ኤራንቻታ ማጻፋ 5

1 ጾሳ ኬ ጌላሼ ኔ ቶሆ ሺሻ ኤካ፤ ሲያናስ ሺቆይ ኤያታ ያርሾፌ ኣስ፤ ኣይስ ጊኮ ኢስቲ ባንታ ኦሶይ ኢታ ጊዲዳይሳ ኤሬቴና። 2 ሃሳያናዉ ኤሶቶፓ፤ ቃሴ ኢሲ ሚሽ ጾሳስ ኢማና ጋዳ ኤሶን ጌፖፋ፤ ኣይስ ጊኮ ጾሲ ሳሎን ዴስ፤ ኔኒ ጊዲኮ ሳኣን ዳሳ፤ ሄሳ ጊሻስ ኔ ሃሳያና ቃላይ ጊናራ ጊዶ። 3 ኦሶ ዳሮን ኣጉሞይ ቤቲዛ ማላ ሃሳያ ዳሮን ኤያቴ ቃላይ ቆንጬስ። 4 ጾሳስ ኔኒ ኣዲኒዳ ኣዲና ጋምኦንታ ጋ፤ ኤሶን ፖሎንታ ኣቲኮ ኢዚ ኡፋዬቴና፤ ሄሳ ጊሻስ ኔኒ ኣዲኔቲዳይሳ ኡባ ፖላ። 5 ኢሲ ሚሽ ጾሳስ ኣዲኔቲዲ ሄ ኣዲኔቲዳይሳ ጋንታ ኣጋናፔ ካሴ ኣዲኔቶንታ ኣጎይ ሎኦ። 6 ኔና ኔ ዶናይ ናጋራን ዬጎንታ ማላ ኔ ዶና ሺሻ፤ ቃሴ ጾሳ ኬ ኦሳንቻ ሲን ሺቃዳ፥ «ታ ሃይሳ ቆፖንታ ኣዲኔታዲስ» ጎፓ። ጾሳ ሃንቄዳ ኔ ኦሶ ኣይስ ይሲሳይ? 7 ዳሮ ኣጉሞይኔ ዳሮ ሃሳያይ ሃዳ፤ ሄሳ ጊሻስ ኔኒ ጾሳስ ያያ። 8 ዴሬ ጋርሳን ማንቆይ ሱጌቲን፥ ፒርዳይ ፓጪን፥ ማታይ ዬቲን ኔ ቤኢኮ ሄይታንታን ኬሃ ማላሌቶፋ። ኢሲ ኢሲ ሃላቃስ ኢዛፔ ቦላራ ሃላቃይ ዴስ፤ ቃሴ ኡባታፔ ቦላራ ሃራ ሃላቃቲ ዴቴስ። 9 ቢታፌ ቤቲዛ ጎኣይ ኡባሳ፤ ካዎይካ ባ ሁኤስ ሄሳፌ ጎኤቴስ። 10 ቢራ ሲቂዛ ኣሳስ ቢራይ ጊዲ ኤሬና፤ ዱሬቴ ኮይዛ ኣሲ ዱሬቲዲካ ካሊ ኤሬና፤ ሄሲ ኡባይካ ሃዳ። 11 ኣቆታይ ዳሪ ዳሪ ቢሺን ሚዛይ ዳሬስ፤ ሃሪዳዴስ ኣይፌን ቤኦፔ ሃራ ኣዛ ጎኣይ ዲዜ? 12 ኦሶ ኦዛ ኣሲ ጉ ሚኮ፥ ዳሮ ሚኮ ሳሮ ስኮ ስኪ ኣቄስ፤ ጊዶ ኣቲን ዱሬ ኣስ ዱሬቴ ስኮ ዲጌስ። 13 ሳሎ ጉፋንን ኬሂ ጬጬሲዛ ኢታ ሚሽ ታ ቤኣዲስ፤ ሄሲካ ኢታ ዎዴን ባና ማዶ ጊዲ ኣሲ ጉዬ ዬጊ ዳጋሲዳ ሚሺ ኢዛዴስ ሜቶ፤ 14 ዎይኮ ኢሲ ጋሶን ጮ ይዛ ዱሬቴ። ኢዚ ና ዬሊኮካ ሄ ዬሌቲዳይሳስ ላቲሲዛ ሚሺ ዴና። 15 ኣሲ ባ ኣዪ ኡሎፔ ካሎ ዬሌቲዳ ማላ ካሎ ቤስ፤ ኣይ ኬና ዳቡርኮካ ኢዚ ባ ዳቡርዳይሳፌ ኣይኮካ ኤኪቤና። 16 ሄሲካ ኬሂፔ ኢታ፤ ኣሲ ባ ዪዳ ማላ ሲሚ ቤስ፤ ኢዛ ዳቡራ ኡባይ ጫርኮ ኦይኪዛ ማላ ሃዳ ጊዲዛ ጊዲኮ ኢዛስ ኣይ ጎኣይ ዲዜ? 17 ኢዚ ባ ላይ ኡባ ጬጬን፥ ዋዬን፥ ዪሎኒኔ ማ ዱሳን ዉርሴስ። 18 ኣሳ ቃዳይ ሄሳ ጊዲዳ ጊሻስ ሳሎ ጉፋንን ጾሲ ኣሲ ዴኣና ማላ ኢሚዳ ቃን ላይ ጋርሳን ኣሲ ባ ዳቡርዳ ዳቡራፔ ሙሲኔ ኡሺ ሎኦኔ ቤሲዛይሳ ጊዲዳይሳ ታ ኣኬካዲስ። 19 ጾሳይ ኣሳስ ዱሬቴኔ ኣቆ ኢሚዛይ ባ ዳቡርዳ ዋጋ ዴሚዲ ሚዲኔ ኡዪዲ ኡፋዬታናሳ። ሄሲ ጾሳፌ ኢዛስ ኢሜቲዳ ኢሞታ። 20 ጾሳይ ኢዛ ዎዚናን ኡባ ዎዴ ኡፋይስ ኩን ዎዛ ጊሻስ ኢዚ ባ ዴኦ ላይስ ዳሮ ሂርጌና።