ማዝሙርያ 22

1 ታ ጾሳዉ፥ ታ ጾሳዉ፥ ታና አያዉ አጋዲ? ታና ማዳ ጋደ ታን ነዉ ዋትዋትያ ዎደ፥ አያዉ ታፐ ሃካይ? 2 አቤት ታ ጾሳዉ፥ ጋላሳን ኡባን ታን ነዉ ዋሳይ፤ ሽን ኔን ታዉ አላካ። ቃማን ኡባንካ ነዉ ዋሳይ፥ ሽን ዎፓ ደምከ። 3 ግዶፐነ፥ ኔን ጌሻ። እስራኤልያ ጋላታይ ነ አራታ ዩሹዋን ደኤ። 4 ካሰ ኑ አዎቱ ኔናን አማነቴድኖ፤ ኔናን አማነትና፥ ኔን ኡንቱንታ አሻዳ። 5 ነዉ ዋሲደ አቴድኖ፤ ኔናን አማነቲደ ዬላትበይክኖ። 6 ሽን ታን አሳ ግድከ፤ ታን ጉጹንያ። ታን አሳን ካተዳዋነ ቅሊጨቴዳዋ። 7 ታና በእያ ኡባቱ ቅኖ፤ ኡንቱንቱ ታና ጽት ጼሊኖነ ባረንቱ ሁጲያ ቃኖ። 8 ያቶፐ፥ “እ መና ጎዳን አማነቴዳ፤ አያዉ አ አሸኔ? መና ጎዳይ አ ዶሶፐ፥ አነ አ አሾ” ያጊኖ። 9 ግዶፐነ፥ ታና ታ አት ኡሉዋፐ ሱረ የልሴዳዌ ኔና፤ ታ አት ን ምያ ዎደካ ታን አማነታናዳን ኦዳ። 10 ታን የለቶደፐ ዶማደ ኔናን ድጫድ፤ ታ አት ኡሉዋፐ ዶማደካ፥ ኔን ታ ጾሳ። 11 መቱ ታኮ ማትያ ድራዉነ ታና ማድያዌ ባይና ድራዉ፥ ሀእ ኔን ታፐ ሃኮፓ። 12 ዳሮ ሞርከቱ ኮሩማ ቦራቱዋዳን ታና ዶዲኖ፤ ቃይጭያ ባሳነ ቢታ ቦራቱዋዳን ታና ዶዲኖ። 13 መንሬያነ ጉድያ ጋሙዋዳን ባረንቱ ዶና ታ ቦላ ሀንጊኖ። 14 ታን ሃዳን ጎጋድ፤ ታ መቀቱ ባረንቱ ኩሻፐ ኮለቴድኖ። ታ ዎዛናይ ኤሳ ሙቃዳ ማላ፥ ታ ግዶን ሴር ዉሬ። 15 ታ ቆ ኮንኣዳን መሌ፤ ታ እንጻርሳይ ኮክያና ኦይቀቴ። ኔን ታና ሀይቄዳ አሳዳን ባናን የጋዳ። 16 ካናቱ ታና ተኤድኖ፤ ኢታ አሳቱ ታ ዩሹዋን ዶዴድኖ። ታ ኩሸቱዋነ ታ ገደቱዋ ጫዲኖ። 17 ታ መቀቱዋ ኡባ ታን ፓይዳይ። ታ ሞርከቱ ታና ጼሊኖነ ደረቂኖ። 18 ታ ማዩዋ ሻክ አኪኖ፤ ታ አዱሳ ማዩዋን ሳማ የጊኖ። 19 አቤት መና ጎዳዉ፥ ኔን ታፐ ሃኮፓ። አቤት ታ ዎልቃዉ፥ ታና ማዳናዉ ኤለካ ሃያ። 20 ታና ማሻፐ አሻ፤ ታ አልኦ ደእያ ካናቱዋ ዎልቃፐ አሻ። 21 ጋሞቱዋ ዶናፐ ታና አሻ፤ ቃይጭያ ባዙዋ ቦራቱዋ ካጭያፐ ታና ናጋ። 22 ታን ነ ሱን ታ እሻቶ ኦዳና፤ ማባራ ሺቁዋንካ ኔና ጋላታና። 23 ህንተኖ፥ መና ጎዳዉ ያይያዋንቶ፥ አ ጋላትተ። ህንተኖ፥ ያቆባ ዘረቶ፥ ኡባይካ አ ቦንችተ። ህንተኖ፥ እስራኤልያ ዘረቶ፥ ኡባቱካ ቦንቹዋን አዉ ያይተ። 24 እ ናቀቴዳዋንታ ካና፤ ኡንቱንታ ጋኬዳ ቆሁዋ ታዉ አይ መቴ ጌና። ባረ ሶምኡዋ ኡንቱንቱፐ ገንና፤ ሽን ኡንቱንቱ ማዶ አኮ ዋስያ ዎድያን፥ ኡንቱንቱ ዋሱዋ ስሴ። 25 ታን ኔን ኦዳ ሎኦ ኦሱዋ ድራዉ፥ ኩንዳ ሺቁዋን ጋላታና። ታን ሺቀቴዳዋ ነዉ ያይያ አሳ ስንን ጋና። 26 ህዬሳቱ ሚደ ካላና። መና ጎዳ ኮይያዋንቱ አ ጋላታና። ኡንቱንቱ መናዉ ደአና። 27 ሳኣ ጋጻ ጋካናዉ አሳይ ኡባይ ሀሳዪደ፥ መና ጎዳኮ ስማና። አሳ ዛረ ኡባይ አዉ ጎይናና። 28 አያዉ ጎፐ፥ ካተትያ ማታይ መና ጎዳዋ፤ ካዉተቱዋ እ ሞዴ። 29 ሳኣን ደእያ ዱረ አሳቱ ኡባይ አዉ ጎይናና። ባረንታ ሀይቁዋፐ አሻናዉ ዳንዳየናዋንቱነ ባናዉ ላመትያዋንቱ ኡባቱ አዉ ጉልባታና። 30 ይያ ዘረይ አዉ ኪተታና፤ አሳይ ጎዳ ኦሱዋ ይያ የለታዉ ኦዳና። 31 ብሮ የለትቤና አሳይካ አ ጽሎተ ኦዳና። “ጾሳይ ባረ አሳ አሼዳ” ያግያዌ ኦደታና።