ኢሳያሳ ቲንቢቴ 10

1 ጌላ ዎጋኔ ኣስ ኡንኤዛ ኣዋጃ ኬሲዛይታስ ኣዬ ኣና! 2 ማንቆታ ፒርዳ ጌላሲዛይታስ፥ ኡንኤቲዳ ታ ዴሬዛ ፒርዳ ቦካሲዛይታስ፥ ኣምኤታ ኣቆታ ቦንቂዛይታስ፥ ዪኦታ ኣቆታ ቺ ሚዛይታስ ኣዬ ኣና! 3 ኢንቴና ጾሞሲዛ ዎዴ ኢንቴ ኣዋ ጌላንዴቲ? ሃኮፔ ባሺ ዪዛ ዎዴ ኣይ ሃናንዴቲ? ማዶ ዴማናስ ኦናኮ ባቃታንዴቲ? ኢንቴ ኣቆታ ኣዋን ቆታንዴቲ? 4 ቃሼቲዳ ኣሳራ ኢሲፌ ቃሼቴፌ ሹኬቲዛ ኣሳራ ኢሲፌ ሹኬቴፌ ኣቲን ሃራይ ኢንቴስ ኣታናሶይ ዴና። ሄሲ ኡባይ ሃኒንካ ጎዳ ሃንቆይ ዶቺቤና፤ ቃጻያናስ ኢዚ ባ ኩሼ ዴን ዎዴስ። 5 ጎዳይ፥ «ታ ሃንቆስ ጉፌ፥ ታ ኤሂዛ ባሻስ ጻምኣ ጊዲዳ ኣሶሬ ቢታ ኣሳስ ኣዬ ኣና! 6 ኢስታ ኣቆታ ቦንቃና ማላ፥ ባንታስ ዲኦ ቡሪ ሺሻና ማላ፥ ኢስቲ ኦጌ ኡርቃ ዬታና ማላ፥ ጾስ ኤሮንታ ካዎቴ ቦላ ኪታና። ታና ሃንቄዳ ኣሳ ቦላ ታኒ ኣሶሬታ ዬዳና። 7 ጊዶ ኣቲን ኣሶሬ ካዎይ ሃይሳ ሃልቺቤና፤ ኢዛ ዎዚናን ሃይሳ ማላ ቆፋይ ዴና፤ ኢዛ ሃልቾይ ዳሮ ካዎቴታ ባሻናሲኔ ሙሌራ ይሳናሳ። 8 ኢዚ፥ ‹ታ ኦላ ጋዳዋቲ ኡባቲ ካዎ ጊዴቴኔ?› ጊ ጬቄቴስ። 9 ‹ካልኖይ ካርካሚሼ ማላ፥ ሃማቴይ ኣርፋዴ ማላ፥ ሳማሪያይካ ዳማስቆ ማላ ጊዴቴኔ? 10 ዬሩሳላሜኒኔ ሳማሪያን ዴኢዛ ኤቃ ሚስሌታፔ ዳሪዛ ሚስሌታ ጎይኒዛ ካዎቴታ ሴራናስ ታኒ ታ ኩሼ ዬዳዲስ። 11 ሳማሪያ ቦላኒኔ ኢዚ ሚስሌታ ቦላ ታ ኦይሳ ዬሩሳላሜ ቦላኔ ኢዚ ሚስሌታ ቦላ ታ ኦኪና?› ጌስ» ጊዴስ። 12 ጎዳይ ጺዮኔ ዙማ ቦላኔ ዬሩሳላሜ ቦላ ባ ኦና ኦሶ ኡባ ፖሊዳፔ ጉዬ፥ «ኣሶሬ ካዎ ኢዛ ዎዚና ኦቶሬቴ ጊሻሲኔ ኢዚ ካ ኣይፌን ጼሊዛ ጊሻስ ታ ኢዛ ቃጻያና» ጌስ። 13 ኣሶሬ ካዎይ፥ «ሃይሳ ኡባ ታኒ ታ ሚኖ ቄሴን ኦዲስ፤ ቃሴካ ታኒ ኣ ኤራንቻኔ ኣኬካንቻ፤ ታኒ ካዎቴታ ዛዋ ላላዲስ፤ ታኒ ኢስታ ኣቆታ ቦንቃ ኤካዲስ፤ ታ ቃራቴን ኢስታ ካዎታ ካዉሻዲስ። 14 ኣሲ ባ ኩሼ ካፎ ኬን ዬዲዛ ማላ ታኒካ ታ ኩሼ ካዎቴታ ኣቆታን ዬዳዲስ። ቃሴ ኣሲ ዶጌቲ ኣቲዳ ጱጱሌታ ሺሺዛ ማላ ታኒካ ዴሬ ኡባ ሺሻዲስ። ፓላናስ ባ ቄፌ ሚጪዳይ ዴና፤ ዋሳናስ ባ ዶና ዶይዳይ ዴና» ጊዴስ። 15 ካልታይ ባናን ቃንጺዛዴ ቦላ ጬቄቲዜ? ማጋዜይ ባና ጎቺዛዴ ቦላ ኦቶሬቲዜ? ጻምኣይ ባና ኦይኪዳ ኣሳ ቦላ ባ ሁኤ ቃና ዳንዳይዜ? ጉፌይ ኣሲ ባይንዳ ባርካ ሄሜቲ ኤሪዜ? 16 ሄሳ ጊሻስ ጎዳይ፥ ኡባፌ ዎልቃማ ጎዳይ፥ ሞዳ ኢዛ ኦላንቻታ ቦላ ጊልቂሲዛ ሃርጌ ዬዳና፤ ኢዛ ቦንቾዛፔ ጋርሳራ ላጪዛ ታማ ዬዳና። 17 ኢስራኤሌ ፖኦይ ታማ ጊዳና፤ ጌሻዚካ ታማ ላጮ ጊዳና፤ ኢሲ ጋላሳን ኢዛ ኣጉንኔ ኪንዲቾዛ ታማይ ማና። 18 ሃርጋንቻይ ጊልቂዲ ሃይቂዛ ማላ ባ ዎራ ቦንቾኔ ኣራዳ ቢታ፥ ኣሾኔ ሼምፖ ሙሌራ ይሳና። 19 ኢዛ ዎራን ጉ ሚቲ ጫሻ ኣታና፤ ሄይታካ ቄሪ ናይ ቆዲ ዉርሳና ዳዳዬስ። 20 ሄ ዎዴ ኢስራኤሌ ዛሬፔ ጫሻ ኣቲዳይቲ፥ ያቆቤ ኬፌ ኣቲዳይቲ ሃይሳፌ ጉዬ ባንታና ሾጪዳይታ ቦላ ዜምፔቴና፤ ጊዶ ኣቲን ጎዳን ኢስራኤሌ ጌሻን ቱማፔ ኣማኔታና። 21 ጫሻ ኣቲዳይቲ ሲማና፤ ያቆቤ ኬፌ ጫሻ ኣቲዳይቲ ኡባፌ ዎልቃማ ጾሳኮ ሲማና። 22 ኔኖ ኢስራኤሌ! ኔ ኣሳይ ኣባ ሻሚንታ ማላ ጊዲኮካ ጫሻ ኣቲዳይቲ ጻላ ሲማና። ጺሎቴን ኩሚዳ ጊታ ባሺ ኣዋጄቲዴስ። 23 ጎዳይ፥ ኡባፌ ዎልቃማ ጎዳይ ሳኣ ኡባ ቦላን ኤሃና ቃቺዳ ባሽ ኤሃና። 24 ሄሳ ጊሻስ ጎዳይ፥ ኡባፌ ዎልቃማ ጎዳይ፥ «ጺዮኔን ዲዛ ታ ዴሬዞ! ጊብጼቲ ኔ ቦላ ኦዳይሳ ጉፌ ኔ ቦላ ዴንዳይታ ዱርቃን ኔና ቆጺዳ ኣሶሬ ኣሳስ ባቦፋ። 25 ታ ኔ ቦላ ኤሂዳ ቂጻቴዛ ጉ ዎዴ ጋርሳን ታ ኤሳና፤ ታ ኢስታ ቦላካ ቦሻ ኤሃና» ጌስ። 26 ኡባፌ ዎልቃማ ጎዳይ፥ «ሚዲያሜ ኣሳ ሄሬቤ ዛላ ኣቻን ሾጮይሳ ኢዚ ኢስታ ጹርቃፌራ ዋና፤ ኢዚ ጊብጼታ ቦላ ኦዳይሳ ባ ጉፌዛ ኣባ ቦላ ዴንና። 27 ሄ ጋላስ ኢስታ ቶሆይ ኔ ሃሼፔ፥ ኢስታ ቃምባራይ ኔ ሞርጌፌ ኪቻና፤ ኔ ኦርዴቴፌ ዴንዲዳይሳን ኢዛ ቃምባራይ ሜቃና» ጌስ። 28 ኢስቲ ኣያቴራ ቢዲ ሚጌሮኔ ካን ቤቴስ፤ ባስ ዲዛ ሚሻ ማኪማሴን ሺሼቴስ። 29 ኢስቲ ፒኒዛሶራ ኣ ቢዲ፥ ኑኒ ጌባን ዱንካኒ ኣቃና፤ ኤራማይ ዳጋማዱስ፤ ሳኦሌ ካታማ ጊቢኣይ ባቃታዱስ። 30 ጋሊሜ ናዬ ኔ ዋሳ! ላይሻ ኤዝጋ ሲያ! ማንቆ ጊዲዳ ኣናቶቴ፥ ኔ ኢዚስ ዛሮ ኢማ። 31 ማዲሜናሃ ባቃታ ቦላ ዳዉስ፤ ጌባ ዴሬይ ቆቴታና ዎን ዴስ። 32 ኢስቲ ሃች ኖቤ ጋካና፤ ኢስቲ ባንታ ኩሼ ዬሩሳላሜ ዙምቡላ ቦላ፥ ጺዮኔ ማጫ ናይ ዙማ ቦላ ጬቄቴን ማንዳና። 33 ቤኢቴ ጎዳይ፥ ኡባፌ ዎልቃማ ጎዳይ ባ ጊታ ዎልቃን ሃጋታ ቃንጼሬና፤ ኣዱሳ ሚቲካ ሺሬቲ ዎና፤ ቁ ቁ ጊዳይቲካ ኩንዳና። 34 ጊርዲ ጊዳ ዎራካ ካልታራ ቄጻና፤ ሊባኖሴ ዚጋቲካ ዎልቃማዛ ሲንን ኩንዳና።