ሆሰ ማፃፋ 2

1 “ህንተ እሻታ፥ ‘ታ አሰ’ ቃስ ህንተ ምቸታ፥ ‘ማሮተ ደምዳይሳታ’ ያግድ ፄግተ። 2 “ህንተ አይዉ ሀንቀትተ፤ እዮ ካጭተ። አይስ ጊኮ፥ እያ ታ ማቾ ግዱኩ፤ ታካ እ አዝና ግድከ። እያ ባ ሶምኡዋፈ ላይማተ ማላ ድጎ፤ ላይማተ ኦሱዋ ባ ንታ ግዶፈ ድጎ። 3 ሄስ ሀኖና እፅኮ እያ የለትዳ ጋላሳዳ፥ ታኒ እዮ ፅረ ካሎ አሻና። ቃስ እዮ መልዳ መላ ቢታ ኦና፤ ታኒ እዮ ሳሞን ዎና። 4 ኤንቲ ላይመፐ የለትዳ ናይታ ግድዳ ግሾ፥ ታኒ እ ናይታስ ቃትከ። 5 ኤንታ አይያ ላይማታሱ፤ ካዉሻባ ሀናዳ ኤንታ ቃንታሱ። እያ፥ ‘ታኒ ታ ካነ ታ ሃ፥ ታ ሱፍያነ ታ ሊኑዋ፥ ታ ዛይትያነ ታ ኡሻ ታዉ እምያ ታ ላገታ ካላዳ ባና’ ያጋሱ። 6 ሄሳ ግሾ፥ ታኒ እ ኦግያ አጉንን ጎርዳና፤ እያ ባ ኦግያ ደሞና መላ ታኒ እ ዩሹዋ ግምበን ድራና። 7 እያ ባ ላገታ ጌዶ ዎፃና፥ ሽን ጋኩኩ፤ ኤንታ ኮያና፥ ሽን ደሙኩ። ሄሳፈ ጉየ፥ ‘ሀእ ዱሳፈ ታዉ በንይስ ሎኦ ግድያ ግሾ፥ ስማዳ ታ ኮይሮ አዝናኮ ባና’ ያጋና። 8 ካ፥ ዎይነ ኡሻነ ዛይትያ እዉ እምዳይነ ኤንቲ ባኣለ ኤቃስ ያርሽያ ብራነ ዎርቃ እዉ ዳርስዳይ ታና ግደይሳ እያ ኤሮና እፃሱ። 9 ሄሳ ግሾ፥ ካፅያ ዎደ ታ ካ፥ ቴርያ ዎደ ታ ዎይንያ ኢፐ ዛራዳ ኤካና። እያ ባ ካሉዋ ካምያ ሱፍያነ ሊኑዋ ኢፐ ቃራ ኤካና። 10 እ ላገታ ስንን ታኒ እ ካሉዋ ቃራና፤ ታ ኩሽያፐ እዮ ኦንካ አሸና። 11 ታኒ እ ኡፋይሳ ባለታ ኡባ፥ አጌና ፄሮ ጋላሳታ፥ እ ሳምባታ ጋላሳታ፥ ላይን ላይን ቦንቸትያ ባለታ አሻና። 12 እያ፥ ‘ታ ላገት ታዉ እምዳ ጭጋ’ ግያ ዎይንያነ ባላሰ ም ታ ይሳና፤ ታኒ ሄ በሳ ዎራ ኦና፤ ባዞ ዶአት እያ ማና። 13 እያ ታና ዶጋዳ ባ ላገታ ካላዳ፥ ሳጋዮታንነ አሌቆታን አሌቀታዳ፥ ባኣለ ኤቃስ እፃነ ጩይስዳ ጋላሳታ ግሾ ታኒ እዮ ሴራና፤ ያጌስ ጎዳይ። 14 “ሄሳ ግሾ፥ ታኒ እዮ ጭማዳ መላ ቢታ ኤሀዳ፥ እዉ ሲቆ ቃላን ኦዳና። 15 ያን ታኒ እ ዎይነ ጋደ እዉ ዛራዳ እማና፤ አኮራ ዛንጋራ (መቶ ዛንጋራ) እዉ ኡፋይሳ ፐንገ ኦና። ግብፀ ቢታፈ ከይዳ ዎድያዳ ባ ጌላኦተ ላይን ደእያ ሀኖታን ኡፋይሳን የፃና” ያጌስ። 16 ሄ ጋላስ እያ ታና፥ “ታ አዝናዉ” ያጋዳ ፄጋና፤ ካሰይሳዳ፥ “ታ ጎዳዉ” ያጋዳ ፄጉኩ። 17 አይስ ጊኮ፥ ታኒ እ ዶናፐ “ባኣለ” ኤቃታ ሱን ድጋና፤ ህዛፐ ጉየ ታኒ እዮ “ባኣለ” ሱን ፄግስከ። 18 ሄ ዎደ ታኒ ታ አሳ ግሾ ሳኣ ዶአታራ፥ ሳሎ ካፎታራነ ቢታራ ጎሸትያ መተታራ ጫቃና። ታኒ ቢታፈ ዶንገ፥ ማሸነ ኦላ ይሳና። ኤንቲ ቢታ ቦላ ሳሮ ዳና። 19 ታኒ ነና መርናዉ ታዉ ማቾ ኦና፤ ፅሎተን፥ ሱረ ፕርዳን፥ መርና ሲቁዋንነ ማሮተን ታዉ ጊግሳና። 20 ታኒ አማነታዳ ነና ታዉ ጊግሳና፤ ነካ ጎዳ ኤራና። 21 “ሄ ዎደ ታኒ ዛሮ እማና፤ ታኒ ሳሎታስ ዛሮ እማና፥ ሳሎት ሳኣስ ዛሮ እማና። 22 ሳአይ ካስ፥ ዎይነ ኡሻስነ ዛይትያስ ዛሮ እማና፤ ኤንቲ እዝራኤለስ (ፆሳይ ቶካና) ዛሮ እማና። 23 ታኒ እዮ ታ ግሾ ጋዳ ቢታ ቦላ ቶካና፤ ካሰ ታኒ፥ ‘ማርከ’ ግዳይሳታ ማራና፤ ‘ታ አሰ ግደከታ’፤ ግዳይሳታ፥ ‘ታ አሰ’ ጋና። ኤንትካ ታና፥ ‘ኔኒ ኑ ፆሳ’ ያጋና” ያጌስ ጎዳይ።