ዛረ ማፃፋ 23

1 ሳንጋትዳ ዎይኮ ቃራተትዳ አደይ ጎዳ ሺቁዋ ገሎፖ። 2 ላይማተን የለትዳ አስ ጎዳ ሺቁዋ ገሎፖ። ሀር አቶሽን ታማን የለተ ጋካናዉ፥ እያ ኮቻፈ ኦንካ ጎዳ ሺቁዋ ገሎፖ። 3 አሞነ አስ ግድን ዎይኮ ሞአበ አስ ግድን፥ ጎዳ አሳ ሺቁዋ ገሎፖ። ሀር አቶሽን ታማን የለተ ጋካናዉ ኤንታ አሰ ግድዳ ኦንካ ጎዳ አሳ ሺቁዋ ገሎፖ። 4 ኔኒ ግብፀፈ ከያዳ ብሽን፥ ኤንቲ ካራነ ሃራ ነና ሞክቦኮና። ኤንቲ ማሰጰፆመን ፓቶራ ካታማን ደእያ ብኦራ ናኣ ባላም ነና ባዳና መላ ሻምዶሶና። 5 ጎዳይ፥ ነ ፆሳይ ነና ዶስዳ ግሾ ባላማ ስእቤና፤ እያ ባደ ነዉ አንጆን ላምስ። 6 ነ ደኦ ላይ ኡባን ኤንቲ ሳሮ ዳና መላነ ዱረታና መላ አሞቶፋ። 7 ኤዶመት ነዉ ዳቦ ግድያ ግሾ ኤንታ ካፓ፤ ነ ኤንታ ቢታን በተ አስ ግዳዳ ደእዳ ግሾ ግብፀታ ካፓ። 8 ኤንታ ሄን የለተይ ጎዳ ሺቁዋ ገላናዉ ዳንዳኦሶና። 9 ነ ሞርከታ ኦላናዉ ከያዳ ዱንካንዳ በሳን ነና ቱናተፈ ናጋ። 10 ቃማ አሙሆን አቱንይ ጉክን፥ እርፃባይ እያ ቦላ ደእያ ኦንካ ጉታፐ ጋፃ ከይድ ያን ጋምኦ። 11 ሳእ ኦማርስያ ዎደ ባ አሳተ ሜጨትድ፥ አው ዉልያ ዎደ ጉታ ስሞ። 12 ነ ዎራ ሼሽ ኡትያ በሲ ጉታፐ ካረን ጊግሳ። 13 ሼሻስ ኡትያ ኦላ ቦክያ ሚሸ ኦላ ሚሸራ ጋዳ ኦይካ፤ ሼሻስ ኡታ ስማዳ ኦላን ቢታ ዛራ። 14 ጎዳይ፥ ነ ፆሳይ ነና ናጋናዉነ ነ ሞርከታ ነ ኩሸን አድ እማናዉ፥ ነ ጉታን ስመረቴስ። እ ያን ሻትያባ በእድ፥ ነና አግድ ስሞና መላ ነ ጉታይ ጌሽ ግዳናዉ ኮሼስ። 15 ባ ጎዳፐ ባቃትድ፥ ኔኮ ይዳ አይልያ ዛራዳ እያ ጎዳስ እሞፋ። 16 እ ነ ካታማታፐ እሱዋን፥ ባ ኮይዳ በሳን ባ ኮይዳ ዎደ ጋካናዉ ደኦ፤ እያ ኡንኤፋ። 17 እስራኤለ አሳፐ ኦንካ አደ ግድን ዎይኮ ማጫ ግድን፥ ኤቃ ጎይንያ አሳይ ኦይሳዳ ላይማቶፖ። 18 አደ ግድን ዎይኮ ማጫስ ግድን፥ ላይማተን ደምዳ ሚሸ ቃንገ ጋናዉ ጎዳ ነ ፆሳ ኬ ኤሆፖ። ኤንታ ናምኣ ጎዳይ ነ ፆሳይ እፄስ። 19 ህንተ ኮቸ ግድዳ እስራኤለ አሳስ ሚሸ ዎይኮ ካ ዎይኮ ሀራባ ታልአዳ የሎ ኤኮፋ። 20 ሀራ ቢታ አሳፐ የሎ ኤካናዉ ዳንዳኣሳ፤ ሽን ኔኒ ላታናዉ ገልያ ቢታን ነ ኦያባ ጎዳይ፥ ነ ፆሳይ አንጃና መላ ነ ኮቸ ግድዳ እስራኤለ አሳስ የሎራ ታልኦፋ። 21 ጎዳስ፥ ነ ፆሳስ፥ እማናዉ ቃንገትዳባ ጋናዉ ጋምኦፋ። ጎዳይ ነ ፆሳይ ነ ቃንግዳይሳ ኩመ ኔፐ ኮይያ ግሾ፥ ፖሎና እፅኮ ነዉ ናጋራ ግዳና። 22 ሽን ነ ቃንጎና አግኮ ሄስ ናጋራ ግደና። 23 ጎዳስ ነ ፆሳስ፥ እማና ግዳ ነ ዶናን ኦደትዳባ ኔኒ ዶሳን እማና ግዳ ግሾ፥ ነ እንፃርሳን ኦደትዳባ ፖላ። 24 ኔኒ እስ አሳ ዎይነ ጋደ ግዶራ አያ ዎደ ዎይንያፐ ኮይዳ መላ ማ፥ ሽን እያፐ አይባካ ነ ኦይክዳ ሚሸን የጎፋ። 25 እስ አሳ ጋደራ ኔኒ አያ ዎደ ሄ ጋድያን ደእያ ትያፐ ዱዳ ማ፤ ሽን ካፈ ጫካዳ ነ ሶ ኤፎፓ።