ኤራታ ማፃፋ 1

1 ሀይስ፥ ዳዊታ ናኣ፥ የሩሳላመን ካዎትዳ ጭንጫ ኡራ ቃላ። 2 ሄ ጭንጫይ፥ “ኡባባይ ሀዳ፤ ኡባባይ ሀዳፐ ሀዳ፤ ኡባባይ ኩመ ሀዳ” ያግስ። 3 ባ ደእያ በሳን ኡባን፥ አስ ዳቡርድ ኦያባ ኡባን እያዉ ዎይ አይቤ? 4 እስ የለተ አያ ዎደ፥ ሀራ የለተ በሳ ኦይኬስ። ሽን ሀ ቢታይ መርናዉካ ላመቶና ደኤስ። 5 አው ዶሌስ ዉሌስ፤ ናምአን ዶላናዉ ያ ዶልያ በሳ ኤለሴስ። 6 ጫርኮይ እስ ቶሆ ዱገ እስ ቶሆ ፑደ ጫርኬስ፤ ቃስ ዩይ ዩይ አድ፥ ስመረትድ ዬስ። 7 ጎግያ ሃ ኡባይ አባን ገሌስ፤ ሽን አባይ ኩም ኤረና። ሄ ሃይ ስሚድ ጎጋናዉ፥ ጉየ ባ ፑልትያ በሳ ቤስ። 8 ኡባባይ ሳለያባ፤ እ አይ መላ ሳለያኮ ኦድ ዉርሳናዉ ዳንዳኤተና። አይፈይ ፄልድ ካል ኤረና፤ ሀይ ስእድ፥ ታዉ ግድስ ጌና። 9 ካሰ ሀንዳባይ ዎንቶካ ስሚድ እ ሀናና፤ ቃስ ሀእ ሀንሸ ደኤይስ ካሰ ሀንዳባ። ሄሳ ግሾ፥ ሳሎ ጉፋንን ኦራባይ አይብካ ባዋ። 10 ኦንካ፥ “ሄኮ፥ ሀይስ ኦራባ” ጊኮ፥ ሄስ ኦራ ግደና፤ ሄስ ኑኒ የለታናፐ ካሰ ሀንዳባ። 11 ካሰ አዳ ዎደታን ሀንዳባታ ዛሪድ ሀሳያባይ ባዋ፤ ጉየፐ ሀናናባታ ኤንታፈ ጉየ ኦንካ ሀሳየና። 12 ታኒ ጭንጫይ፥ የሩሳላመን እስራኤለስ ካዎ ግዳዳ ደአስ። 13 ታኒ ሳአን ደእያባ ኡባ ሻካዳ ኤራናዉነ ጭንጫተን ፕልጋዳ ፄላናዉ ቆፋ ቃቻስ። ያታዳ አሳ ኡባስ ፆሳይ እምዳ ደኦይ ዳሮ ዳቡርስያባነ ኡፋይሶናባ ግደይሳ አኬካስ። 14 ሳሎፐ ጋርሳን ሀንዳባ ኡባ ታኒ በአስ፤ ሽን ኡባይካ ሀዳ፤ ጫርኮ ኦይካናዉ የደይሳ መላ። 15 ጌል ሱራናዉ ዳንዳኤና፤ ባይናባ ታይባናዉ ዳንዳኤተና። 16 ታኒ ታ ዎዛናን ሀይሳዳ ያጋዳ ቆፓስ፤ “ታፐ ካሰ የሩሳላመ ሃርዳ ኡባታፐ ታኒ ግታነ ጭንጫ ግዳስ። ጭንጫተነ ኤራ ጉስ እ አይበኮ ፓጫዳ ኤራስ” ያጋስ። 17 ታኒ ጭንጫተፈ፥ ጎሻተፈነ ኤያተፈ ግዶን ደእያ ዱማተ አይበኮ ኤራናዉ ዳሮ ዳቡራስ። ሽን ዉርሰን ሄስካ ጫርኮ ኦይካናዉ የደይሳ መላ ሀዳ ግደይሳ ኤራስ። 18 ጭንጫተ ዳርያ ዎደ አዛንያባይ ዳሬስ፤ ኤር ዳርያ ዎደ ቃስ መቶይ ዳሬስ።