1 ካዎታ ማፃፋ 8

1 ሄሳፈ ጉየ፥ ካዎይ ሶሎሞነይ ጎዳ ታቦትያ ዳዊታ ካታማፐ፥ ፅዮነፐ ከስድ፥ ፆሳ ኬ ኤሀናዉ እስራኤለ ጭማታ፥ ኮቻታ ሀላቃታነ እስራኤለ ሶ አሳታ ካለይሳታ የሩሳላመ ካታማን ሺሽስ። 2 ኤታንማ ጌተትያ ላፑን አጌናን፥ ሻቃራ ባለይ ቦንቸትያ ዎደ እስራኤለ አሳ ኡባይ ካዋ ሶሎሞነኮ ሺቅዶሶና። 3 እስራኤለ ጭማት ኡባይ ሺቅን፥ ካህነት ታቦትያ ደንዶሶና። 4 ሌወትነ ካህነት፥ ጎዳ ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና። 5 ካዎይ ሶሎሞነይነ እያራ ደእያ እስራኤለ አሳይ ታቦትያ ስንን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና። 6 ሄሳፈ ጉየ፥ ካህነት ጎዳ ጫቆ ታቦትያ ፆሳ ኬን ኡባፈ ጌሻ በሳ ኤህድ፥ ክሩበታ ቀፈታፐ ጋርሳ ባጋራ ዎዶሶና። 7 ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና። 8 ካሶት ዳሮ አዱሰ ግድያ ግሾ ኤንታ ፄራይ ኡባፈ ጌሻ በሳ ስንን ቆንጨን በንቶሶና። ሽን ጌሻ በሳፈ ካረራ በንታናዉ ዳንዳኤና። ኤንቲ ሀች ጋካናዉ ሄ በሳን ደኦሶና። 9 እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎዳ ናምኡ ሎቸ ሹቻታ ፃላላፐ አትሽን፥ ታቦትያ ግዶን ሀራባይ አይብካ ባዋ። 10 ካህነት ፆሳ ኬፈ ከይዳ ዎደ ፆሳ ኬይ ሻራን ኩምስ። 11 ሄ ሻራ ጋሶን ካህነት ባንታ ኦሱዋ ኦናዉ ዳንዳእቦኮና፤ ጎዳ ቦንቾይ ፆሳ ኬ ኩምስ። 12 ሄሳፈ ጉየ፥ ሶሎሞነይ፥ “አቤት ጎዳዉ፥ ኔኒ፥ ‘ታኒ ማ ሻራን ዳና’ ያጋዳሳ። 13 ታኒ ነዉ ቦንቾ ኬ፥ መርናዉ ኔኒ ያን ዳና በሲ ኬፃስ” ያግስ። 14 እስራኤለ ማባራይ ኩመ ያን ኤቅዳሽን፥ ካዎይ ኤንታኮ ስሚድ፥ ሀይሳዳ ያግድ ኤንታዉ ዎስስ። 15 “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። እ ኦድዳ ኡፋይሳ ቃላይ፥ 16 ‘ታኒ ታ አሳ፥ እስራኤለ ግብፀፈ ከስዳ ጋላሳፐ ዶምን፥ ታ ሱንይ እያን ዳና መላ ኬ ኬፃናዉ እስራኤለ ኮቻታ ግዶን እስ ካታማካ ዶራብከ። ሽን ታ አሳ እስራኤለ ካለና መላ ታኒ ዳዊታ ዶራስ’ ያግስ። 17 “ታ አዋይ ዳዊቲ፥ ጎዳ እስራኤለ ፆሳ ሱንስ ኬ ኬፃናዉ ባ ዎዛናን ቆፕስ። 18 ሽን ጎዳይ፥ ታ አዋ ዳዊታኮ፥ ‘ኔኒ ታ ሱንስ ኬ ኬፃናዉ ነ ዎዛናን ቆፕዳ ግሾ ሎኦባ ኦዳሳ። 19 ግዶሽን፥ ኬ ኬፃናይ ነና ግዳካ፤ ታ ሱንስ ኬ ኬፃናይ ነ ጉልባታፐ የለታና ነ ናኣ’ ያግስ። 20 “ጎዳይ ገልዳ ባ ኡፋይሳ ቃላ ፖልስ። ጎዳይ ካሰ ገልዳ ኡፋይሳ ቃላዳ ታኒ ታ አዋ ዳዊታ በሳን ካዎታስ፤ እስራኤለ ካዎተ አራታን ኡታስ። ጎዳ እስራኤለ ፆሳ ሱንስ ኬ ኬፃስ። 21 ጎዳይ ኑ አዋታ ግብፀፈ ከስዳ ዎደ ኤንታራ ጫቅዳ ጫቆ ታቦትያ ዎና በሲ ጊግሳስ” ያግስ። 22 ሄሳፈ ጉየ፥ ሶሎሞነይ ጎዳ ያርሾ በሳ ስንን፥ ኩመ እስራኤለ ማባራ ግዶን ኤቅድ፥ ባ ኩሽያ ምጭድ፥ 23 ሀይሳዳ ያግድ ዎስስ፤ “አቤት ጎዳዉ፥ እስራኤለ ፆሳዉ፥ ቦላ ሳሉዋን ጋርሳ ሳአን ነ መላ ፆሲ ባዋ። ኔኒ ነ ጫቁዋ ናጋሳ። ባ ኩመ ዎዛናን ነ ስንን ሄመትያ ነ አይለታ ነ መርና ሲቁዋን ዶሳዳሳ። 24 ነ አይልያስ፥ ታ አዋ ዳዊታስ፥ ኔኒ ኦና ጋዳ ገልዳ ቃላ ናጋዳሳ። ኔኒ ካሰ ነ ዶናን ኦድዳይሳ ሀች ነ ኩሸን ፖላዳሳ። 25 “ሀእካ ጎዳዉ፥ እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ፥ ‘ኔኒ ታ ስንን ሄመትዳይሳዳ ነ ናይትካ ታ ስንን ሄመትድ ባንታ ኦግያ ናግኮ፥ ታ ስንን እስራኤለ ካዎተ አራታን ኡትያ አስ ኔኒ ያካ’ ያግዳ ቃላ ፖላ። 26 አቤት እስራኤለ ፆሳዉ፥ ኔኒ ነ አይልያስ፥ ታ አዋ ዳዊታስ ገልዳ ነ ቃላ ሀእካ ፖላ። 27 “ሽን ፆሳይ ቱማ ሳአን ዳነዬ? ሄኮ፥ ሳሎት፥ ኡባፈ ቃ ሳሎይካ ነና ኦይካናዉ ዳንዳኤና። ያትን፥ ታኒ ኬፅዳ ኬይ ነዉ አይ መላ ጉፃንደሻ! 28 ግዶሽን፥ አቤት ጎዳዉ፥ ታ ፆሳዉ፥ ታኒ ነ አይለይ ሀች ዎስያ ዎሳነ ዋሱዋ ስአ። 29 ‘ታ ሱንይ ሄ በሳን ዳና’ ግዳ ሀ ኬ ነ አይፈይ ቃማነ ጋላስ ፄሎ። ታኒ ነ አይለይ ሀ በሳኮ ስማዳ ዎስያ ዎሳ ስአ። 30 ታኒ ነ አይለይነ ነ አሳይ እስራኤለይ፥ ሀ ፆሳ ኬኮ ስሚድ፥ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ። 31 “እስ አስ ባ ላግያ ቆህድ፥ ቆሀብከ ግድ ካድን፥ እያ ጫቅሳናዉ ፆሳ ኬ ኤህን፥ እያ ግዶን ደእያ ያርሾ በሳ ስንን እ ጫቅኮ፥ 32 ኔኒ ሳሎን ስአዳ ኦ። ነ አይለታ ግዶን ፕርዳ። ናቅዳ ኡራ ቦላ ፕርዳዳ፥ እ ኦዳባ እያ ቦላ ዛራ፤ ፅሉዋስ ፕርዳዳ እያ ፅሎተ ቆንጭሳ። 33 “ነ አሳይ እስራኤለይ ነ ቦላ ናጋራ ኦዳ ግሾ ባንታ ሞርከታን ፆነትድ፥ ኔኮ ስሚድ ነ ሱን ፄግኮ፥ ሀ ኬን ነና ዎስኮነ ኔኮ ዋስኮ፥ 34 ኔኒ ሳሎን ስአ። ነ አሳ እስራኤለ ናጋራ አቶ ጋ፤ ያታዳ ኔኒ ካሰ ኤንታ ማይዛታስ እምዳ ቢታ ኤንታ ጉየ ዛራ። 35 “ነ አሳይ ነ ቦላ ናጋራ ኦዳ ግሾ ሳሎይ ጎርደትን፥ እር ቡኮና እፅን፥ ኤንቲ ሀ በሳ ስሚድ፥ ዎስኮነ ኔኒ ኤንታ ኡንኤዳ ግሾ ነ ሱን ፄግድ፥ ባንታ ናጋራፐ ስምኮ ኔኒ ሳሎን ስአ። 36 ነ አይለታ፥ እስራኤለ ናጋራ አቶ ጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ነ አሳ ላትስዳ ቢታን እራ ቡክሳ። 37 “ቢታ ቦላ ኮሽ ዎይኮ ጋዶይ ያ ዎደ፥ ጫርኮይ ካ ሾጭድ ዎይኮ ሀርመይ ይስያ ዎደ፥ ቦለይ ዎይኮ ጉምቡሮይ ቢታ ቦላ ያ ዎደ፥ ሞርከይ ኤንታ ካታማታ ተቅያ ዎደ፥ ጋዶይነ ሀርገይ ያ ዎደ፥ 38 ነ አሳ እስራኤለፐ ኦንካ ነና ዎስኮነ ኔኮ ዋስኮ ቃስ አይ አስካ ባ ዎዛናን ኡንኤትድ ሀ ፆሳ ኬኮ ስሚድ ባ ኩሽያ ምጭኮ፥ 39 ነ ደእያ በሳን ሳሎን ስአ። ኤንታ ናጋራ አቶ ጋ፤ ኤንታ ማዳ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ። 40 ያንኮ፥ ኔኒ ኑ ማይዛታስ እምዳ ቢታን ደእያ ዎደ ኡባን ኤንቲ ነዉ ያያና። 41 “ነ አሳ እስራኤለፐ ግዶናሽን፥ አላጋ ቢታ አሳይ፥ ነ ግታ ሱን ግሾ ሃሆ ቢታፈ ይዳ አስ ደእኮ፥ 42 ነ ግታ ሱን ስእድ፥ ሃሆ ቢታፈ ይድ፥ ሀ ፆሳ ኬኮ ስሚድ ነና ዎስኮ፥ 43 ኔኒ ደእያ በሳን ሳሎን ስአ። ነ አሳት፥ እስራኤለት ኤረይሳዳ ሳአን ደእያ አሳ ኡባይ ነ ሱን ኤራና መላነ ነዉ ያያና መላ፥ ታኒ ኬፅዳ ሀ ፆሳ ኬይ ነና ጎይንያ በሲ ግደይሳ ኤንቲ ኤራና መላ አላጋ ቢታ አሳይ ዎስያባ ኤንታዉ ፖላ። 44 “ነ አሳት ባንታ ሞርከታ ኦላና መላ ነ ኪትዳ በሳ ብድ፥ ኤንቲ ኔኒ ዶርዳ ሀ ካታማኮነ ታኒ ነ ሱንስ ኬፅዳ ኬኮ ስሚድ ጎዳ ነና ዎስኮ፥ 45 ኤንታ ዎሳነ ዋሱዋ ሳሎን ስአዳ ኤንታዉ ፆኖ እማ። 46 “ናጋራ ኦና አስ ባይና ግሾ ኤንቲ ነ ቦላ ናጋራ ኦን፥ ኔኒ ኤንታ ሀንቀታዳ ሞርከታስ አዳ እምን፥ ሞርከት ኤንታ ድእድ፥ ሃሆ ግድን ማታ በሲ ኤፍኮካ፥ 47 ኤንቲ ሄ ድኤትዳ ቢታን ደእሸ፥ ባንታ ዎዛናን ናጋራፐ ስምኮ፥ ሄ ድኤትዳ ቢታን ደእሸ፥ ‘ኑኒ ናጋራ ኦዳ፤ ኑኒ ባልዳ፤ ኑኒ ኢታ ሀንዳ’ ያግድ ኔኮ ዋስኮ፥ 48 ኤንታና ድእድ ኤፍዳ ሞርከታ ቢታን ደእሸ፥ ባንታ ኩመ ዎዛናንነ ባንታ ኩመ ቆፋን ኔኮ ስምኮ፥ ኔኒ ኤንታ ማይዛታስ እምዳ ኤንታ ቢታኮ፥ ነ ዶርዳ ካታማኮነ ታኒ ነ ሱንስ ኬፅዳ ኬኮ ስሚድ፥ ነና ዎስኮ፥ 49 ኤንታ ዎሳነ ኤንታ ዋሱዋ ነ ደእያ በሳን ሳሎን ስአዳ ኤንታዉ ፕርዳ። 50 ነ አሳይ ነ ቦላ ኦዳ ናጋራነ ቆህዳ ቆሁዋ አቶ ጋ፤ ኤንታ ድእድ ኤፍዳ አሳት ኤንታዉ ቃታና መላ ኦ። 51 ኤንቲ፥ ብራታ ሴርስያ ጮጨ ታማዳ ፁግያ ግብፀ ቢታፈ ኔኒ ከስዳ ነ አሳታነ ነ ቡዞ ላታታ። 52 “ታኒ ነ አይለይነ ነ አሳይ እስራኤለይ ዎስያ ዎሳ ነ አይፈይ ፄሎ። ኤንቲ ዋስያ ዎደ አዉደካ ኔኒ ኤንታ አላ። 53 አቤት ጎዳዉ፥ ፆሳዉ፥ ኔኒ ካሰ ኑ አዋታ ግብፀፈ ከስያ ዎደ ነ አይልያ ሙሰ ባጋራ ኦድዳይሳዳ ኤንታ ሳአን ደእያ ካዎተታ ኡባ ግዶፈ ነዉ ቡዞ ኦናዉ ዱማይዳ ደረ” ያግድ ዎስስ። 54 ሶሎሞነይ ዎሳ ፖልዳፐ ጉየ፥ ባ ኩሽያ ምጭድ ያርሾ በሳ ስንን ጉልባትዳ በሳፈ ደንድ ኤቅስ። 55 እስራኤለ ማባራ ኡባ ባ ቃላ ቁ ኦድ ሀይሳዳ ያግድ አንጅስ፤ 56 “ባ ገልዳ ቃላዳ ባ አሳ እስራኤለ ሸምፕስዳ ጎዳይ ጋላተቶ፤ እ ባ አይልያ ሙሰ ባጋራ እምዳ ሎኦ ኡፋይሳ ቃላ ኡባይ ፖለትስ። 57 ጎዳይ ኑ ፆሳይ ካሰ ኑ አዋታራ ደእዳይሳዳ ኑራካ ደኦ፤ እ ኑና ኩመ አገና፤ የገና። 58 ኑኒ እያ ኦገታን ሄመታና መላነ እ ኑ አዋታስ እምዳ ኪታነ ዎጋ ናጋና መላ ኑ ዎዛና ባኮ ዛሮ። 59 ጋላስ ጋላስ ኑስ ኮሽያባ እማናዉ ጎዳይ ታና ባ አይልያነ ባ አሳ እስራኤለ ማዳና መላ፥ ታኒ ጎዳ ስንን ዎስዳ ዎሳት ቃማነ ጋላስ ጎዳኮ፥ ኑ ፆሳኮ፥ ሺቆ። 60 ሄሳን፥ ሳአን ደእያ አሳ ኡባይ ጎዳይ ፆሰ ግደይሳነ እያፐ አትሽን፥ ሀራ ፆሲ ባይናይሳ ኤራና። 61 ሀች ህንተ ኦዳይሳዳ ህንተ እያ ዎጋዳ እያዉ ኪተታናዉ ህንተ ዎዛናይ ጎዳስ፥ ኑ ፆሳስ አማነተይሳ ግዶ” ያግድ አንጅስ። 62 ሄሳፈ ጉየ ካዎይነ እስራኤለ አሳ ኡባይ እስፈ ጎዳ ስንን ያርሾ ያርሽዶሶና። 63 ሶሎሞነይ ጎዳስ እስፈተ ያርሾ ያርሻናዉ 22,000 ቦራታነ 120,000 ዶርሳታ ሺሽስ። ሄሳዳ ኦድ ካዎይነ እስራኤለ አሳ ኡባይ ጎዳ ኬ አንጅስዶሶና። 64 ካዎይ ሶሎሞነይ ፆሳ ኬ ስንን ደእያ ዳባባ ግዶ ክፍልያ ሄ ጋላስ ዱማይስ። ሄ በሳን ፁሳ ያርሾ፥ ካ ያርሾነ እስፈተ ያርሹዋፈ ሞዋ ያርሽስ። እ ሄሳ ኦዳይ ጎዳ ስንን ደእያ ናሰ ብራታፐ ኦሰትዳ ያርሾ በሳይ ፁሳ ያርሾ፥ ካ ያርሾነ እስፈተ ያርሹዋፈ ሞዋ ያርሻናዉ ጉፅዳ ግሾሳ። 65 ሄ ዎደ ሶሎሞነይነ እስራኤለ አሳ ኡባይ ላፑን ጋላስ ሻቃራ ባኣለ ቦንችዶሶና፤ እስራኤለ ዛዋን ሀማታ ፕኑዋፐ ብድ ግብፀ ሻፋ ጋካናዉ ደእያ ዳሮ አሳይ ጎዳ ስንን ባኣለ ቦንቻናዉ ሺቅስ። 66 ዎንተ ጋላስ ካዎይ አሳ ሞይዝስ፤ አሳይ ካዋ አንጅድ፥ ጎዳይ ባ አይልያ ዳዊታስነ ባ አሳ እስራኤለስ ኦዳ ኬሀተን ዎዛናፐ ኡፋይትሸ ባ ሶ ባ ሶ ብስ።