እሳያሳ ማፃፋ 40

1 ህንተ ፆሳይ ሀይሳዳ ያጌስ፦ “ታ ደርያ ምንተ! ምንተ! 2 እ አይለተን ደእዳ ዎደይ ፖለትስ፤ እያ ናጋራይ አቶ ጌተትስ፤ ባ ናጋራ ግሾ፥ ጎዳይ እያ ዳኮ ሴርዳይሳ፥ የሩሳላመስ ሊቆ ቃላን ኦድተ፤ አዋጅተ” ያጌስ። 3 ሀይሳዳ ግያ ግርሳይ ስኤቴስ፤ “መላ ቢታን ጎዳ ኦግያ ጊግስተ፤ ኑ ፆሳስ አራባ መላ ቢታን ሆሮጋ ስት ኦተ። 4 ዛንጋራ ኡባይ ቁ ጋና፤ ደረይነ ዙማይ ዝቅ ጋና፤ ኢታ ኦገትነ ገላ ከሳት ደምባታና። 5 ሄ ዎደ ጎዳ ቦንቾይ ቆንጫና፤ አሾ ማእዳ ኡባይ ሄሳ እስፈ በአና። ጎዳ ዶናይ ሀይሳ ኦድስ” ያጌስ። 6 እስ ግርስ፥ “ዋሳ” ያግሽን ስአስ፤ ታኒ፥ “ዎይጋዳ ዋሶ?” ያጋስ። “አስ ኡባይ ማታ መላ፤ እያ ቦንቾ ኡባይ ጪሻ መላ። 7 ጎዳ እያ ቦላ ሸምፕያ ዎደ፥ ማታይ መሌስ፤ ጪሻይ ቆቆፈቴስ፤ አስ ቱማ ማታ መላ። 8 ማት መሌስ፤ ጪሽ ቆቆፈቴስ፤ ሽን ኑ ፆሳ ቃላይ መርናዉ ኤቅድ ደኤስ” ያጋዳ ዋሳ። 9 ነኖ ፅዮነስ ሎኦባ ኦደይሶ፤ ዙማ ቦላ ከያ። ነኖ የሩሳላመስ ሎኦባ ኦደተይሶ፤ ነ ቃላ ቁ ኦዳ ዋሳ። ያዮፋ፤ ቁ ኦ፤ ይሁዳ ካታማታስ፥ “ህንተ ፆሳይ ሀይስሽ” ያጋ። 10 ሄኮ፥ ኡባ ሃርያ ጎዳይ ዎልቃራ ዬስ፤ እያ ቀሰይ እያዉ ሃራና። እያ ዎይቶይ እያራ ደኤስ፤ ጭግያ ጋተይ እያ ስንና። 11 እ ባ ዉድያ ሄንንቾዳ ሄማና፤ ባ ዶርሳ ማራታ ባ ቀስያን ሺሻና፤ ኤንታ ባ ክኦን እድማና፤ ንይሳታ ሎዳራ ካለና። 12 ሃታ ባ ኩሸ ቃቃን፥ ሳሎታ ታካን ልክዳይ፥ ቢታ ባና ዳቾን ማክዳይ፥ ደረታነ ዙማታ ምዛነን ልክዳይ ኦኔ? 13 ጎዳ አያና ኤርዳይ፥ እያ ዞርድ ታማርስዳይ ኦኔ? 14 እያዉ ቆንጭሳና መላ ኦና ዞረ ኦይችዴ? ሱረ ፕርዳ እያ ታማርስዳይ ኦኔ? እያ ጭንጫተ ታማርስዳይ፥ እያ አኬካ በስዳይ ኦኔ? 15 ሄኮ፥ ካዎተት ፁጋን ደእያ እስ ፆኮ መላ፤ ኤንቲ ምዛነ ቦላ ደእያ ባና መላ፤ እ ዩሾይ አባን ተቀትዳ ቢታታ ባናዳ ልከስ። 16 ልባኖሰ ምይ ያርሾ በሳን ኤፃናዉ ግደና፤ እያን ደእያ ዶአት ፁሳ ያርሾስ ግዶኮና። 17 ካዎተት ኡባይ እያ ስንን ባይናባ መላ፤ ኤንቲ እያ ስንን ኡባ አይኮካ ግዶኮና፤ ባይናባፐካ ላፋ። 18 ያትን፥ ፆሳ ህንተ ኦደራ ግናየቲ? አይባ ምስለራ ጋድ ፄለቲ? 19 ኩሸ ሂላንቾይ ኤቃ ምስለ ጊግሴስ፤ ዎርቃ ሼሸይስ ዎርቃን ላንፄስ፤ ብራ ሼሸይስ እያ ቦላ ብራ ሳንላታ መስ። 20 ሚሸይ ባይና ማንቆይ፥ ያርሾስ ፆና ም ዶሬስ። ምስለይ ቃፆና መላ ኤሳናዉ ኩሸ ሂላንቾ ኮዬስ። 21 ኤርቤከቲ? ዎይኮ ስእቤከቲ? ሀይስ ህንተዉ ኮይሮፐ ኦደትቤኔ? ዎይኮ ሳእ መቶሳፐ ሀይሳ ህንተ አኬክበከቲ? 22 እ ቢታ ገርቱዋፈ ቦላ ባጋን ባ አራታን ኡቴስ፤ ቢታን ደእያ አሳት ፃቆ መላ። ሳሎታ ገሸዳ ምጬስ፤ ዱንካነዳ ደእያ በሲ ኦድ ቶሌስ። 23 እ፥ ሀላቃታ ባይናባዳ ኦስ፤ ሀ አላምያ ሃረይሳታ ሀዳ ከሴስ። 24 ኤንቲ ቶከትድ ቡሮ ጋምኦናሽን፥ ዘረትድ ቡሮ ፃጶ የዶናሽን፥ ጎዳይ ኤንታ ቦላ ጫርኮ የድስ፤ ኤንቲ መልን ጎተይ ኤንታ ፑኖዳ ኤፍስ። 25 ያትን፥ ታና ኦደራ ልከየቲ? ታና ኦደራ ግናየቲ? ያጌስ ጌሻይ። 26 ህንተ አይፍያ ቁ ኦድ ሳሎ ፄልተ፤ ሀ ፆልንቶታ መዳይ ኦኔ? እ ኤንታ ኦላንቾዳ ካለስ፤ ኤንታ ታይቡዋ ኤሬስ። እ ኤንታ ኡባ ኤንታ ሱንን ሱንን ፄጌስ፤ እያ ዎልቃ ግታተፈነ ምኖተፈ ደንዶይሳን፥ ኤንታፈ እሶይካ የና። 27 ነኖ ያይቆባ፥ ነኖ እስራኤለ፥ ታ ኦገይ ጎዳፐ ጌምስ፤ ታ ፕርዳይ ፆሳፈ ቆሰትስ፤ ያጋዳ አይስ ኦደታይ? 28 ኤራብኪ? ስአብኪ? ጎዳይ መርና ፆሳ፤ ቢታ ኡባ መዳይ እያ። እ ዳቡረና፤ ዎይኮ አርጋጨና፤ ኦንካ እያ ቆፋ ኤራናዉ ዳንዳኤና። 29 እ ዳቡርዳይሳታስ ዎልቃ እሜስ፤ ምኖተ ባይናይሳስ ምኖተ ጉጄስ። 30 ሀር አቶሽን ያላጋ ናይት ዳቡሮሶና፤ አርጋጮሶና፤ ናአተት ዳቡርድ ኩንዶሶና። 31 ሽን ጎዳ አማነትድ ናገይሳት፥ ባንታ ዎልቃ ኦራና። ኤንቲ አርጋንዳ ቀፈን ፓላና፤ ዎፃና፥ ሽን ዳቡሮኮና፤ ሄመታና፥ ሽን አርጋጮኮና።