ዛካራሳ 7

1 ዳርዮሰ ካተቴዳ ኦይደን ላይን፥ ክስሌዋ ግያ ኡዱፑን አግናን፥ ኦይደን ጋላሳን መና ጎዳ ቃላይ ዛካራሳኮ ዬዳ። 2 ቤቴለ ካታማ አሳይ ሳርጼጸና፥ ረጌም-መለካነ ኡንቱንቱና እትፐ ደእያ አሳቱዋ መና ጎዳፐ አንጁ ያና ማላ ዎሳናዉ ኪቴድኖ። 3 ቃይ ኡባፐ ዎልቃማ መና ጎዳ ጌሻ ጎልያን ኦያ ቄሳቱ ዋነ ትምቢትያ ኦድያዋንታ፥ “ዳሮ ላይፐ ኦደ ጋምኤዳዋዳን፥ ታን ሀእካ አገናን እቼሸን አግናን ዬካናዉነ ጾማናዉ በሲ?” ያጊደ ኦቻናዳን ኪቴድኖ። 4 ሄዋፐ ጉይያን፥ ኡባፐ ዎልቃማ መና ጎዳ ቃላይ ሀዋዳን ያጊድ ታኮ ዬዳ፤ 5 “ቢታን ደእያ አሳ ኡባነ ቄሳቱ ዋ ሀዋዳን ያጋደ ኦቻ፤ ‘ህንተ ሄ አዳ ላፑን ታሙ ላይ ግዶን እቼሸን አግናንነ ላፑን አግናን ጾሜዳዋነ ዬኬዳዋ ታዉ ጾሜድቴ? 6 ህንተ ምያ ዎደነ ኡሽያ ዎደ፥ ህንተንቶ ሚታነ ኡሺታ ግደኔ። 7 የሩሳላመ ካታማንነ አ ዩሹዋን ደእያ ካታማቱዋን አሳይ ደኤዳ ዎደ፥ ኡንቱንቱ እሻሊደ ደኤዳ ዎደነ ኔጌበንነ አዋይ ዶልያ ባጋ ዝቃ ጋድያን አሳይ ደኤዳ ዎደ፥ መና ጎዳይ ባረ ትምቢትያ ኦድያዋንቱ ባጋና ኦዴዳ ቃላይ ሀዋ ግደኔ?’ ያጋ” ያጌዳ። 8 መና ጎዳ ቃላይ ቃይካ ዛካራሳኮ ሀዋዳን ያጊድ ዬዳ፤ 9 “ኡባፐ ዎልቃማ መና ጎዳይ ካሰ ሀዋዳን ያጌዳ፤ ‘ቱሙ ፕርዳ ፕርድተ። ህንተ ግዶን እቱ እቶ ኬካተነ ማሮተ ኦተ። 10 አምኤቱዋ፥ አታ አዉ ባይና ናናቱዋ፥ በተቱዋነ ህዬሳቱዋ ናቆፕተ። ቃይ ህንተፐ ኦንነ ባረ እሻ ቦላን ኢታባ ኦናዉ ባረ ዎዛናን ቆፖፖ’ ያጌዳ” ያጊድ ዬዳ። 11 ሽን ኡንቱንቱ ስሰናን እጼድኖ፤ ቃይ ዞክያ ዛሬድኖነ ስሰናዳን፥ ባረንቱ ሀይካ ቱጬድኖ። 12 ኡባፐ ዎልቃማ መና ጎዳይ ባረ አያናን ካሰ ባረ ትምቢትያ ኦድያዋንቱ ባጋና ኪቴዳ ህግያነ ቃላ ስሰና ማላ፥ ኡንቱንቱ ባረንቱ ዎዛና ዛላዳን ምንሴድኖ። ሄዋ ድራዉ፥ ኡባፐ ዎልቃማ መና ጎዳ ማታፐ ዎልቃማ ሀንቁ ኡንቱንቱ ቦላ ዬዳ። 13 ኡባፐ ዎልቃማ መና ጎዳይ ሀዋዳን ያጌ፤ “ታን ጼሴዳ ዎደ፥ ኡንቱንቱ ስሰናን እጼዳዋዳን፥ ኡንቱንቱ ጼሴዳ ዎደ፥ ታንካ ስስከ። 14 ታን ጎትያ አሃደ፥ ኡንቱንታ ኡንቱንቱ ኤርቤና ካዉተቱዋ ግዶን ላላድ፤ ቢታይ አሳይ ያነ ሃነ ስመረተና መላ ቢታ ግዴዳ፤ ሄዋዳን ሀኒደ፥ ሀ ሎኦ ቢታይ መላ ግዴዳ” ያጌ።