ሌሚሶ ማጻፋ 7

1 ታ ናዞ! ታ ቃላ ናጋ፤ ታ ኣዛዞካ ኔ ዎዚናን ቁምኣ ኦይካ። 2 ኔ ፓጻ ዴኣና ማላ ታ ኣዛዞታ ናጋ፤ ታ ቲሚርቴዛካ ኔ ኣይፌ ጪሮ ማላ ናጋ። 3 ሃይታ ኔ ቢራታን ቃቻ፤ ኔ ዎዚናንካ ጻፋ። 4 ኣ ኤራቴ ኔ ታስ ሚቾ ጋ፤ ኣኬካካ ኔ ታስ ዳቦ ጋ። 5 ኢስቲ ኔና ላይማ ማጫሳፌኔ ባ ቃላን ባሌዛ ሃዉሻ ማጫሳፌ ናጋና። 6 ኢሲ ጋላስ ታኒ ታ ኬ ማስኮቴዛራ ካሬ ጼላዲስ። 7 ኣኬካይ ፓጪዳ ዬላጋታ ቤኣዲስ። ኢስታ ጊዶፌ ኢሶይ ኬሂ ኤያ። 8 ሄ ዎዳላይ ኢዚ ሶ ኤፊዛ ኦጌ ባጋራ ኦይኪ ቢሼ ኢዚ ኬ ኣቻራ ኣ ቢሺን፥ 9 ሄ ዎዴ ሳኣይ ቃማናስ ላንኪላንኪሺን፥ ማይ ኣይፌ ኦይኪሺን፥ 10 ኢሲ ማጫሳያ ኢዛ ዴማናስ ኬዛዱስ፤ ላይማ ማጫሳ ማይኦ ማይኣዳ ባሌናስ ሙርታ ኬዛዱስ። 11 ኢዛ ጻላኔ ዬላይ ባይንዳ ማጫሳ፤ ሶሆን ዎፑ ጋዳ ኡቱኩ። 12 ኢዛ ኢሲቶ ኦጌን፥ ኢሲቶ ጉላን፥ ኢሲቶ ዱቡሻን ኤቃዳ ናጋዉስ። 13 ኢዛ ሄ ናዛ ሺሻ ኦይካዳ ዬራዉስ፤ ዬላይ ባይንዳ ኢዛ ኣይፌ ቲሺ ሂስታ ጼላሼ፥ 14 «ታኒ ታሶን ኢሲፌቴ ያርሾ ያርሻናስ ቤሴስ፤ ታኒ ታ ኣዲና ሃች ፖላዲስ። 15 ሂስታዳ ኔና ጼላናዉ ኬኣዲስ፤ ኔና ኬሃ ኮያዲስ፤ ሃኢ ቤያ ኔና ዴማዲስ። 16 ታኒ ጊብጼፔ ዪዳ ኣሌቂሲዛ ኣንሶላካ ታ ሂጻን ዬጋዲስ። 17 ታኒ ካርቤ፥ ኣልሙኒዬሜኔ ቃራፋ ጌቴቲዛ ሳዎታፔ ኦሴቲዳ ሺቶ ታ ሂጻን ጫጫፋዲስ። 18 ሃ ያ፤ ኣኔ ዎንታና ጋካናስ ሲቆ ኣሎስ፤ ቆሜቲዲካ ኡፋዬቶስ። 19 ታ ኬዋይ ሶን ዴና፤ ሃኮ ዴሬ ቢዴስ። 20 ሚሽ ካራጺቴ ኩን ኤኪ ቢዳ ጊሻስ ኣጊናይ ዶርስ ዳጋንንታ ሲሜና» ጋዱስ። 21 ሂስታዳ ባ ማልኦ ሃሳያን ኢዛ ባሌዱስ፤ ባ ሊቆ ኢንጻርሳንካ ጪማዱስ። 22 ሹካስ ላጌቲ ቢዛ ቦራ ማላ፥ ዎጺማዴን ኦይኬታና ቢዛ ጮፎሾ ማላ ሄራካ ኣሙሶንታ ኢዞ ካሊዲ ቢዴስ። 23 ዎንዳፌ ዪሺ ኢዛ ቲሬ ጫዳና ጋካናስ፥ ኢዛ ሼምፖ ይሳናይሳ ኤሮንታ ዲሼ ፒራዲ ያርዴን ጌሊዛ ካፎ ማላ ጊዲዴስ። 24 ታ ናዞ! ኣኔ ሃኢ ሲያ፤ ታ ዶናፔ ኬዚዛ ቃላካ ኤዝጋ። 25 ኔ ዎዚናይ ኢዚኮ ቦፖ፤ ኢዛ ቢዛ ባላ ኦጌን ጌሎፓ። 26 ኢዛ ካዉሻዳ ኦሊዳይቲ ኡንዴና፤ ኢዛ ዎዳይታ ቆዳይ ኬሂ ዳሮ። 27 ኢዚ ሶይ ዱፎን ኤፊዛ ኦጌ፤ ሄ ኦጌይ ዱጌ ሃይቆሶ ጋስ።