እሳያሳ ማፃፋ 38

1 ሄ ዎደ ካዎይ ህዝቅያስ ሀርግድ፥ ሀይቃናዉ ማትስ። አሞፀ ናአይ ናበይ እሳያስ እያኮ ብድ፥ ጎዳይ፥ “ነ ሀይቃና ሀንያ ግሾ ነ ኬ ጊግሳ” ያግስ። 2 ህዝቅያስ ጎዳኮ ስም ዝንእድ፥ ጎዳ ዎስስ። 3 “አቤት ጎዳዉ፥ ታኒ ነ ስንን ቱማተንነ ኩመ ዎዛናን ሄመትዳይሳነ ነና ኡፋይስያባ ኦዳይሳ ሀሳያ” ያግድ ጫመትድ ዬክስ። 4 ሄሳፈ ጉየ፥ ጎዳ ቃላይ እሳያሳኮ፥ 5 ባዳ ህዝቅያሳኮ፥ ጎዳይ ነ ማይዛ ዳዊታ ፆሳይ፥ “ታኒ ነ ዎሳ ስአስ፤ ነ አፉ በአስ። ነ ላይ ቦላ ታኒ ታማነ እቻሹ ላይ ጉጃና። 6 ነናነ ሀ ካታማ አሶረ ካዋ ኩሸፐ አሻና፤ ታኒ ሀ ካታማስ ኦለታና” ያጋ። 7 “ጎዳይ ባ ግዳ ቃላ ፖላናዉ እምዳ ማላይ ሀይሳ ያግስ፦ 8 አካዝ ከያናዉ ጊግስዳ ደን ደእያ ኩያይ ታሙ ታንጎ ጉየ ስሚድ ባና መላ ታኒ ኦና” ያግስ። ኩያይ ታሙ ታንጎ ጉየ ስሚድ ብስ። 9 ይሁዳ ካዎይ ህዝቅያስ ሀርግያፈ ፓፅድ ፃፍዳ ማዝሙረይ ሀይሳ፦ 10 ታኒ፥ “ታ ደኦ ላይይ ባጋ ጋኮና ደእሽን፥ ሀይቆ ፐንገራ ገላና ሀንያና? አትዳ ላይ ቦንቀታና ሀንያና?” ያጋስ። 11 “ታኒ ደኦን ደኤይሳታ ቢታን ጎዳ በእከ፤ ሀ ሳአን አሰ በእከ፤ ሀ አላምያን ደኤይሳታራ ዛራዳ ደእከ። 12 ዶርሰ ሄመይሳታ ዱንካንያዳ፥ ታ ደኦይ ሾደትስ። ዶርዘይ አፍላ ዋንዳራሸን ፃፀይሳዳ፥ ታ ደኦይ ፃፀትስ። ዶርዘይ አፍላ ዱያዳ፥ ታ ደኡዋ ዱስ። ዎንታፈ ኦማርስ ጋካናዉ ታና ይሳሳ” ያጋስ። 13 “ቃማ ኩመ ዳንዳአን ናጋስ፤ ጋሞዳ ታ መቀ ኡባ መንዳሳ፤ ዎንታፈ ኦማርስ ጋካናዉ ታና ይሳዳሳ። 14 ታኒ ካሮዳነ ጭላሾዳ ዋሳስ፤ ሆለዳ ዙዙማስ። ታ አይፈይ ሳሎ ፄልሸ ዳቡርስ፤ ጎዳዉ፥ ታኒ ኡንኤታስ፤ ኔኒ ታና ሀ ኡንኣፈ ከሳ” ያጋስ። 15 ሀይሳ ኡባ ኦዳይ ጎዳ፤ ታኒ አይ ጋናዉ ዳንዳእያና? ታ ሸምፖይ ኡንኤትዳ ግሾ፥ ታ ላይ ኡባ አሽከተን ዳና። 16 ጎዳዉ፥ ሀይሳ መላ ሴራን አሳይ ደኦን ደኤስ። ሀእ ታ ፓያተ ዛራዳ፥ ታና ደኦን ዎ! 17 ታ ኡንኤተይ ታዉ ሎኦ ግድስ፤ ኔኒ ታ ሸምፑዋ ዮ ኦላፈ አሻዳሳ፤ ታ ናጋራ ኡባ ኔኒ ጉየ የጋዳሳ። 18 ዱፎይ ነና ጋላተና፤ ሀይቆይ ነና ሳበና። ኦላን ዎዳይሳት፥ ነ አማነተ ኡፋይስ ኦኮና። 19 ታኒ ሀች ነና ጋላተይሳዳ፥ ደኦን ደኤይሳት ነና ጋላቶሶና። ነ አማነተ አዋት ባንታ ናይታስ ኦዶሶና። 20 ጎዳይ ታና አሻና፤ ሄሳ ግሾ፥ ኑኒ ኑ ደኦ ላይ ኡባን፥ ጎዳ ኬን ዲን የፃና። 21 እሳያስ ካሰ፥ “ባላሰ ዳፅድ፥ እያ ክፃ ቦላ ዎተ፤ እ ፓፃና” ያግስ። 22 ህዝቅያስ ካሰ፥ “ታኒ ፓፃዳ ጎዳ ኬ ባናይሳስ ማላይ አይበ” ያግድ እሳያሳ ኦይችስ።