Siik'uwaa Sabaa 5

1 Ta siik’o michchatto gidiyaa ta mishiratte, be’a; taani ta ataakilttiyaa giddo gelaad. Ta karbbiyaanne ta shittuwaa c’iishshaa k’oray. Eessaa ukitsaa yolttayaade may. Ta woyniyaa eessaanne ta maatsaa ushay yaageedda. Yerusaalame Wodoratuu: Hinttenoo, Aa laggetoo, siik’uwaa alana gakkanaw ushite yaageeddino. 2 Taani k’amma gem"ishaad; shin ta wozanay beegotti utteedda. Ta akumuwaan ta siik’uu hawaadan yaagiidde, penggiyaa k’os’s’iina sisaad; Ta mushurattee, ta siik’k’atee, neenan wotsiyaawe bayinna ta harap’p’atte, taw kariyaa dooyaa; ta huup’ii ketterssaan ka"eedda. Ta binnaanaykka k’amma puusiyaan narkkakkeedda yaagee. 3 Taani, Ta mayuwaa k’aara diggaad; zaara mayyooyye? Ta gediyaa meec’etta kichchaad; zaaraadde urk’k’ayooyye? yaagaad. 4 Ta siik’uu ifitsaa s’oo’iyaanna bare kushiyaa golle yeddeedda; ta wozanay Aa diraw poddi poddee. 5 Yaatina, ta siik’oo kariyaa dooyanaw denddaad. Kariyaa dooyiyaa kulbbuwaa taani oyk’k’iyaa wode, ta kushiyaappe karbbii, ta birad’d’iyaappe shittuu s’okee. 6 Ta siik’oo kariyaa dooyaad; shin dooyiyaa wode I baawa bi kichcheedda. Aa kooshshaa sisanaw loytsi amottaad. Mintsaade Aa koyaad; shin demmanaw danddayabeykke. S’eegaad; shin taw koyibeenna. 7 Yuuyyiide katamaa naagiyaawanttu taana demmiide, wad’d’eeddinonne madutseeddino; katamaa dirssaa naagiyaawanttu ta k’umayuwaa k’aari akkeeddino. 8 Hinttenoo Yerusaalame geelayotoo, ta siik’uwaa demmooppe, taani Aa siik’uwaappe denddeeddawaan harggiyaawaa, hadaraa, aw odite yaagaaddu. 9 Neenoo, mac’c’a asaa ubbaappe aad’d’eeda malanchchatee! Ne siik’uu tumu haratuwaappe waan dummatii? Neeni hawaa keeshshaa nuuna c’alliyaawe, I haratuwaappe dummatiyaawe ayaanee? yaageeddino. 10 Ta siik’uu daro lo"iyaawaanne mina; tammu sha"u attuma asaa giddon Aa mali baawa. 11 Aa huup’ii work’k’aa luliyaa malatee; Aa binnaanaykka lo"anne k’uuruwaa mala karetsa. 12 Aa ayifii shaafaa lank’k’iyaan ek’k’eeddanne, maatsan meec’etteeddawaa malatiyaa harap’p’etuwaa malatee. 13 Aa gac’otuukka sawuwaa maataynne, k’imaamii toketteedda atakilttiyaadan lo"iino; Aa mettershshatuu karbbiyaa shittuu s’okiyaa wora c’iishshaadan lo"iino. 14 Aa kushetuu ink’k’uwaan alleek’k’etteedda work’k’aa s’am"aadan lo"iino; Aa asatetsay samppeeriyaa giyaa ink’k’uwaan alleek’k’etteedda, danggarssaa achchaa mala. 15 Aa gedetuu work’k’aa baasuwaan toketteedda, ibinabaradiyaa tuussaa malatiino; Aa malay zigan alleek’k’etteedda Liibaanoosa asaa mala. 16 Aa doonay eessaadan mal"ee. I ubbaannakka lo"iyaawaa. Hinttenoo Yerusaalame wodoratoo, ta siik’uunne ta laggii hawaa malatee yaagaaddu.