። 17 አሳ ዎዳ አሳይ ሀይቃና ጋካናዉ ባቃቲደ ደኤ፤ አ ኦንነ ሺሽ አከና። 18 ቦሪ ባይናን ሀመትያ ኡራይ ቆሄተናን አታናዋ፤ ሽን ጌላ አሳይ እት ኩን ኩንዳና። 19 ባረ ጋድያ ኦያ ኡራይ ካ ካሌ። ሽን ሹፉሮቱዋ ካልያ ኡራይ ኡባ ገደ ህዬሲደ ደኤ። 20 አማነቴዳ ኡራይ ዳሮ አንጀታና፤ ሽን ዱረታናዉ ጃምያዌ ሙረተናን አተና። 21 ሻኪደ ማድያዌ ሎኤና፤ ሽን አሳይ ጉ ኡክ ድራዉ ጊደካ፥ ባላባ ኦኖ። 22 ኡዘትያ ኡራይ ዱረታናዉ ጃሜ፤ ባረና ህዬሳተይ ኦይቃናዋካ ኤረና። 23 አሳ ጮ ሳቢያ ኡራፐ ሴርያ ኡራይ ጉየፐ ጋላተቴ። 24 ባረ አዉዋፐነ ባረ አትፐ ዉኢደ፥ “ታን አይነ ናጋራ ኦበይከ” ያግያ ኡራይነ ባይዝያ ኡራይ እት ማላ። 25 ኡዘትያ ኡራይ ዋላሳ ደን፤ ሽን መና ጎዳን አማነትያዌ ካሌ። 26 ባረናን አማነትያ አሳይ ቦዛ፤ ሽን አዳ ኤራተን ሀመትያዌ ሳሮ ደኤ። 27 ህዬሳዉ እምያ ኡራዉ ፓጨና፤ ሽን ኡንቱንታ በአናፐ ጊደ ጪልምያዌ ሸቃ አካና። 28 ኢታ አሳቱ ሱንትያ ዎደ፥ አሳይ ቆሰቴ፤ ሽን ኡንቱንቱ ይያ ዎደ፥ ጽሎቱ ጮራቲኖ።