ዮሃንሳ ሳፃ 8

1 ዶርሳይ ላፑን ማታፋ ዶዬዳ ዎደ፥ ባካ ሳትያ ግድያዋ ኬና ሳሉ ጮኡ ጌዳ። 2 ሄዋፐ ጉይያን፥ ታን ላፑ ኪታንቻቱዋ ጾሳ ስንን ኤቂያዋንታ በኣድ፤ ኡንቱንቶ ላፑ ማላካታይ እመቴዳ። 3 እጻና ጩዋይያ ዎርቃ ሚሻ ኦይቄዳ ሀራ ኪታንቻይ ዪደ፥ ያርሽያ ሳ ማታን ኤቄዳ። ዎርቃፐ መቴዳ ያርሽያሳይ ካዉተ ኦይድያ ስንን ደኤ፤ ሄ ያርሽያ ሳ ቦላ ጌሻ ኡባቱዋ ዎሳ ጉጃና ማላ፥ ኪታንቻዉ ዳሮ እጻናይ እመቴዳ። 4 እጻና ጩዋይ ጌሻቱዋ ዎሳና እትፐ ሄ ኪታንቻ ኩሽያፐ ፑደ ጾሳኮ ቤዳ። 5 ሄዋፐ ጉይያን፥ ኪታንቻይ እጻና ጩዋይያዋ አኪደ፥ ያርሽያ ሳፐ ታማ ቦንቁዋ አኪደ፥ አን ኩንዳ። ሄ እጻና ጩዋይያዋ ዱገ ሳኣ ኦልና፥ ጉጉንይ ጉሜዳ። ዋልቃንይ ዎልቃሜዳ፤ ቃይ ቢታይካ ቃጼዳ። 6 ቃይ ላፑ ማላካታ ኦይቂደ ላፑ ኪታንቻቱ ማላካታ ፑናናዉ ጊጌድኖ። 7 ኮይሮ ኪታንቻይ ባረ ማላካታ ፑንና ሱና ዋላከቴዳ ሻቻይነ ታማይ ሳኣን ቡኬዳ። ሳኣፐ ሄዘን ኩሺ ጉደቴዳ፤ ምፐካ ሄዘን ኩሺ ጉደቴዳ፤ ማታ ኡባይካ ጉደቴዳ። 8 ላኤን ኪታንቻይካ ባረ ማላካታ ፑኔዳ። ዎልቃማ ደርያ ማላትያባይ ታማን ኤጺደ፥ አባን የገቴዳ፤ ያትና፥ አባፐ ሄዘን ኩሺ ሱ ግዴዳ። 9 አባን ደኡዋን ደእያ መታቱዋ ሄዘን ኩሺ ሀይቄዳ፤ ማርካበቱዋፐካ ሄዘን ኩሺ ዬዳ። 10 ሄዘን ኪታንቻይ ባረ ማላካታ ፑንና ሻፋፐነ ፑልቱዋ ሃፐ ሄዘን ኩሽያ ቦላ ሳሉዋፐ ጾምፕያዳን ኤጽያ ዎልቃማ ጾልንቲ ዎዳ። 11 ሄ ጾልንትያ ሱንይ ጫሙዋ ጌተቴ። ሃፐ ሄዘን ኩሺ ጫሜዳ፤ ቃይ ሃይ ጫሜዳ ድራዉ፥ ዳሮ አሳይ ሄ ሃ ኡሺደ ሀይቄዳ። 12 ኦይደን ኪታንቻይ ባረ ማላካታ ፑኔዳ። አዋፐ፥ አገናፐነ ጾልንትያፐ ሄዘን ኩሺ ደሸቴዳ፤ ኡንቱንቱ ፖኡዋፐካ ሄዘን ኩሺ ሜዳ። ሄዋ ድራዉ፥ ጋላሳፐ ሄዘን ኩሺ፥ ቃማፐካ ሄዘን ኩሺ ሜዳ። 13 እት አርጋንይ ሳሉዋን ፓልያዋ ታን በኣድ። ሄ አርጋንይ ባረ ቃላ ቁ ኦደ፥ “ሄዙ ኪታንቻቱ ፑናና በስያ የኮ ማላካታይ ፑነትያ ዎደ፥ ሳኣን ደእያ አሳዉ አዬሮ! አዬሮ! አዬሮ!” ያግያዋ ስሳድ።