1 ፅሞትዮሳ ኪታ 1

1 ኑና አሽያ ፆሳንነ ኑ ኡፋይሳን ናግያ የሱስ ክርስቶሳን ኪተትዳ፥ የሱስ ክርስቶሳ ሀዋረ ግድዳ፥ ጳዉሎሳፐ፥ 2 አማኖን ታዉ ቱማ ናአ ግድዳ ፅሞትዮሳስ። ፆሳ ኑ አዋ፥ ኑ ጎዳ ክርስቶሳ አ ኬሀተይ፥ ማሮተይነ ሳሮተይ ነዉ ግዶ። 3 ታኒ ማቀዶነ ባሸ ነና ሀዳርዳይሳዳ፥ እስ እስ አሳት ዎርዶ ትምርትያ ታማርሰይሳ ድጋናዉ ነ ኤፈሶናን ጋምአና መላ ኮያይስ። 4 ኤንቲ ጎእ ባይና ሀይሰ ኦዳነ ባንታ ኮቻ ታይቡዋ አጋናዳ ኦዳ። ሄሳ መላባይ ፓላማ ካለስፐ አትሽን፥ አማኖን ኦሰትያ ፆሳ ኦሱዋስ ማደና። 5 ሀ ኪታ ሁጰ ቆፋይ ጌሻ ዎዛናፐ፥ ሎኦ ካሀፐነ ቱማ አማኑዋፐ በንትያ ሲቁዋ ደንናሳ። 6 እስ እስ አሳት ሀይሳ አግድ፥ ፓና ኦዳኮ ስምዶሶና። 7 ኤንቲ ፆሳ ህግያ አስታማረ ግዳናዉ ኮዮሶና። ሽን ኤንቲ አይ ኦድያኮ ዎይኮ ቱማ ኦድ ኦደይስ እ አይበኮ ኤሮኮና። 8 አስ በሰይሳዳ ህግያን ጎኤትኮ ህገይ ሎኦ ግደይሳ ኤሮስ። 9 እስባ አኬካናዉ ኮሼስ። ህገይ ሎኦ አሳስ መትቤና። ሽን ህገይ፥ ህገ መንይሳታ፥ ዎራንታ፥ ፆሰ ያዮናይሳታ፥ ሸምፖ ዎይሳታ፥ ናጋራንቾታ፥ ጌሻተ ባይናይሳታ፥ ቱናታ፥ ሀር አቶሽን ባንታ አይዉ ዎይኮ አዋ ዎይሳታ፥ 10 ላመይሳታ፥ አደይ አደራ ላይማተይሳታ፥ አሰ ባይዘይሳታ፥ ዎርዳንቾታ፥ ዎርዶን ጫቀይሳታ፥ ዎይኮ ቱማ ትምርትያራ ጋሄቶና አይ ኦሶ ኦይሳታ ሴራናዉ ከይስ። 11 ሄ ትምርተይ ቦንቾነ አንጀትዳ ፆሳይ ታኒ አዋጃና መላ ታዉ ሀዳራ እምዳ ዎንገላ ግዶን ደኤስ። 12 ታኒ ኦያ ኦሱዋን ታዉ ዎልቃ እምዳ ኑ ጎዳ ክርስቶስ የሱሳ ጋላታይስ። ታና ባ ኦሱዋስ ሹምድ ሄ ኦሱዋስ በሰይሳ ግድ ታይብዳ ግሾ እያ ጋላታይስ። 13 ታኒ ሀይሳፈ ካሰ እያ ጫየይሳ፥ እያ የደይሳነ መቶይሳ ግድኮካ ታኒ ሄሳ ኤሮናነ አማኖና ኦዳ ግሾ ፆሳይ ታና ማርስ። 14 ኑ ጎዳይ ባ አ ኬሀተ ታ ቦላ ጉስድ፥ ሄ አ ኬሀተራ አማኖነ ሲቆ ክርስቶስ የሱሳ ባጋራ ታዉ እሚስ። 15 “ክርስቶስ የሱሲ ናጋራንቾታ አሻናዉ ሀ አላምያ ይስ” ግያ ቃላይ አማንይሳነ አሳ ኡባይ ኤካናዉ በሰይሳ። ኡባፈ አዳ ናጋራንቾይ ታና። 16 ሽን መርና ደኡዋ ኤካናዉ እያ አማንያ አሳስ ታኒ ሌምሶ ግዳና መላ የሱስ ክርስቶሲ ዳሮ ዳንዳእስ። ታዉ ኡባፈ አዳ ናጋራንቹዋስ ፆሳይ ባ ማሮታ ዳርስስ። 17 አይፈን በንቶናይሳስ፥ እስ ፆሳስ፥ ሀይቆናይሳስ፥ መርና ካዋስ፥ መርናፐ መርና ጋካናዉ ጋላታይነ ቦንቾይ ግዶ። አምንእ። 18 ፅሞትዮሳ፥ ታ ናአዉ፥ ካሰ ነባ ናበት ኦድዳ ቃላ ቦላ ኤቃዳ ሀ ኪታ ሀዳራ ነዉ እማይስ። ነ ሄ ቃላ ካልኮ ሎኦ ኦላ ኦለታና። 19 አማኖይነ ሎኦ ካህ ነዉ ደኦ። እሶት እሶት ካሀ ይድ ማርካበይ ሆበን የይሳዳ ባንታ አማኑዋ ይስዶሶና። 20 ሄሳ ሀንዳይሳታ ግዶን ሄመነዮስነ እስክንድረይ ደኦሶና። ኤንቲ ታማርድ ፆሳ ጫየይሳ አጋና መላ ታኒ ፃላሄስ ኤንታና አ እማስ።