1 ቆሮንቶሳ ኪታ 12

1 ታ እሻቶ፥ ጌሻ አያና እሞታታባ ህንተ ኤራና መላ ታ ኮያስ። 2 ህንተ ፆሳ አማኖና ዎደ ዶን ባይና ኤቃታን ጎሸትድ፥ ህንተ ኤሮና ሶ ብዳይሳ ኤሬታ። 3 ፆሳ አያናይ ካለያ አስ ኦንካ፥ “የሱሲ ባደቶ” ያገና። ቃስ ጌሻ አያናይ ካለና ደእሽን፥ ኦንካ፥ “የሱሲ ጎዳ” ጋናዉ ዳንዳኦናይሳ ህንተ ኤራና መላ ኮያይስ። 4 ዱማ ዱማ አያና እሞታት ደኦሶና፥ ሽን እሞታታ እምያ አያናይ እሱዋ። 5 ኑ ጎዳስ ኦያ ዱማ ዱማ ኦሶት ደኦሶና፥ ሽን ጎዳይ እሱዋ። 6 ኑ ጎዳስ ኦያ ዱማ ዱማ ኦገት ደኦሶና፥ ሽን ሄ ኦገታን ኦያ አሳ ኡባን ኦያ ፆሳይ እሱዋ። 7 ሽን እሱዋስ እሱዋስ እመትዳ እሞታታን ሀራታ ማዳና መላ ጌሻ አያናይ ቆንጬስ። 8 ጌሻ አያናይ እሱዋስ ጭንጫተ ኩምዳ ቃላ እሜስ፤ ቃስ እሱዋስ ኤራተ ኩምዳ ቃላ እሜስ። 9 ሄ ጌሻ አያናይ እሱዋስ አማኖ፥ ሀንኩዋስ ቃስ ፓያ ዎልቃ እሜስ። 10 ጌሻ አያናይ እሱዋስ ማላታ ኦያ ዎልቃ፥ እሱዋስ ትንብተ ኦድያ ዎልቃ እሜስ። እሱዋስ አያናፐ አያና ሻክ ኤርያ ዎልቃ፥ እሱዋስ ዱማ ዱማ ዶናን ኦድያ ዎልቃ፥ ቃስ እሱዋስ ዱማ ዱማ ዶናን ኦደትዳይሳ ብርሽያ ዎልቃ እሜስ። 11 ሽን ሀ ኡባ ኦይ ሄ እስ ጌሻ አያና። እ ኮይያ መላ እስ እስ አሳስ ዱማ ዱማ እሞታ እሜስ። 12 እስ አሳተን ዳሮ ብልተት ደኦሶና፥ ሽን ሄ ዱማ ዱማ ብልተት እስ አሳተ ግዶሶና። ሄሳዳካ፥ ክርስቶስ ዱማ ዱማ ብልተት ደእያ አሳተ መላ። 13 ኑኒ አይሁደ ግድን ግርከ ግድን አይለ ግድን ዎማኖ ግድን፥ ኡባይ እስ አሳተ ግዳናዉ ጌሻ አያናን ፃማቀትዳ። ቃስ ኑ ኡባይ እስ ጌሻ አያና ኤክዳ። 14 ኑ አሳተን ዱማ ዱማ ብልተት ደኦሶናፐ አትሽን፥ እስ ብልተ ግደና። 15 ቶሆይ፥ “ታኒ ኩሸ ግዶና ግሾ ብልተ ግድከ” ጊኮ፥ እ ሄሳ ግዳ ግሾ ብልተተይ አትዬ? 16 ሀይ፥ “ታኒ አይፈ ግዶና ግሾ ብልተ ግድከ” ጊኮ፥ እ ሄሳ ግዳ ግሾ አሳተፈ እስ ብልተ ግደይስ አትዬ? 17 አሳተ ኡባይ አይፈ ፃላላ ግድዳኮ፥ ኑ አይብን ስአኔ? ቃስ አሳተ ኡባይ ሀይ ፃላላ ግድዳኮ ኑ አይብን ስንጋኔ? 18 ሽን ፆሳይ ባ ኮይዳይሳዳ፥ አሳተ ግዶን ዱማ ዱማ ብልተታ ዎስ። 19 ኡባይ እስ ብልተ ግድዳኮ አሳተ ዋንድ ዳኔ? 20 ሽን ብልተት ዳሮ ግድኮካ፥ አሳተይ እሱዋ። 21 አይፈይ ኩሸኮ፥ “ነ ታዉ ኮሻካ” ጋናዉ ዳንዳኤና። ዎይኮ ሁጰይ ቶሆኮ፥ “ነ ታዉ ኮሻካ” ጋናዉ ዳንዳኤና። 22 ሽን ዳቡራ ዳንያ አሳተ ብልተት ኑስ አድ ኮሾሶና። 23 ቦንቾ ኮሸና ግድ ኑ ቆፕያ ኑ ብልተታፐ ባጋታ ዳሮ ቦንቾስ። ቃስ ኑ ቦርሰትያ ኑ አሳተ ብልተታ አድ ቦንችድ ናጎስ። 24 ኑ በእን ቦርሶና አሳተ ብልተታስ ቦንቾ ኮሸና። ሽን ፆሳይ ኑ አሳተ ብልተታ ዎልራ ጋሰድ ቦርስያ ብልተታስ አያ ቦንቾ እሚስ። 25 አሳተ ብልተት እሶይ እሱዋራ ሻኮ መና ዎልስ ቆፓና መላ ኦድ መስ። 26 አሳተ ብልተታፐ እሶይ ሳከትኮ ብልተት ኡባይ እያራ ሳከቶሶና። አሳተ ብልተታፐ እሶይ ቦንቸትኮ ብልተት ኡባይ እያራ ኡፋይቶሶና። 27 ህንተ ኡባይ ክርስቶሳ አሳተ፤ ቃስ ህንተ እሶይ እሶይ እያ ብልተታ። 28 ዎሳ ኬን ፆሳይ፥ ኮይሮ ሀዋረታ፥ ናምአን ናበታ፥ ሄን አስታማረታ፥ ካልድ ማላታ ኦይሳታ፥ ፓይሳታ፥ ሀራታ ማደይሳታ፥ ዎሳ ኬ አይሰይሳታነ፥ ዱማ ዱማ ዶናን ኦደተይሳታ ዎስ። 29 ኡባይ ሀዋሬ? ኡባይ ናቤ? ኡባይ አስታማሬ? ኡባይ ማላታ ኦ? 30 ኡባይ ፓዬ? ኡባይ ዱማ ዱማ ዶናን ኦዴቲ? ኡባይ ዱማ ዱማ ዶናን ኦደቶይሳ ብርሺ? 31 ሽን ኡባፈ አያ እሞታ ምንድ ኮይተ። ቃስ ኡባፈ አያ ኦግያ ታ ህንተና በሳና።