ኤራታ ማፃፋ 4

1 ታኒ ዛራዳ፥ ሳሎፐ ጋርሳን አይ መላ ናቆይ ደእያኮ በአስ። ናቀተይሳት ምን ይድ ዬኮሶና። ናቀይሳታ ኩሸን ማት ደእያ ግሾ ናቀተይሳታ ማደይ ባዋ። 2 ታኒ፥ “ሀእ ፓፃ ደኤይሳታፐ ካሰ ሀይቅዳይሳት ሎኦ” ያጋስ። 3 ግዶሽን፥ ሀ ናምአታፐ አድ የለትቦናይሳታነ ሳሎፐ ጋርሳን ኦሰትያ ናቁዋ በኦናይሳታ ቃዳይ ሎኦ። 4 አሳ ዳቡርነ አሞትዳባ ደሞይ፥ አሳስ ባ ላግያ ቦላ ደእያ ቃናተፐ ፑልተይሳ በአስ። ሄስካ ሀዳ፤ ጫርኮ ኦይካናዉ ካሎ መላ። 5 ባ ኩሸ እድምድ ኡትያ አዛላይ ኮሻን ሀይቄስ። 6 ዳቡራንነ ጫርኮ ካሎን ደምያ ዳኮባፐ ዎፓን ደምያ እስ ኩሸይ ሎኦ። 7 ሳሎፐ ጋርሳን ሀዳ ግድዳባ ሀራባ በአስ። 8 ሄስካ ናእ ዎይኮ እሽ ባይና እስ ብዛ አደይ ደኤስ። ሽን እያ ዳቡራስ ዛው ባዋ፤ ባዉ ደእያባን አለና። እ ባና፥ “ታ ሀይሳ ኦደስ ዳቡራይና? ታኒ ታና አይስ ኡፋይስ ድጋድና?” ያግድ ኦይችስ። ሄስካ ቃስ ሀዳነ መቶ ደኦ። 9 ባንታ ኦሱዋን ሎኦ አይፈ ደምያ ግሾ እስኖ ግደይሳፈ ናምአ ግደይስ ሎኦ። 10 ናምኣፈ እሶይ ኩንድኮ እሶይ ደንስ፤ ሽን ባርካ ደእያ ኡራይ ኩንድኮ እያ ደንይ ባይና ግሾ እያ አየ! 11 ናምአይ እስፈ ዝንእኮ ሆኤስ፤ ሽን ባርካ ዝንእያ ኡራ ዋንድ ሆአናዉ ዳንዳኢ? 12 እስ አስ ባርካ ተቃናዉ ዳንዳኦና መቱዋ ናምኡ አሳት ተቃናዉ ዳንዳኦሶና። ሄ አይፈን ዶቀትዳ ዎዶሮይ ኤለ ዱፀና። 13 ዞረ ኤኮና ኤያነ ጬጋ ካዉዋፐ ማንቆነ ጭንጫ ግድዳ ናአተ ካዎይ ሎኦ። 14 ሄ ናአተይ ቃሾ ኬፈ ከይድ ዎይኮ ማንቆተፈ ደንድድ ካዎ ግዳናዉ ዳንዳኤስ። 15 ሳሎፐ ጋርሳን ደእያነ ስመረትያ አሳ ኡባይ ካዋ ላትያ ናአተ ካለይሳ በአስ። 16 እስ ካዎይ ሃርያ አሳ ታይቦይ ዳሮ ግዳናዉ ዳንዳኤስ። ሽን ካልያ የለተይ እያ ካዎተን ኡፋይትቤና። ሄስካ ሀዳ፤ ጫርኮ ኦይካናዉ ካሎ መላ።