ዛረ ማፃፋ 25

1 ናምኡ አሳት ኦየትድ ፕርዳ ኬ ቢኮ፥ ዳይናት ፅሉዋ ነ ልከ ግድ፥ ናቅዳይሳ ነ ባላ ግድ ፕርዶ። 2 ባልዳይሳ ጋራፎ በሲያባ ግድኮ፥ እያ ትራራ ዝንእስድ ዞኮን ሾጫና መላ ዳይናይ ኪቶ። እ ጋራፈተይ ዳይና ስንንነ እ ኦዳ ባላ መላ ግዶ። 3 እ ኦይታሙ ጋካናዉ ጋራፈታናዉ ዳንዳኤስ፥ ሽን ሄሳፈ ዳሮፖ። ሄሳፈ ዳርኮ ነ እሻይ ነ ስንን ካዉያና። 4 ዉዱማን ካ የያ ቦራ ዶና ቃቾፋ። 5 እስፈ ደእያ እሻታፐ እሶይ ናአ የሎና ሀይቅኮ፥ እያ ማችያ ሀራ አስ ገሎፖ። እ አዝና እሻይ እዮ ኤክድ፥ እዉ ኮሽያባ ኩን። 6 ሀይቅዳ እሻ ሱንይ እስራኤለ አሳ ግዶፈ ቁሸትድ ዮና መላ እያ፥ ኮይሮ የልያ አደ ናአይ ሀይቅዳ እሻ ሱንን ፄገቶ። 7 ግዶሽን፥ እ ባ እሻ ማችዉ ኤካናዉ ኮዮና እፅኮ፥ ማጫስያ ካታማ ፐንገን ደእያ ጭማታኮ ባዳ፥ “ታ አዝና እሻይ ባ እሻ ሱንይ እስራኤለን ዳና መላ ኮይቤና፤ ታና ኤክድ፥ ታዉ ኮሽያባ ኩንና እፅስ” ያጋዳ ኦዶ። 8 ካታማ ጭማት እያ ፄግድ ኦይችን፥ እ ሀእካ፥ “ታኒ እዮ ኤክከ” ጊኮ፥ 9 ማጫስያ ጭማታ ስንን እያኮ ሺቃዳ፥ እያ ጫማፈ እሱዋ ከሳዳ፥ እያ ሶምኦን ጩታዳ፥ “ባ እሻስ ዘረ ዳና መላ ኮዮና አሳ ቦላ ሀይሳ መላ ካዉሽ ጋካናዉ በሴስ” ያጎ። 10 ያትን፥ ሄ ኡራ ሶ አሳይ እስራኤለ ኮቻ ግዶን፥ “ጫማ ከስዳ አሳ ሶ” ጌተትድ ፄገትሸ ዳና። 11 ናምኡ አሳት ዋትሽን፥ እሱዋ ማችያ ያዳ፥ ባ አዝና ሾጨይሳ ኩሸፐ አሻናዉ፥ ባ ኩሽያ የዳዳ ሀንኩዋ አደተ ኦይክኮ፥ 12 እ ኩሸይ ቃይ ባይና ቃንፀቶ። 13 ግታነ ጉ ግድዳ ናምኡ ምዛነ ኦይኮፋ። 14 ዳሮነ ጉ ማክያ ናምኡ ማካ ሚሸይ ነዉ ዶፖ። 15 ጎዳይ፥ ነ ፆሳይ ነዉ እምያ ቢታን አዱሳ ላይ ነ ዳና መላ ልከ ምዛነይነ ማካ ሚሸይ ነዉ ደኦ። 16 ጎዳይ ነ ፆሳይ ሄሳ መላባ ኦድ፥ ባለያ ኦናካ እፄስ። 17 ነ ግብፀፈ ከያዳ ኦገ ቦላ ደእሽን፥ አማለቃት ነ ቦላ ኦዳባ አኬካ። 18 ኤንቲ ፆሰ ያዮና ደረ፤ ነ ኦግያን ኤንቲ ኔራ ኤቀትዶሶና። ነ ብሽን፥ ዳቡርድ ጉየ አትዳ አሳ ኡባ ዎዶሶና። 19 ሄሳ ግሾ፥ ጎዳይ ነ ፆሳይ ነና ሄ ቢታ ላትስድ፥ ነ ዩሹዋን ደእያ ሞርከታፐ ነና ሸምፕስያ ዎደ ሀ ቢታን ኤንታ ሀሳይያ አስ ያና ጋካናዉ አማለቃታ ኡባ ይሳ፤ ሄሳ ኦናይሳ ዶጎፓ።