2 ፅሞትዮሳ ኪታ 1

1 ፆሳ ሸነን፥ የሱስ ክርስቶሳን በንትዳ ደኦ ኡፋይሳ ማርካታናዉ የሱስ ክርስቶሳ ሀዋረ ግድዳ ጳዉሎሳፐ፥ 2 ታ ዶስያ ናኣ ፅሞትዮሳስ ኪተትዳ ኪታ። ፆሳ አዋፐነ ኑ ጎዳ ክርስቶስ የሱሳፐ አ ኬሀተይ፥ ማሮተይነ ሳሮተይ ነዉ ግዶ። 3 ታኒ፥ ታ ዎሳን ቃማነ ጋላስ ነና ቆፓይስ። ታኒ ዎስያ ዎደ ታ ማይዛታ ፆሳነ ታኒ ሎኦ ካሀን ሀጋዝያ ፆሳ ነ ግሾ ጋላታይስ። 4 ታኒ ነ አፉ ቆፓይስ፤ ነና በአዳ ኡፋይታናዉ ዳሮ ላሞታይስ። 5 ቃስ ነዉ ደእያ ቱማ አማኑዋ ኤራይስ። ሄ አማኖይ በን ነ ዎጋ አየ ሎይድንነ ነ አየ ኤዉንቅን ደእያ አማኑዋ መላ። 6 ሄሳ ግሾ፥ ታኒ ታ ኩሽያ ነ ቦላ ዎዳ ዎደ ፆሳይ ነዉ እምዳ እሞታ ኔኒ ዛራ ኤና መላ አኬክሳይስ። 7 አይስ ጊኮ፥ ፆሳይ ኑስ ዎልቃ፥ ሲቆነ ኑ ሁጰ ሃርያ አያና እሚስፐ አትሽን፥ ያሻ አያና እምቤና። 8 ህዛ፥ ኑ ጎዳስ ማርካታናዉ ዬላቶፓ፤ ቃስ እያ ግሾ ቃሸትዳ ታናንካ ዬላቶፓ። ሽን ፆሳይ ነዉ እምያ ዎልቃን ዎንገላ ግሾ፥ ታራ መቶ ኤካ። 9 ፆሳይ ባ ሸነንነ ባ አ ኬሀተን ኑና አሽድ፥ ባ ጌሻ ደረ ኦናዉ ኑና ዶርስፐ አትሽን፥ ኑኒ ኦዳ ኦሱዋ ግሾ ግደና። ሀ አ ኬሀተ ክርስቶስ የሱሳ ባጋራ መርና ዎደታፔ ስን ኑስ እሚስ። 10 ሀእ ሀ አ ኬሀተይ ኑና አሽያ ክርስቶስ የሱሳ ዩሳን ቆንጭስ። እ ሀይቆ ዎልቃ ይስድ፥ ዎንገላ ባጋራ ዮና ደኦ ኑስ ቆንጭስስ። 11 ታኒ ዎንገላ ሳባከ፥ ሀዋረነ አስታማረ ግዳና መላ ፆሳይ ታና ዶርስ። 12 ታኒ ሄሳ ግሾ ሀ መቱዋ ኤካይስ፤ ሽን ታ አማነይ ኦነኮ ኤርያ ግሾ ዬላትከ። ታዉ እመትዳ ሀዳራ ሄ ጋላሳይ ጋካናዉ እ ናጋናዉ ዳንዳኤይሳ ኤራይስ። 13 ታኒ ነና ታማርስዳ ቱማ ቃላ ሌምሶ ኦ ኦይካዳ ክርስቶስ የሱሳ ባጋራ ኑባ ግድዳ አማኑዋንነ ሲቁዋን ደአ። 14 ኑ ግዶን ደእያ ጌሻ አያና ዎልቃን ነዉ እመትዳ ሎኦ ሀዳራ ናጋ። 15 ኢሰ ቢታን ደእያ ኡባይ ታፐ ሃክዳይሳ ኤራሳ፤ ኤንታ ግዶን ፍገሉስነ ሄርሞገኔስ ደኦሶና። 16 አነስፎር ታና ዳሮ ዎደ ምንዳ ግሾ ጎዳይ እያ ሶ አሳስ ቃቶ። ታኒ ቃሾ ኬን ደእያ ዎደ እ ታናን ዬላትቤና። 17 ሄሳ ቦላ እ ሮመ ካታማ ይዳ ዎደ ታና ምን ኮይድ ደምስ። 18 ዉርሰ ጋላሳን ጎዳይ እያዉ ቃታና መላ ታኒ ጎዳ ዎሳይስ። ኤፈሶና ካታማን እ ታና አይ መላ ማድዳኮ ነ ሎይ ኤራሳ።