Ninge 67

1 God, marse mehet ma haidane mehet, ma nu gil no num matmataan bia na murarang naliu ta mehet, 2 waing ira num tintalen na hanuat palai tano ula hanuo, ma bia ira kantri diet na nunure no num harhalon. 3 God, na bilai bia ira matanaiabar diet na pirlat ugu. I tahut bia ira tunotuno bakut diet na pirlat ugu. 4 Ira matanaiabar ta ira kantri diet na laro ma diet na inge ma ra gungunuama, kanong u kure hatakodasne ira matanaiabar ma u lue ira kantri. 5 God, na bilai bia ira matanaiabar diet na pirlat ugu. I tahut bia ira tunotuno bakut diet na pirlat ugu. 6 Io, no pise na tar ira uno matukena nian, ma God, no udahat God, na haidane dahat. 7 God na haidane dahat, ma ira matanaiabar tano ula hanuo bakut diet na burtei ma diet na urur tana.