ኢዮቤ ማጻፋ 30

1 «ኢስታ ኣዋቲ ታስ ዶርሳ ዉዴዛ ሄሚዛ ታ ካናታራ ሞንታ ማላ ኢስቲ ታ ካዛ ኣሳታኮሺን፤ ሃኢ ጊዲኮ ላይን ታፔ ናቲዛ ኣሳቲ ታ ቦላ ቂልጬቴስ። 2 ኢስታስ ዎልቃይ ኢጺዳ ጊሻሲኔ ኢስታ ቦላይ ጊልቂዳ ጊሻስ ኣይኮካ ታና ጎኤቴና። 3 ሜቶፔኔ ኮሻ ዳሮፔ ዴንዲዳይሳን ባዞ ቢታ ቢ ቢዲ ሚ ጻጶ ማጼ ጋንጬቴስ። 4 ማጺኔ ማላ ማልኢዛ ባዞን ሞኪዛ ዱማ ዱማ ሚ ሃይታ ማጼቴስ፤ ማልኦንታ ሳንካራ ጻጶ ቆሬሬ ሜቴስ። 5 ኣሲ ካይሶታ ዋሲዲ ጎዲዛይሳ ማላ ኢስቲካ ዴራ ጊዶፌ ጎዴቴስ። 6 ኢስቲ ባንታ ዱሳሶ ሃ ባይንዳ ሻፋ ጊዶን፥ ኣሲ ባይንዳ ባዞ ቢታኒኔ ኬልካ ጊዶን ቦኬቲዳ ጎንጎሎታን ዶሳይ ባይንዳ ዴኢዳ። 7 ዎራይ ዲዛሶ ዩዪ ዩዪ ዎራ ዶኣታ ማላ ዋሴቴስ፤ ዎራ ጋርሳን ኢሲ ቦላ ሺቄቲ ኣቄቴስ። 8 ባንታ ቢታፌ ጹርቃፌን ሾጬቲ ጎዴቲዳ ጊሻስ ሎኦ ሱንኔ ዎዚናይ ባይንዳይታ ጊዲዲ ዴቴስ። 9 ሃኢ ቃሴ ኢስታ ናይቲ ዬን ታና ቂቴስ፤ ታኒ ኢስታ ጊዶንካ ሚጬቴስ ኣታዲስ። 10 ታና ሻቴቲዲ ታፔ ሃኬቴስ፤ ኣይኮ ዬላይካ ባይንዳ ታ ሲንን ጩቴቴቴስ። 11 ጾሳይ ታ ዎልቃ ዳቡርሲዲ ታና ካዉሺዳ ጊሻስ ኢስቲ ቃሴ ቢጻላይ ባይንዳ ፓራ ማላ ታ ቦላ  ቴስ። 12 ታፔ ኡሻቻ ባጋራ ዬዳ ዲጪዳይቲ ታ ቦላ ዴንዲዳ፤ ታና ኦይካናስ ዎጺማዴ ዎዳ፤ ታና ጊዶዳ። 13 ታስ ኣዛሶ ይሲዲ ታና ዎና ኮዬቴስ። ኢስቲ ሃይሳ ኦናይሳ ዲጋናዴይ ዴና። 14 ዲኦይ ሜን ጌሊዛይሳ ማላ ኢስቲካ ታና ጩጊ ጌሊዳ፤ ኡባካ ሜንሬዲ ታ ቦላ ዪዳ። 15 ጊታ ዳጋማይ ታና ጋኪዴስ፤ ታስ ዲዛ ቦንቾይ ጫርኮ ማላ ኣዴስ፤ ታ ኣታና ጊዛ ሂዶታይ ሻራ ማላ ዴንዲ ይዴስ። 16 «ታ ሼምፖያ ኬሃ ጬጫዱስ፤ ሃይቆስካ ማታዱስ። 17 ኦማርስ ኩሜ ታ ሜቄቲ ሃርጌን ዋዬቴቴስ፤ ሳኮዚካ ታስ ሼምፖ ኢሜና። 18 ታና ሳኪዛ ዎልቃማ ሳኮዛ ጋሶን ታ ማይኦይ ጉንዲ ሞሬቲዴስ፤ ቆ ጹን ሻሚዜ ማላ ታና ጩሊ ኦይኪዴስ። 19 ጾሲ ታና ዱጌ ቢታን ኦሊዳ ጊሻስ ታኒ ጉዱላኔ ቢዲን ሚሳታዲስ። 20 ጾሶ፥ ታ ኔና ዎሳዲስ፤ ጊዶ ኣቲን ኔ ታስ ዛራቤካ፤ ታ ኤቃዳ ኔኮ ዎሳዲስ፤ ኔኒ ጊዲኮ ኔ ሲን ታኮ ዛራቤካ። 21 ኔ ታስ ኣዳፌ ሜንጼ ኢታዳሳ፤ ኔኒ ኔ ጊታ ዎልቃንካ ታና ጎዳዳሳ። 22 ኔ ታና ዴንዳ ጫርኮ ቦላ ዎዳሳ፤ ኢዚ ታና ዩሻና ማላካ ኦዳሳ፤ ጎቴ ጫርኮይካ ታና ሺሬቺ ሺሬቺ ዬጌስ። 23 ኣሳ ኡባስ ቃዳ ጊዲዳ ሃይቆስ ኔ ታና ኣዳ ኢማናይሳ ታ ኤራይስ። 24 «ኢሲ ሜቶቲዳ ኡራይ ማዶ ዴማናስ ባ ኩሼ ሚጪዲ ዎሲሺን ቱማፔ ኣይ ኣሲካ ኢዛ ቆሄና። 25 ታኒ ሜቶቲዳ ኣሳታስ ዬካቤኪና? ማንቆታስካ ሚሼታቤኪና? 26 ሎኦ ሚሽ ዴማና ጋ ታ ናጊሺን ኢታ ሚሺ ታና ጋኪዴስ፤ ፖኦይ ያና ጋ ታ ናጌቲሺን ታስ ጋላሳይ ሚዴስ። 27 ታ ዎዚናይ ዳሮ ጬጪዴስ፤ ኣይ ሳሮካ ዴማቤኬ፤ ሜቶ ጋላሳቲካ ታ ቦላ ጋኪዳ። 28 ታ ቦላይ ኣዋ ጹሳን ጊዶንታ ሙዞቴን ካሬጺዴስ፤ ዱላታ ኣሳ ሲንን ኤቃዳ ማዶ ታስ ኦይቻይስ። 29 ኣሳፔ ሻኬታዳ ዎራካናታስ ኢሻ፥ ጉቶታስ ላጌ ጊዳዲስ። 30 ታስ ጋልባዚ ካሬጺዲ ዴንዲዴስ፤ ታስ ቦላዚካ ሚሻን ጹጌቲዴስ። 31 ታኒ ታ ኡፋይስ ኢስታን ቆንጪሲዛ ባጋናኔ ዛዬይ ሃኢ ታ ካዮታዳ ኬሲዛ ዚላሳ ቃላ ሲሲዛ ሚሽ ጊዲዳ።