ህዝቄላ ማፃፋ 28

1 ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ሀላቃስ ኦዳ፦ ‘ነ ዎዛናይ ኦቶርትዳ ግሾ፥ ታኒ ፆሰ፤ ታኒ አባ ግዶን፥ ፆሳታ አራታን ኡታስ’ ያጋዳሳ። ኔኒ፥ ‘ታኒ ፆሳዳ፥ ጭንጫ ግዳስ ጋዳ ቆፕኮካ ነ አሰፐ አትሽን፥ ፆሰ ግዳካ። 3 ነ ዳነላፐ አዳ ጭንጫይ? አይ ፁርካ ኔፐ ጌመኔ? 4 ቱማ ነ ጭንጫተንነ ነ አኬካን ዱረ ግዳዳሳ፤ ነ ቡቁራ ምንጃ ኬን ብራነ ዎርቃ ሺሻዳሳ። 5 ነ ዛልእያ ኤራን ዳሮ ዎ ደማዳሳ፤ ነ ዱረተ ጋሶን ነ ዎዛናይ ኦቶርትስ’ " ያጌስ። 6 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ታኒ ፆሳዳ ጭንጫ ጋዳ ቆፕያ ግሾ፥ 7 ታ ነ ቦላ ቃይ ባይና ዎዛና ምኖ ሞርከታ ኤሀና፤ ኤንቲ ኔኒ ጭንጫተንነ ኤራተን ሺሽዳ ሻሎ ኡባ ማሻን ይሳና፤ ኤንቲ ነ ቦንቹዋ ቱንሳና። 8 ኤንቲ ነና ስኦለ የዳና፥ ነካ ጪሞ አባን ሀይቃና። 9 ኤንቲ ነና ዎናዉ ያ ዎደ ኔኒ፥ ‘ታኒ ፆሳ’ ጋኔ? ነና ዎያ አሳ ኩሸን ነ ኩንድያ ዎደ ነ አሰፐ አትሽን፥ ፆሰ ግዳካ። 10 ኔኒ አላጋታ ኩሸን አማኖና አስ ሀይቅያ ሀይቆ ሀይቃና” ያጌስ ኡባ ሃርያ ጎዳይ። 11 ቃስ ጎዳ ቃላይ ሀይሳዳ ያግሸ ታኮ ይስ። 12 “አሳ ናአዉ፥ ኡባ ሃርያ ጎዳይ ሀይሳዳ ያጌስ ጋዳ ፅሮሳ ካዋስ ዘሌላ፦ ‘ኔኒ ካሰ ጭንጫተን ኩማዳሳ፤ ኔኒ አስ ሌምስድ ኦድያ ፑላነ ጭንጫ ግዳዳሳ። 13 ኔኒ ኤደነን፥ ፆሳ ጋናትያን ካሰ ደአዳሳ፤ ሳርድዮነ፥ ቶጳዘ፥ አልማዘ፥ ብርለ፥ ማርግደ፥ ያስጵደ፥ ሳንፓረነ ባሉረ ጌተትያ አልኦ ሹቻን አሌቀታዳ፥ ሎኦ ዎርቃ አሌቆ ካሰ ማአዳሳ፤ ነ መትዳ ጋላስ ሄ ኡባይ ነዉ ጊግስ። 14 ነና ናግያ ክሩበ ኦዳ ሹማስ፤ ነና ትያስ። ታ ጌሻ ዙማ ቦላ ነ ደአዳሳ፤ ታማዳ ጶልያ አልኦ ሹቻታ ግዶን ስመረታዳሳ። 15 ነ መትዳ ጋላሳፐ ዶማዳ፥ ኢታባይ ነ ቦላ በንታና ጋካናዉ ቦረይ ባይና ደአዳሳ። 16 ነ ዳሮ ዛልኤን ማትዳ ግሾ ቡቀን ኩማዳ፥ ናጋራ ኦዳሳ። ሄሳ ግሾ፥ ታ ጌሻ ዙማፐ ነና ዎልቃን ከሳስ። ነና ናግያ ክሩበይ፥ ሄ ታማዳ ጶልያ አልኦ ሹቻታ ግዶፈ የደስ። 17 ኔኒ ማላ ሎኦ ግድያ ግሾ ዳሮ ኦቶርታዳሳ፤ ነ ቦንቾ ኮያዳ ጭንጫተ ካዉሻዳሳ። ሄሳ ግሾ፥ ታ ነና ሳአን የጋስ፤ ሀራ ካዎት ነና በእድ ባያና መላ ኦስ። 18 ነ ናጋራንነ ነ ባለያ ዛልእያን፥ ነ ጎይኖ በሳታ ቱንሳዳሳ። ሄሳ ግሾ፥ ታም ነ ግዶፈ ከያናዳ ኦስ፤ እካ ነና ምስ። ኡባይ ፄልሽን፥ ታ ነና ፁጋዳ ሳኣ ቦላ ብዶ ከሳስ። 19 ነና ካሰ ኤርያ ካዎተት ኡባይ ዳጋምዶሶና። ነ ዉርሰይ ያሽያባ ግድስ፤ ኔኒ ዛራዳ በንታካ’ " ያግስ። 20 ጎዳ ቃላይ ሀይሳዳ ያግሸ ታኮ ይስ። 21 “አሳ ናአዉ፥ ነ ሶምኡዋ ስዶናኮ ዛራዳ እያ ቦላ ትንብተ ኦዳ። 22 ነኖ፥ ስዶና፥ ታ ነዉ ሞርከ ግዳና። ታኒ ነ ቦላ ኦያባን ታ ቦንቾይ ቆንጫና። ነ ግዶን ደኤይሳት ፕርዳን ታኒ ታ ጌሻተ በሲያ ዎደ፥ ታኒ ጎዳ ግደይሳ ኤንቲ ኡባይ ኤራና። 23 ታ ነ ቦላ ኢታ ሀርገ የዳና፤ ኦገ ኡባን ሱ ጉካናዳ ኦና። ኡባ ባጋራ ያ ኦላ ጋሶን ነ አሳይ ማሻን ሀይቃና። ታኒ ጎዳ ግደይሳ ኤንቲ ሄ ዎደ ኤራና። 24 ህዛፐ ጉየ እስራኤለ ዩሾን ደእያ፥ እያ ካድ ፄልያ፥ ቢታ ኡባን አጉንዳነ ክንቾተዳ ቆህያ ኦንካ ዴና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ። 25 “እስራኤለ አሳ ላለትዳ ቢታ ኡባፈ ሺሻዳ ኤህያ ዎደነ ካዎተታ ኡባ ስንን ታኒ ታ ጌሻተ በሲያ ዎደ፥ ታኒ ታ አይልያ ያይቆባስ እምዳ ባንታ ቢታን ኤንቲ ዳና። 26 ያን ኤንቲ ሳሮነ ናገትድ ዳና፤ ኬ ኬፃና፤ ዎይነ ቶካና። ኤንታ ካድ ፄልያ ኤንታ ሾሮታ ኡባ ታኒ ፕርድያ ዎደ እስራኤለ አሳይ ሳሮ ዳና። ታኒ ጎዳ ኤንታ ፆሳ ግደይሳ ኤንቲ ሄ ዎደ ኤራና” ያጌስ ኡባ ሃርያ ጎዳይ።