ኢዩኤሌ ቲንቢቴ 1

1 ሲንፌ ሃናናይሳ ጾሲ ኢዩኤሌስ ዮቲዳ ቃላይ ሃይሳ፤ 2 ኢንቴ ጪማቲ ሃይሳ ሲዪቴ፤ ዩሁዳ ዴሬን ዲዛይቲ ዉሪካ ሃይሳ ኤዝጊ ሲዪቴ። ሃይሳ ማላ ሃኖይ ካሴ ኢንቴ ዎዴ ጊዲን ዎይኮ ካሴ ኢንቴ ኣዋታ ዎዴ ሃኒ ኤሪዜ? 3 ኢንቴ ሃይሳ ኢንቴ ናይታስ ዮቲቴ፤ ኢንቴ ናይቲ ቃሴ ባንታ ናይታስ ዮቴቶ፤ ናይታ ናይቲካ ካሊዛ ዬሌታስ ዮቴቶ። 4 ጎንዶይ ሚሺን ኣቲዳ ካ ቢታ ማቴ ቦሌይ ሚዴስ፤ ኢዛፔ ኣቲዳይሳ ኡሾ ጫርኮ ሾጪዛ ዲኦ ማላ ቦሌይ ይሲዴስ፤ ኢዛፔ ኣቲዳይሳ ቃሴ ጉምባሮይ ሚዴስ። 5 ሄሳፌ ጉዬ ዎይኔ ኡሹ ኢንቴ ዴሞንታ ጊሻስ ዬኪቴ፤ ኢንቴኖ ማቲዛይቶ! ኢንቴ ስኪዛሶፔ ቤጊዲ ዋሲቴ፤ ኢንቴኖ ዎንታን ዎንታን ዎይኔ ኡሹ ኡዪዛይቶ! ጫሞ ዬሆ ዬኪቴ። 6 ቆዳይ ባይንዳ ቦሌይ ኦላ ኣሳ ማላ ታ ዴሬዛ ቦላ ዪዴስ፤ ኢዛ ኣቻይ ጋሞ ኣቻ ማላ፤ ኢዛ ጋጊና ኣቻይ ማጫ ጋሞ ጋጊና ኣቻ ማላ። 7 ታ ዎይኔ ሚ ኣይፌዛ ሙሌራ ይሲዴስ፤ ባላሴ ጌቴቲዛ ሚ ኡባ ሜንሬዴስ፤ ሚ ሃጋቲ ሙሌራ ቦጻና ጋካናስ ፖቆዛ ሙሌራ ፖቂ ዴንቺዴስ። 8 ሄሳ ጊሻስ ኢዞ ኤካና ጊግሲዳይሲ ሃይቂን ማቃ ማይኣዳ ዬኪዛ ጌላኦይ ማላ ኢንቴካ ዬኪቴ። 9 ጎዳ ኬን ያርሾስ ሺቃና ካ ጊዲን ዎይኮ ዎይኔ ኡሻይ ባይንዳ ጊሻስ ጎዳስ ኦዛ ቄሴቲ ዬኬቴስ። 10 ጎዪዲ ዜሪዳ ካይ ሜሊ ዪን ዎይኔ ሚይ ቶኬቲዲ ሜሊዳ ጊሻስ ዛይቴይ ይዴስ፤ ሄሳ ጊሻስ ቢታያ ዬካዉስ። 11 ጊስቴይኔ ባንጋይ ሃራይካ ቦኔ ካ ዉሪካ ይዳ ጊሻስ ኢንቴኖ ጎሻንቻቶ ጬጪቴ፤ ኢንቴኖ፥ ዎይኔ ሚታ ጎዳቲካ ዬኪቴ። 12 ዎይኔ ሚቲኔ ባላሴ ሚቲ ሹሊዳ፤ ኦሮማኔኔ ቴሚሬ ሚቲ፥ ላዴይኔ ሃራ ኣይፌ ኣይፊዛ ሚቲ ዉሪካ ሜሊዳ፤ ሄሳ ጋሶን ኣዳፌ ኡፋይሲ ኣሳፔ ሃኪዴስ። 13 ኢንቴ ኢንቴ ጾሳ ያርሾ ሺሺዛ ካ ጊዲን ዎይኮ ዎይኔ ኡሺ ባይንዳ ጊሻስ ኢንቴኖ ታ ጎዳ ኦሳንቻታ ጊዲዳ ቄሴቶ! ኣኔ ሃ ዪዲ ማቃ ማይኢዲ ኩሜ ኦማርስ ዬኪቴ። ኢንቴኖ ያርሾ ያርሺዛሶን ኦዛይቶ! ኢንቴ፥ «ዉ! ዉይ!» ጊ ዋሲቴ። 14 ዱማ ጾማ ጋላስ ኣዋጂቴ፤ ኣያና ሺቆስ ኣሳ ጼይጊቴ፤ ዴሬን ዲዛ ጪማታኔ ኣሳ ኡባ ኑ ጎዳ ኬን ሺሺዲ ፑዴ ጎዳኮ ዋሲቴ። 15 ኣዬ ኣና! ጎዳ ጋላሲ ማቲዴስ። ኡባ ዳንዳይዛ ጾሳይ ይሲዛዝ ኤሂዛ ጋላሲ ጋኪዴስ። ሄ ጋላሳይስ ኣዬ ኣና! 16 ካ ኑ ሲንፌ ይዴስ፤ ኡፋይሲኔ ኢሊሲ ኑ ጾሳ ኬፌ ሙሌ ይዴስ። 17 ዜሬቲዳ ካይ ዉሪ ቢታ ጋርሳን ዎቂ ይዴስ፤ ካ ቢታፌ ይዳ ጊሻስ ካሴ ካ ዎዛ ሚሻቲ ዉሪካ ሜላ ዴቴስ። ጎታራቲካ ላሌቲዳ። 18 ሜሄይ ሚዛ ማታይ ጋዴን ባይንዳ ጊሻስ ሜሄቲ ኮሻቲዲ ዋሴቴስ፤ ዶርሳ ዉዴቲካ ማታይ ዪን ዳሮ ዋዬ ቦላ ዴቴስ። 19 ጎዳዉ! ዴምባ ማታ ኡባ ታማይ ሚዳ ጊሻስ ዎራ ሚካ ታማይ ሚዳ ጊሻስ ታ ኔኮ ዋሳይስ። 20 ሻፋቲ ሜሊዳ ጊሻስ ዴምባን ዲዛ ማታይ ዉሪካ ጹጌቲዳ ጊሻስ ዎራ ዶኣቲካ ኔኮ ዋሴቴስ።