ዮሃንሳ ሳፃ 20

1 ጪሞ ኦላ ቁልፕያነ ዎልቃማ ሳንላታ ባረ ኩሽያን ኦይቄዳ እት ኪታንቻይ ሳሉዋፐ ይያዋ ታን በኣድ። 2 ኪታንቻይ ዳዊያ፥ ሄ በን ሾሻ፥ ጻላህያ ካፑዋ ዎይ ሴጻና ግያዋ ኦይቄዳ፤ ያቲደ ሻአ ላይዉ ቃቼዳ። 3 ኪታንቻይ ጪሞ ኦላን አ የጊደ፥ ሻአ ላይይ ዉራናዉ፥ አሳ ዘረ ላኤንዋ ባለተና ማላ፥ ሄ ጪሞ ኦላ ቁልፕ ጎርዲደ አታሜዳ። ሄዋፐ ጉይያን፥ ዳዊ አማሬዳ ዎድያ ብለታናዉ በሴ። 4 ሄዋፐ ጉይያን፥ ታን አራታቱዋነ ኡንቱንቱን ኡቴዳዋንታ በኣድ፤ ኡንቱንቶ ፕርድያ ማታይ እመቴዳ። የሱስ ቆንጭሴዳ ቱሙዋነ ጾሳ ቃላ አዋዬዳ ድራዉ፥ ባረንቱ ቆያ ቃንጸቴዳ አሳ ሸምፑዋካ ታን በኣድ። ኡንቱንቱ ዶአዉ ዎይ ዶኣ ምስለዉ ጎይንበይክኖ። ኡንቱንቱ ዶኣ ማላ ባረንቱ ዴሙዋን ዎይ ባረንቱ ኩሽያን ዎቤይክኖ። ኡንቱንቱ ሀይቁዋፐ ደንዲደ፥ ክርስቶሳና እትፐ ካተቱዋዳን ሻአ ላይዉ ሞዴድኖ። 5 ሀይቄዳዋንቱፐ ጮራቱ ሻአ ላይይ ዉራና ጋካናዉ፥ ሀይቁዋፐ ደንድበይክኖ። ሄዌ ኮይሮ ደንዱዋ። 6 ኮይሮ ደንዱዋን ደንዴዳዋንቱ አንጀቴዳዋንታነ ጾሳ አሳቱዋ። ኡንቱንቱ ቦላ ላኤን ሀይቆ ዎልቃይ ባዋ። ኡንቱንቱ ጾሳዉነ ክርስቶሳዉ ቄሳቱዋ ግዳና፤ ኡንቱንቱ አናና እትፐ ሻአ ላይዉ ሞዳና። 7 ሻአ ላይይ ዉሬዳዋፐ ጉይያን፥ ሴጻናይ ቃሹዋፐ ብለታና። 8 እ ሳኣን ኡባ ሳን ደእያ አሳ ዘረ ባለናዉ ከሳና፤ ሄዌ ጎጋነ ማጎጋ ጌተትያዋ። ሴጻናይ አባ ሻፍያ ኬና ዘረ ኦላዉ ሺሻና። 9 ሄ ዛራቱ ቢታ ኡባ ማዪደ ጌሻቱዋ ሄራነ ጾሳይ ሲቅያ ካታማቶ ዩይ አ ኤቄድኖ። ሽን ታማይ ሳሉዋፐ ዎደ፥ ኡንቱንታ ሜዳ። 10 ዶአይነ ዎርዶ ናቢ የገቴዳ ኤጽያ ዲንያ ታማ አባን ጻላህያ ካፑ፥ አሳ ዘረ ባለዳዌ፥ የገቴዳ። ኡንቱንቱ ቃማነ ጋላስ መ መናዉ ፓጻ ካኤታና። 11 ሄዋፐ ጉይያን፥ ታን ዎልቃማ ቦ አራታነ ሄ አራታን ኡቴዳዋ በኣድ። ሳአይነ ሳሉ አ ስንፐ ባቃቴድኖ፤ ላኤን ቤትበይክኖ። 12 ሀይቄዳዋንቱ፥ ቁ ግያዋንቱነ ጉቱ አራታ ስንን ኤቄዳዋንታ ታን በኣድ። ማጻፋቱ ዶየቴድኖ፤ ሀራ ማጻፋይ፥ ደኡዋ ማጻፋይካ ዶየቴዳ። ሀይቄዳዋንቱ ባረንቱ ኦሱዋዳን፥ ማጻፋቱዋን ጻፈት ኡቴዳዋዳንካ ፕርደቴድኖ። 13 አባይ ባረ ግዶን ደእያ ሀይቄዳዋንታ እሜዳ፤ ሀይቁነ ስኦሊ ባረንቱ ግዶን ደእያ ሀይቄዳዋንታ እሜድኖ። ኡባይካ ባረንቱ ኦሱዋዳን ፕርደቴድኖ። 14 ሄዋፐ ጉይያን፥ ሀዩነ ስኦሊ ታማ አባን የገቴድኖ። ሄ ታማ አባይ ላኤን ሀይቁዋ። 15 ደኡዋ ማጻፋን ባረ ሱንይ ጻፈትቤና አሳይ ኦንነ ታማ አባን የገቴዳ።