1 ታርከ ማፃፋ 29

1 ሄሳፈ ጉየ፥ ካዎይ ዳዊቲ ሺቅዳ አሳ ኡባ ሀይሳዳ ያግስ፤ “ፆሳይ ዶርዳ ታ ናኣ ሶሎሞነይ ዮጋነ ኤራተን ሎህቤና። ሀ ኬፀታና ኬይ አሳ ኬ ግዶናሽን ጎዳ ፆሳ ኬ ግድያ ግሾ ኦሶይ ግታ። 2 ታኒ ታዉ ደእያ ዎልቃ መላ ታ ፆሳ ኬስ ዎርቃን ኦሰትያባስ ዎርቃ፥ ብራን ኦሰትያባስ ብራ፥ ናሰ ብራታን ኦሰትያባስ፥ ናሰ ብራታ፥ ብራታን ኦሰትያባ ብራታነ ምን ኦሰትያባስ ም ጊግሳ ዎስ። ቃስ ማርግደ፥ እብነባራደ፥ ዱማ ዱማ ማል ደእያ አሌቆ ሹቻታ፥ አልኦ ሹቻታነ ሀራ ሹቻታ ጊግሳዳ ዎስ። 3 ፆሳ ኬ ታኒ ዳሮ ዶስያ ግሾ፥ ታኒ ታ ፆሳ ኬስ ጊግስዳይሳፈ ሀራ ታ ቡዞ ሻሉዋፐ ዎርቃነ ብራ እማስ። 4 ኬ ጎዳ ላንፃናዉ 100,000 ክሎ ግራመ ኦፍራ ዎርቃነ 240,000 ክሎ ግራመ ዋላህ ባይና ብራ እማስ። 5 ኩሸ ሂላንቾት ኦና ኦሶ ኡባስ ዎርቃን ኦሰትያባስ ዎርቃ፥ ብራን ኦሰትያባስ ብራ እማስ። ያትን፥ ሀች ህንተፈ ባ ሸነን ባና ጎዳስ ዱማየይ ኦኔ?” ያግስ። 6 እስራኤለ ኮቻታ ሶ አሳ ሀላቃት፥ ኮቻታ ሀላቃት፥ ሻላቃት፥ ማቶ ሀላቃትነ ካዎ ሞርናት ባንታ ሸነን ባንታዉ ደእያባ ዶሳን እምዶሶና። 7 ኤንቲ ፆሳ ኬ ኦሱዋስ 170,000 ክሎ ግራመ ዎርቃ፥ 340,000 ክሎ ግራመ ብራ፥ 620,000 ክሎ ግራመ ናሰ ብራታነ 3,000,000 ክሎ ግራመ ብራታ እምዶሶና። 8 አልኦ ሹች ደእያ አሳ ኡባይ ቡቁራ አይስያ ገድሶና ያራ ግድዳ ይኤላ ባጋራ ጎዳ ፆሳ ኬ ቡቁራ ምንጅያ ኬስ እሚስ። 9 አሳይ ባ ሸነን ባ ኩመ ዎዛናን ጎዳስ እምዳ ግሾ ኡፋይትስ፤ ካዎይ ዳዊቲካ ዳሮ ኡፋይትስ። 10 ሄሳ ግሾ፥ ዳዊቲ ደርያ ኡባ ስንን ሀይሳዳ ያግድ ጎዳ ጋላትስ፤ “አቤት ጎዳዉ፥ ኑ አዋ እስራኤለ ፆሳዉ ኔኒ መርናፐ መርናዉ ጋላተታ። 11 አቤት ጎዳዉ፥ ሳሎንነ ሳአን ደእያ ኡባይ ነባ! ግታተ፥ ዎልቅ፥ ቦንቾይ፥ ፆኖይነ አንግ ነባ! አቤት ጎዳዉ፥ ማት ነባ፤ ኔኒ ኡባፈ ቦላነ ሁጰ። 12 ዱረተነ ቦንቾይ ኔፐ ዬስ፤ ኔኒ ኡባባ ሃራሳ። ዎልቅነ ምኖተ ነ ኩሸና፤ ኔኒ አሳ ኡባ ግታነ ምኖ ኦናዉ ዳንዳኣሳ። 13 ሀእካ ኑ ፆሳዉ፥ ኑኒ ነና ጋላቶስ፤ ነ ቦንቾ ሱን ሳቦስ። 14 “ኑኒ ሀይሳ መላ እማናዉ ታነ ታ አሳይ ኦኔ? ኡባይ ኔፐ ዬስ፤ ኑኒ ነ ኩሸፐ ኤክዳባ ነዉ ዛሪድ እምዳ። 15 ካሰ ኑ አዋታዳ ኑካ ነ ስንን በተ አስነ እማ። ሀ ሳአን ኑ ደኦ ላይይ ኡፋይስ ባይና ኩያ መላ። 16 አቤት ጎዳዉ፥ ኑ ፆሳዉ፥ ነ ጌሻ ሱንስ ኑኒ ኬ ኬፃናዉ ሺሽዳ ኡባይ ነ ኩሸፐ ይዳባ፤ ኡባይ ነባ። 17 “ታ ፆሳዉ ኔኒ ዎዛና ፓጨይሳነ ሱረተ ዶሰይሳ ታኒ ኤራይስ። ታኒ ታ ዎዛና ሱረተን ታ ሸነን ሄሳ ኡባ እማስ። ሀ በሳን ደእያ ነ አሳይ ነዉ ባ ሸነን ኡፋይሳን እምዳይሳ ታኒ በአስ። 18 አቤት ጎዳዉ፥ ኑ ማይዛታ አብራሃመ፥ ይሳቃነ እስራኤለ ፆሳዉ፥ ነ አሳ ዎዛናን ሀ ግታ ሲቁዋ መርናዉ ናጋ፤ ኤንታ ዎዛና ኔኮ ዛራ። 19 ነ ዎጋ፥ ነ ኪታነ ነ ህግያ ናጋና መላነ ታኒ ቆፓዳ ጊግሳዳባን ፆሳ ኬ ኬፃና መላ ታ ናኣ ሶሎሞነስ ኩመ ዎዛና እማ” ያግድ ዎስስ። 20 ሄሳፈ ጉየ፥ ዳዊቲ ደርያኮ፥ “ጎዳ ህንተ ፆሳ ጋላትተ” ያግስ። ደረ ኡባይ ጎዳ ባንታ አዋታ ፆሳ ጋላትዶሶና። ሳአን ጉፋንድ ጎዳ ጎይንዶሶና፤ ካዋስካ ቦንቾ እምዶሶና። 21 ዎንተ ጋላስ አሳይ ያርሾነ ፁሳ ያርሾ ጎዳስ ያርሽዶሶና። ሄስካ እስ ሙኩሉ ኮርማ፥ እስ ሙኩሉ ማራዘ፥ እስ ሙኩሉ ዶርሳ ኡርገ፥ ኡሻ ያርሾነ ሀራ ዳሮ ያርሾ ያርሽዶሶና። 22 አሳይ ሄ ጋላስ ጎዳ ስንን ዳሮ ኡፋይትድ ምስነ ኡይስ። ያትድ አሳይ ካዋ ዳዊታ ናኣ ሶሎሞነ ናምአን ዛይተ ትይድ እያ ካዎተን ምንስ። ሳዶቃ ካህነ ግዳና መላ ጎዳ ስንን ትይዶሶና። 23 ሄሳፈ ጉየ፥ ሶሎሞነይ ባ አዋ ዳዊታ በሳን ጎዳ ካዎተ አራታን ኡትስ። እያዉ ኡባባይ እንጀትስ፤ እስራኤለ ኡባይ እያዉ ኪተትዶሶና። 24 ሀላቃት፥ ምኖ አሳትነ ካዋ ዳዊታ ናይት ካዋ ሶሎሞነስ ኪተታናዉ ቃላ ገልዶሶና። 25 ጎዳይ ሶሎሞነ እስራኤለ አሳ ኡባ ስንን ቁ ቁ ኦስ፤ ካሰ እስራኤለ ካዎታስ እመትቦና ቦንቾ ሶሎሞነስ እሚስ። 26 እሰየ ናአይ ዳዊቲ እስራኤለ ኡባ ቦላ ካዎትስ። 27 ዳዊቲ እስራኤለ ቦላ ኦይታሙ ላይ ካዎትስ፤ ከብሮናን ላፑን ላይ፥ የሩሳላመን ሀስታማነ ሄ ላይ ካዎትስ። 28 ዳዊቲ ዳሮ ላይ ደእድ፥ ዱረትድ፥ ቦንቸትድ፥ ሎኦ ጭምድ ሀይቅስ። እያ በሳን እያ ናአይ ሶሎሞነይ ካዎትስ። 29 ዳዊቲ ኮይሮፐ ዶምድ ዉርሰ ጋካናዉ ኦዳባይ፥ ቆንጨ በእያ ሳሜላ፥ ናብያ ናታናነ ቆንጨ በእያ ጋደ ታርከ ማፃፋን ፃፈትስ። 30 እ ዋት ሃርዳኮ፥ ዋንዳ ዎልቃማ አሴኮ፥ እ ኦዳባይ፥ እስራኤለ አሳይነ ሄራን ደእያ ካዎተት ኡባይ ሀንዳባይ ሄ ማፃፋታን ፃፈትስ።