እዝራ ማፃፋ 7

1 ዳሮ ዎደፐ ጉየ፥ ፋርሰ ካዉአ አርፀክስስ ካዎትዳ ዎደ እዝራ ጌተትያ እስ አስ ደእስ። እዝር ሳራያ ናአ፤ አዛራ ናአ፤ ካልቀ ናአ፤ 2 ሳሉማ ናአ፤ ሳዶቃ ናአ፤ አክፁባ ናአ፤ 3 አማረ ናአ፤ አዛራ ናአ፤ ማራዮታ ናአ፤ 4 ዛራሀ ናአ፤ ኦዛ ናአ፤ ቡቃ ናአ፤ 5 አብሱ ናአ፤ ፍንሃሳ ናአ፤ ፍንሃስ አላዛራ ናአ፤ ካህነ ሀላቃ አሮና ናአ። 6 ሀይስ እዝር ባብሎነፐ ብስ። ጎዳይ፥ እስራኤለ ፆሳይ እምዳ ሙሰ ህግያ ኤርያ አስ። ጎዳ፥ ፆሳ ኩሸይ እያ ቦላ ደእያ ግሾ፥ እ ኦይችዳባ ኡባ ካዎይ እያዉ እሚስ። 7 ካዎይ አርፀክስስ ካዎትዳ ላፑን ላይን እስራኤለ አሳፐ ጉታራ፥ ካህነት፥ ሌወት፥ ዛማረት፥ ፐንገ ናገይሳትነ ፆሳ ኬ ኦሳንቾት እዝራራ እስፈ የሩሳላመ ብዶሶና። 8 ካዎይ ካዎትዳ ላፑን ላይን እቻሻን አጌናን እዝር የሩሳላመ ጋክስ። 9 ፆሳ ሎኦ ኩሸይ እያ ቦላ ደእያ ግሾ ኮይሮ አጌናን ኮይሮ ጋላስ ባብሎነፐ ከይድ፥ እቻሻን አጌናን ኮይሮ ጋላስ የሩሳላመ ጋክስ። 10 እዝር ጎዳ ህግያ ፃናኦን፥ ኦሶ ቦላ ፔሾንነ እስራኤለ አሳ እያ ዎጋነ እያ ህግያ ታማርሳናዉ ባ ዎዛና ጊግስስ። 11 ጎዳይ እስራኤለስ እምዳ ህግያነ ዎጋ፥ ሎይ ኤርያ ካህነነ ፃፈ ግድዳ እዝራስ ካዎይ አርፀክስስ ፃፍዳ ዳብዳበይ ሀይሳ። 12 “ካዎታ ካዋ አርፀክስሳፐ፥ ካህነነ ሳሎ ፆሳ ህገ ሎይ ኤርያ እዝራስ፥ ሳሮይ ነዉ ግዶ! 13 “ታ ካዎተ ግዶን ደእያ እስራኤለ አሳፐ ኦንካ፥ ካህነ ዎይኮ ሌወ ግድን፥ የሩሳላመ ባናዉ ኮይያ አሳይ ኔራ ባና መላ ታኒ ኪታስ። 14 ታንነ ታራ ዞረትያ ላፑን አሳት እስፈ ግድድ፥ ነ ኩሸን ደእያ ፆሳ ህግያዳ፥ ባዳ ይሁዳንነ የሩሳላመን ደእያ ሀኖተይ አይ መለኮ ኦይቻና መላ ነና ኪቶስ። 15 የሩሳላመን ደእያ እስራኤለ ፆሳስ፥ ታንነ ታራ ዞረትያ አሳት ኑ ዶሳን እምዳ ዎርቃነ ብራ እሞታ ኤካዳ ባ። 16 ሄሳ ቦላ ቃስ ኔኒ ባብሎነ ቢታ ኩመፈ ደምዳ ብራነ ዎርቃ ኡባ፥ ቃስ እስራኤለ አሳይነ ካህነት የሩሳላመን ደእያ ባንታ ፆሳ ኬስ ዶሳን እምዳ እሞታ ኤካዳ ባ። 17 ሀ ሚሽያን ኮርማታ፥ ማራዘታ፥ ዶርሳ ኡርገታነ፥ ካ ያርሾስነ ኡሻ ያርሾስ ኮሽያባ ሻማዳ፥ የሩሳላመን ደእያ ህንተ ፆሳ ኬን ያርሾ በሳን ያርሻ። 18 “ሄሳፈ ፓላህዳ ብራነ ዎርቃ ኔንነ ኔራ ደእያ አይሁደ ግድዳ ነ እሻት ህንተ ፆሳ ሸነን፥ ህንተ ኦናዉ ኮያባ ኦተ። 19 ቃስ ኑኒ ህንተ ፆሳ ኬስ፥ እምዳ ሚሸታ ኡባ የሩሳላመ ፆሳ ስንን ሺሻ። 20 ሄሳፈ ሀራባይ ፆሳ ኬስ ኮሽያባይ አይብካ ደእኮ፥ ካዎ ሚሸ ምንጅያ ኬፈ ኤካናዉ ዳንዳኣሳ። 21 “ታኒ ካዎይ አርፀክስስ ኤፍራፂሳ ሻፋፐ ሄፍንን ቢታን ደእያ ሚሸ ኬን አዋተይ ደእያ ኡባታስ ሀ ኪታ እማስ። ካህነነ ሳሎ ፆሳ ህግያ ሎይ ኤርያ እዝር ህንተና ኦይችያባይ አይባ ግድኮካ እያዉ እምተ። 22 ሄ ሙኩሉነ ኦይዱ ፄቱ ክሎ ግራመ ብራ፥ እስ ፄቱ ኩንታለ ግስተ፥ ናምኡ ሙኩሉ ልትሮ ዎይነ ኡሽ፥ ናምኡ ሙኩሉ ልትሮ ሻማሆ ዛይተነ ኮሽያ መላ ማፅነ እያዉ እምተ። 23 ካዋ ቦላነ ካዋ ናይታ ካዎተ ቦላ ሀንቆይ ዮና መላ ሳሎ ፆሳይ ባ ኬስ ኮይያባ ኡባ እምተ። 24 ካህነታፐ፥ ሌወታፐ፥ ዛማረታፐ ፐንገ ናገይሳታፐ፥ ፆሳ ኬ ኦሳንቾታፐነ ፆሳ ኬ ግዶን ዱማ ዱማ ኦሶ ኦያ አሳፐ ህንተ ጊራነ ቃራፃ ኤካናዉ ህንተዉ ማት ባዋ። 25 “ላ እዝራ፥ ኔኒ፥ ነዉ ፆሳይ እምዳ ጭንጫተን ኤፍራፂሳ ሻፋፐ ሄፍን ቢታን ደእያ ነ ፆሳ ህግያ ኤርያ አሳ ቦላ ፕርዳና መላ ዳይናታነ አይሰይሳታ ሹማ። ህግያ ኤሮና አስ ደእኮ ኔኒ ኤንታ ታማርሳ። 26 ነ ፆሳ ህግያነ ካዋ ህግያ ኪተቶና ኦንካ ደእኮ፥ እ ቃይ ባይና ሀይቆ ዎይኮ ጋደፐ ጎደቶ ዎይኮ እያ ሻሎይ ቦንቀቶ ዎይኮ ቃሾን ሴረቶ” ያግስ። 27 የሩሳላመን ደእያ ፆሳ ኬ ሀይሳዳ ቦንቸታና መላ ካዋ ዎዛናን ሀ ቆፋ ዎዳ ጎዳ፥ ኑ አዋታ ፆሳ ጋላት ጋኮ! 28 ካዋ፥ ካዉዋራ ዞረተይሳታነ እያራ ኦያ ዎልቃማ ሀላቃታ ስንን ባ ቴማ ታዉ እምዳ ፆሳስ ጋላት ግዶ! ጎዳ፥ ታ ፆሳ ኩሸይ ታራ ደእያ ግሾ፥ እስራኤለ ሀላቃታፐ ኤረትዳይሳታ ዶራዳ የሩሳላመ ኤካ ባና መላ እ ታዉ ምኖተ ግድስ።