ኤራንቻታ ማጻፋ 10

1 ሃይቂዳ ኡዱንጼቲ ሺቶ ዜቄቴስ፤ ሄሳካ ጉ ኤያቴ ኣ ኤራቴኔ ቦንቾ ካዉሼስ። 2 ኣ ኤራንቻ ዎዚናይ ኢዛ ኡሻች ካሌስ፤ ጊዶ ኣቲን ኤያ ዎዚናይ ሃዲርስ ካሌስ። 3 ኤያይ ኦጌ ቢሺን ኢዛስ ኣኬካይ ፓጬስ፤ ባ ኤያቴ ኦናስካ ቆንጪሴስ። 4 ኔ ጎዳይ ኔ ቦላ ሃንቄቲኮ ኔ ሶሆ ዬዶፋ፤ ጋሶይካ ዳንዳያይ ጊታ ሃንቆ ጮኡ ሂስቴስ። 5 ሳሎ ጉፋንን ታኒ ቤኢዳ ኢታ ሚሺ ዴስ፤ ሄሲካ ዴሬ ሃሪዛዴፌ ኬዚዛ ባላ። 6 ኤያቲ ኬሂ ቃሶሆን ኡቲን ዱሬቲ ሂርኪ ዚቃ ሶሆን ኡቲዳ። 7 ኣይሌቲ ዳናታ ማላ ቶጋን ቢሺን ዳናቲ ቃሴ ኣይሌታ ማላ ቶሆን ቢሺን ቤኣዲስ። 8 ኦላ ቦኪዛ ኣሲ ሄ ኦላን ኢዚ ኩንዳና፤ ቃሴ ዲርሳ ላሊዛ ኣስ ሾሺ ዱካና። 9 ሹች ቃሊዛይ ሄ ሹቻን ዴሼቴስ፤ ቃሴ ሚ ቄሪዛይ ሄ ሚን ቆሄቴስ። 10 ዱንኤ ካልታ ሌፎንታ ኦኮ ዳሮ ዎልቃ ዉርሴስ፤ ጊዶ ኣቲን ሂላን ኦኮ ኦሶዛ ኣይፊሴስ። 11 ሾሺ ሙሬኖን ጃላናፔ ሲንን ዱኪኮ ሙሬኒዛዴ ኣይኮካ ጎኤና። 12 ኣ ኤራንቻ ዶናፔ ኬዚዛ ቃላይ ፑላን ኩሚዳዛ፤ ጊዶ ኣቲን ኤያይ ባርካ ባ ኢንጻርሳን ዬስ። 13 ኮይሮፔ ዶሚዲ ኢዛ ቃላይ ኤያቴ፤ ዉርሴንካ ኢታ ጎሽ ጊዴስ። 14 ኤያይ ሃሳያ ዳሪሴስ፤ ቡሮፔ ሃናናይሳ ኤሪዛይ ዴና፤ ሃይቂዳዴስ ኢዛፔ ጉዬን ሃናናይሳ ኦኔ ኢዛስ ዮታና ዳንዳይዛይ? 15 ኤያ ኦሶይ ኦዛዴ ዳቡርሴስ፤ ኢዚ ካታማ ጋዛ ኦጌ ኤሬና። 16 ሃኔ ኔ ካዎይ ዬላጋ ጊዲዳሬ! ኔ ዳናቲ ዎንታራ ጊቢራ ጊግሲዛ ቢታዬ ኔስ ኣዬ ኣና! 17 ሃኔ ኔ ካዎይ ቦንቼቲዳ ዛሬፔ ጊዲዳሬ! ማታናስ ጊዶንታ ሚኔታናስ ኮሺዛ ዎዴ ሚዛ ዳናቲ ዲዛ ቢታዬ! ኔኒ ኣንጄቲዳሮ። 18 ኣዴይ ኣዛላ ጊዲኮ ካራይ ያርጳቴስ፤ ኢዛ ኩሼቲ ዳቡርኮ ኬ ኣስ። 19 ጊቢራይ ሚጪሴስ፤ ዎይኔ ኡሺ ኣስ ኡፋይሴስ፤ ሚሺ ዲኮ ሚሺ ሃኔስ። 20 ቆፋንካ ጊዲን ካዎ ካፓ፤ ኔ ኣቂዛ ኪፊሌን ዳሼ ዱሬ ቃንጎፋ፤ ቄፌን ፒራዛራ ኔ ጊዛይሳ ኤፋ ጋና ዳንዳያዉስ።