ህዝቄላ ማፃፋ 23

1 ጎዳ ቃላይ ሀይሳዳ ያግሸ ታኮ ይስ፦ 2 “አሳ ናአዉ፥ እስ አየፐ የለትዳ ናምኡ ምቸት ደኦሶና። 3 ኤንቲ ግብፀን ደእሸ፥ ባንታ ናአተፈ ዶምድ፥ ላይማ ግድዶሶና። ሄ ቢታን ደእያ አደት ኤንታ ንን ካእዶሶና፤ ኤንታ ጌላኦተይ ኤከትስ። 4 ኤንታፈ ባይረ ሱንይ ኦሆሎ፤ ካሎ ምቸ ሱንይ ኦሆልባ። ኤንታ ናምአ ታኒ ማችን፥ ታዉ አደነ ማጫ ናአ የልዶሶና። ኦሆላ ሳማረ፤ ኦሆልባ ቃስ የሩሳላመ።" 5 “ኦሆላ ታዉ ማቾ ግዳዳ ደአሸ ላይማታሱ፤ እያ ባ ኦላንቾ ግድዳ አሶረ ላገታ ካላዳ ባዉሱ። 6 ኤንቲ ካሎሰ ዳንያ ማኦ ማእዳ ኦላንቾታ፥ ቢታ ሃረይሳታነ ቶራ ሞጮናታ፤ ኤንቲ ኡባይ ናአተነ ማላ ሎኦ ግድዳ ፓራ ቶግያ አሳታ። 7 እያ ባና ላይማ ኦዳ፥ ኡባፈ ሎእያ አሶረ አደታስ ባና አዳ እማሱ። እ ላይማተይ እያ አሶረ ኤቃታ ጎይናዳ ቱናና መላ ኦስ። 8 እያ ግብፀን ዶምዳ ላይማተ ሀእካ አጋቡኩ፤ እ ናአተፈ ዶምድ፥ አደት እ ን ካኦሶናነ ኢራ ላይማቶሶና።" 9 “ሄሳ ግሾ፥ እያ ምንዳ ሲቅያ አሶረ ላገታስ ታኒ እዮ አዳ እማስ። 10 ኤንቲ እዮ ቃርድ ካሎይዶሶና፤ እ አደነ ማጫ ናይታ ድእድ ኦይክዶሶና፤ እዮ ማሻን ዎዶሶና። እዮ ጋክዳ ፕርዳ ጋሶን፥ ማጫሳ ግዶን ቀልቅሰስ አታሱ።" 11 “እ ምችያ ኦሆልባ ሄሳ በአሱ፤ እያ ባ አሙዋንነ ባ ላይማተን ባ ምቸፈ አዳ ቱና ግዳሱ። 12 እያካ አሶረ ሃረይሳት፥ ቶራ ሞጮናታ፥ ሎኦ ማኦ ማእዳ ኦላንቾታነ ፓራ ቶግያ አሳታ፥ ናአተነ ማላ ሎኦ አሳታ ምንዳ ሲቃሱ። 13 እያካ ባና ቱንስዳይሳ በአስ፤ ኤንቲ ናምአይ እስ ኦገን ቦሶና።" 14 “እያ ባ ላይማተ ያ ዳርሳሱ፤ እያ ጎዳ ቦላ ዎጨትድ ኦሰትድ ዞኦ ቃላመን ትየታዳ ካልዳወታ አደ ምስለ በአሱ። 15 ኤንቲ ባንታ ፄሳን ዝናረ ዳንጭዶሶና፤ ባንታ ሁጵያን ሎኦ ጫርቀ ፃፅዶሶና። ኤንቲ ኡባይ ካልዳወ ቢታፈ ይዳ ካልዳወታ ሀላቃታ ዳኖሶና። 16 እያ ኤንታ ምስለታ በእዳ ዎደ ዳሮ ሲቃዳ፥ ኤንታ ፄጋናዉ ካልዳወታ ቢታ አሰ ኪታሱ። 17 ባብሎነት ኢኮ ይድ፥ ኢራ ላይማትድ እዮ ቱንስዶሶና። ኤንቲ እዮ ዳሮ ቱንስዳፐ ጉየ፥ እያ ኤንታ ሻተታሱ። 18 እያ ባ ላይማተ ቆንጨን ኦዳ ዎደነ ባ ካሉዋ ቃራ በስዳ ዎደ፥ ታኒ እ ምችዉ አግዳይሳዳ እዮካ ሻተታዳ አጋስ። 19 ሽን እያ ግብፀን ላይማ ግዳዳ ደእያ፥ ባ ያላጋተ ዎድያ ሀሳያዳ፥ ባ ላይማተ ካሰይሳፈ ያ ዳርሳሱ። 20 ኤንታ አቱንይ ሀረይሳ መላ፥ ኤንታ ኮቻይ ፓራይሳ መላ ግድዳ ባ ላገታ ካላዳ ባሱ። 21 ነኖ፥ ኦሆልበ፥ ነ ያላጋተ ዎድያን ግብፀ አደት ነ ንን ካእሽን፥ ነ ጌላኦተ ኤክሽን፥ ኔኒ ፖልዳ ላይማተ ዛራዳ ሀእ ኦናዉ አሞታሳ።" 22 ሄሳ ግሾ፥ ኦሆልበ፥ ኡባ ሃርያ ጎዳይ ሀይሳዳ ያጌስ፦ “ታኒ ነ ላገታ፥ ነ ሻተታ አግዳይሳታ ነ ቦላ ደንና፤ ታ ኤንታ ነ ቦላ ኡባ በሳራ ኤሀና። 23 ባብሎነታነ ካልዳወታ ኡባ፥ ፋቁዳ፥ ሶሃነ ቆኣና፥ አሶረታ ኡባ፥ ናአተነ ማላ ሎኦ አሳታ፥ ቢታ ሃረይሳታ፥ ቶራ ሞጮናታ፥ ኦላንቾታ፥ ሀላቃታነ ፓራ ቶግያ አሳታ ነ ቦላ ኤሀና። 24 ኤንቲ ኦላ ፓራ ጋረታራ፥ ጫና ጋረታራነ ዳሮ ኦላንቾታራ ፑደሀ ባጋፈ ህንተ ቦላ ያና። ኤንቲ ዎጋ ጎንዳለነ ጉ ጎንዳለ ኦይክድ፥ ብራታ ባርኔፃ ዎድ፥ ነ ዩሹዋን ሳልፓና። ታኒ ነና ኤንታዉ አዳ እማና፤ ኤንቲ ነና ባንታ ዎጋ መላ ፕርዳና። 25 ታኒ ታ ሀንቁዋ ነ ቦላ የዳና፤ ኤንቲ ኔራ ሀንቆ ሱላን ጋሄታና። ኤንቲ ነ ሲያነ ነ ሀይ ቃንፃና፤ አትዳይሳት ማሻን ዉራና። ኤንቲ ነ አደ ናይታነ ነ ማጫ ናይታ ኦይካና፤ አትዳይሳታ ታማን ፁጋና። 26 ኤንቲ ነ ማኦ ኡባ ኔፐ ቃርድ ኤካና፤ ነ አሌቆ ኡባ ኔፐ ከስድ ኤካና። 27 ሄሳዳ ኦዳ፥ ነ ግብፀፈ ኤህዳ ላይማተ አሙዋ ኔፐ ድጋና። ኔኒ ናምአን ግብፀታ ኤቃ ምስለታ ቁ ጋዳ ፄሎናዳ ዎይኮ ኤንታ ሀሳዮናዳ ኦና።" 28 ኡባ ሃርያ ጎዳይ ሀይሳዳ ያጌስ፦ “ታኒ ነና ነ እፀይሳታ፥ ነ ሻተታዳ አግዳይሳታስ አዳ እማና። 29 ኤንቲ ነና እፃና፤ ነ ዳቡራዳ ደምዳባ ኡባ ቦንቅድ፥ ነና ፅረ ካሎ አሻና። ነ ላይማተ አሞይ ቆንጫናዳ ኦና። ነ ላይማተ አሞይ፥ 30 ሄሳ ነ ቦላ ኤህስ። ኔኒ ካዎተታራ ላይማታዳሳ፤ ኤንታ ኤቃታራ ነና ቱንሳዳሳ። 31 ነ ምችያ ብዳ ኦግያ ነካ ባዳሳ። ሄሳ ግሾ፥ ነና እ ፁኣ ኡሻና።" 32 ኡባ ሃርያ ጎዳይ ሀይሳዳ ያጌስ፦ “ኔኒ ነ ምቸ ፁአፐ ኡያና፤ ሄ ፁአይ ግታነ ጪሞ። እ ትግን፥ ዳሮ ኤክያ ግሾ፥ አስ ኡባይ ነ ቦላ ሚጫናነ ነና ቅና። 33 ኔኒ ማታ ጋንድጋራናነ አዛናና። ሄስ ነ ምቸ ሳማረ ፁአይ ነዉ ዳጋማነ ዮ ኤሀና። 34 ነ እያ ፂዞዳ ኡያና፤ ፁአ መንና፤ ኩንአን ነ ን ጋራና።” ታኒ ኡባ ሃርያ ጎዳይ ሀይሳ ኦዳይስ። 35 ኡባ ሃርያ ጎዳይ ሀይሳዳ ያጌስ፦ “ኔኒ ታና ዶግዳ ግሾ፥ ታዉ ዞኮ ዛርዳ ግሾነ ነ ላይማተ አሙዋስ ጋተ ኤካና።" 36 ጎዳይ ታኮ ሀይሳዳ ያግስ፦ “አሳ ናአዉ፥ ኦሆል ቦላነ ኦሆልብ ቦላ ፕርዳናዉ ጊገታዲ? ኤንቲ ኦዳ ቱና ኦሱዋ ኤንታዉ ኦዳ። 37 ኤንቲ ናምአይ ላይማትዶሶና፤ ሸምፖ ዎዶሶና። ኤንቲ ባንታ ኤቃ ጎይንዶሶና። ሀር አቶሽን፥ ኤንቲ ታዉ የልዳ ባንታ አደ ናይታ ባንታ ኤቃታስ ካ ኦድ ያርሽዶሶና። 38 ሄሳፈ አድ ሀራ ኢታባ ታ ቦላ ኦዶሶና፤ ኤንቲ ታ ኬ ቱንስዶሶና፤ ሄ ዎደ ታ ሳምባታካ ሻርዶሶና። 39 ኤንቲ ባንታ ናይታ ኤቃታስ ያርሽዳ ጋላስ፥ ኤንቲ ታ ኬ ገልድ ቱንስዶሶና፤ ኤንቲ ታ ኬን ኦዳይ ሀይሳ።" 40 ኤንቲ ሃሆ በሳፈ አደት ያና መላ አሰ ኪትን፥ ኤንቲ ይዶሶና። ህንተ ናምኡ ምቸት ህንተ ቦላ ሜጨትደታ፤ ህንተ አይፍያ ትየትደታ፤ አሌቆ አደታ። 41 ሎኦ አርጄታ ቦላ ኡትደታ፤ ፃርጴዛ ቦላ ታ እፃንያነ ታ ሻማሆ ዛይትያ ዎደታ። 42 ኡፋይትያ አሳ ኮይሰ ህንተ ማታን ስኤቴስ። ማትዳ አሳይ መላ ቢታ ይዶሶና። ህንተ ኩሸን ሳጋዮ ዎዶሶና፤ ሎኦ ካላቻታ ህንተ ሁጰን ጎፅዶሶና። 43 ታኒ ታ ዎዛናን፥ “ሀ አደት አሳተይ ላይማተን ግልቅዳ ማጫሴራ ላይማቶሶና” ያጋስ። 44 አደይ ማጫሳራ ላይማተይሳዳ፥ ሀይሳቲ ኤንታራ ላይማትዶሶና። ኤንቲ ላይማታናዉ አሞትያ ኦሆልራነ ኦሆልብራ ላይማትዶሶና። 45 ኤንቲ ላይማ ግድያ ግሾነ ሸምፖ ዎያ ግሾ፥ ፅሎ አሳት ላይማትያነ ሸምፖ ዎያ ኤንታ ቦላ ፕርዳና። 46 ኡባ ሃርያ ጎዳይ ሀይሳዳ ያጌስ፦ “ዳሮ አሳ ደንዳ ኤንታ ቦላ ኤሀ። ኤንታ ዳጋንያነ ኤንታ ቦንቅያ አሳታስ አ እማ። 47 ሀ ዳጋንያ አሳት ይድ፥ ኤንታ ሹቻን ጫዶ፤ ማሻን ቡ፤ ኤንታ አደነ ማጫ ናይታ ዎ፤ ኤንታ ኬ ታማን ፁጎ። 48 ማጫስ ኡባይ ናገታና መላ ታኒ ቢታ ኡባፈ ላይማተ ይሳና። 49 ህንተ ናምኡ ምቸት ህንተ ላይማተ ግሾነ ኤቃታ ህንተ ጎይንዳ ናጋራ ግሾ ህንተና ፕርዳና። ታኒ ኡባ ሃርያ ጎዳ ግደይሳ ህንተ ሄ ዎደ ኤራና” ያጌስ።