ሌሚሶ ማጻፋ 28

1 ኢታ ኣሲ ኦኒካ ዬዴንታ ባቃቴስ፤ ጊዶ ኣቲን ጺሎይ ጋሞ ማላ ዎዚና ኩሜ። 2 ዴሬይ ማካሊኮ ሃሪዛይ ጮራቴስ፤ ጊዶ ኣቲን ኤራ ኣሲኔ ኣኬኪዛ ኣሲ ዎጋ ኤሴስ። 3 ሂዬሳታ ኡንኤዛ ዳናይ ካ ይሲዛ ዎልቃማ ኢራ ማላ። 4 ዎጋ ቦንቾንታ ኣሲ ሞራንቻታ ሳቤስ፤ ጊዶ ኣቲን ዎጋ ቦንቺዛይ ኢስታ ቆፋ ፓልቄስ። 5 ኢታ ኣሳታስ ሱሬ ፒርዳይ ጌሌና፤ ጊዶ ኣቲን ጎዳስ ጎይኒዛይቲ ኡባካ ኤሬቴስ። 6 ጌላ ኣስ ጊዲ ኡቲዲ ዱሬ ጊዳናፔ ቦሬይ ባይንዳ ሂዬሳ ጊዴ ሎኦ። 7 ዎጋ ናጊዛ ናይ ኣኬካንቻ፤ ጊዶ ኣቲን ጋንጃማታራ ዙፔቲዛይ ባ ኣዋ ዬላሴስ። 8 ቤሶንታ ዲሾን ባ ኣቆታ ዳጋሲዛ ኣሲ ሄ ኣቆታ ሂዬሳስ ኪዪዛ ኣሳስ ሺሼስ። 9 ዎጋ ሲያናፔ ባ ሃይ ዎራ ዛሪዛ ኣሳ ዎሳይ ጾሳ ሃራሴስ። 10 ሱሬታ ኢታ ኦጌ ካሌዛ ኣሲ ባ ቦኪዳ ኦላን ኩንዳና፤ ጊዶ ኣቲን ጌሻ ኣሲ ሎኦ ሚሽ ላታና። 11 ዱሬ ኣሲ ባና ኣ ኤራንቻ ጊዲ ቆፔስ፤ ጊዶ ኣቲን ኣኬካይ ዴኢዛ ሂዬሳይ ኢዛ ፓጬስ። 12 ጺሎቲ ጾኒዳ ዎዴ ኣሳይ ኡባይ ኡፋዬቴስ፤ ጊዶ ኣቲን ኢታቲ ማታ ኦይኪዳ ዎዴ ኣሳይ ባቃቴስ። 13 ባ ናጋራ ጌንዛ ኣሲ ኣጬና፤ ጊዶ ኣቲን ፓጺዛይኔ ናጋራ ኣጊዛይ ማሬታና። 14 ጎዳስ ኡባቶ ያዪዛ ኣሲ ኣንጄቲዳዴ፤ ጊዶ ኣቲን ባ ዎዚና ዳማሲዛ ኣሲ ሜቶን ጌላና። 15 ሂዬሳ ሃሪዛ ኢታ ዳናይ ጻጊዛ ጋሞኔ ጉፒ ኦይኪዛ ዛርዶ ማላ። 16 ዎዚናይ ፓጪዳ ዳናይ ሜንጼ ኢቴስ፤ ጊዶ ኣቲን ቤሶንታ ጎኣ ኢጺዛዴይ ዳሮ ላይ ዴኤስ። 17 ኣስ ዎዳ ኣሲ ሃይቃና ጋካናስ ቶይላቲሼ ዴስ፤ ኢዛ ኦኒካ ሺሺ ኤኬና። 18 ቦሬይ ባይንዳ ሄሜቲዛ ኣሲ ቆሄቶንታ ኣታና፤ ጊዶ ኣቲን ጌላ ኣሲ ኢሲ ጋላስ ኩንዳና። 19 ባ ጋዴ ጎዪዛ ሚኖ ኣሲ ካ ካሌስ፤ ጊዶ ኣቲን ሃዳ ዮኦ ካሊዛ ኣሲ ማንቆቴፌ ኬኤና። 20 ኣማኔቲዳ ኣሲ ኬሂ ኣንጄታና፤ ጊዶ ኣቲን ዱሬታናስ ጃሚዛይ ቃጻዬቶንታ ኣቴና። 21 ሻኪዲ ማዶይ ሎኤና፤ ጊዶ ኣቲን ኣሲ ጉ ካስ ጊዲ ሞሮ ኦስ። 22 ኡዜቲዛ ኣሲ ዱሬታናስ ጃሜስ፤ ባና ሂዬሳቴ ኦይካናይሳካ ኤሬና። 23 ኣስ ጮ ሳቢዛ ኣሳፔ ሴሪዛ ኣሲ ጉዬፔ ዶሴቴስ። 24 ባ ኣዋፔኔ ባ ኣይፔ ካይሲዲ፥ «ታኒ ኣይኮካ ናጋራ ኦቤኬ» ጊዛ ኣሲ ባሺዛ ኣሳራ ኢሲ ማላ። 25 ዪቄይ ኣሲ ኦሽ ዴንስ፤ ጊዶ ኣቲን ጎዳን ኣማኔቲዛይ ኣንጄቴስ። 26 ባናን ኣማኔቲዛ ኣሲ ኤያ፤ ጊዶ ኣቲን ኣ ኤራቴን ሄሜቲዛይ ሳሮን ዴኤስ። 27 ሂዬሳስ ኢሚዛ ኣሳስ ፓጬና፤ ጊዶ ኣቲን ኢስቲ ቤኢሼ ቤኦንታ ሃኒዛዴ ቃንጌ ጋካና። 28 ኢታ ኣሳቲ ማታ ዴሚዛ ዎዴ ዴሬይ ባቃቴስ፤ ጊዶ ኣቲን ኢስቲ ይዛ ዎዴ ጺሎቲ ጮራቴቴስ።