አይሰይሳታ ማፃፋ 18

1 ሄ ዎደ እስራኤለ ቢታን ካዎይ ባዋ። ሄ ዎደይ ጋካናዉ ዳነ ኮቻት እስራኤለ ኮቻታ ግዶን ላትዳ ቢት ባዋ። ኤንቲ ባንታዉ ደእያ ቢታ ኮይሸ ደኦሶና። 2 ሄሳ ግሾ፥ ዳነ ኮቻት ባንታ ግዶፈ እቻሹ ምኖ ኦላንቾታ ዶርድ ቢታ ዎቻና መላ ፆርአፈነ ኤሽታኦላፐ ኤንታ ኪትዶሶና። ኤንቲ ደረይ ዳርያ ኤፍሬማ ቢታ ጋክድ ምካ ሶን አቅዶሶና። 3 ኤንቲ ምካ ሶን ደእያ ዎደ ሌወ ኮቸ ግድዳ ናአተ እያ ኦዳን ኤርዶሶና። ኤንቲ እያኮ ሺቅድ፥ “ነና ሀይሳ ኤህዳይ ኦኔ? ሀይሳ አይስ ያዲ?” ያግድ ኦይችዶሶና። 4 እ ዛሪድ፥ “ሚክ ታዉ ዳሞዘ ቃንፅን፥ ታኒ እያዉ ካህነ ግዳዳ ኦይስ” ያግስ። 5 ኤንቲ፥ “ኑኒ ብያ ኦገይ ኑስ ሱራነ፥ ሱረነ ሀያና ኑስ ፆሰ ኦይቻ” ያግዶሶና። 6 ካህነይ፥ “ሳሮ ቢተ፤ ህንተ ብያ ኦግያን ጎዳይ ህንተራ ግዳና” ያግስ። 7 ሄሳፐ ጉየ፥ እቻሹ አሳት ያፐ ደንድድ፥ ላይሻ ካታማ ጋክዶሶና። ያን ደእያ አሳይ ስዶና ቢታ አሳዳ ሳሮን ደኤይሳ በእዶሶና፤ አሳት ኦንካ ስና ዎፑ ግዳ አስ፤ ኤንታዉ አይኮይካ ፓጮና ኡባባይ ኩምዳ አስ። አይ አሳራካ ጋሄቶና ስዶና አሳፐ ሃክድ ባንታዉ ዱማ ደኦሶና። 8 እቻሹ አሳት ፆርአንነ ኤሽታኦላን ደእያ ባንታ እሻታኮ ስምዶሶና፤ ኤንታ እሻት፥ “አይ ዎረ ኤክድ ይደቲ?” ያግዶሶና። 9 ኤንቲ ዛሪድ፥ “ቢታይ ዳሮ አራዳ ግደይሳ ኑ በእዳ። አነ ደንድድ ላይሻ ኦሎስ። ሀይሳን ኦሶ ይድ ጮ ኡቶፍተ፤ ኤለ ብድ ኦይክተ። 10 ህንተ ያ ብድ፥ ኦናነ ስና ኡትዳ አሳኮ ጋካና። ቢታይ ዳልጋ፤ አሳስ ኮሽያ ኡባባይ ሄ ቢታን ደኤስ። ፆሳይ ሄ ቢታ ህንተዉ እሚስ” ያግዶሶና። 11 ያትን፥ ዳነ ኮቻፈ ቶራ ዳንጭዳ ኡሱፑን ፄቱ አሳት ፆርአፐነ ኤሽታኦላፐ ደንድድ ብዶሶና። 12 ይሁዳ ቢታን ቅርያት-ይኣርማፐ ዉሎሀ ባጋራ ኡትዶሶና። ሄሳ ግሾ፥ ሄ በሳይ ሀች ጋካናዉ ዳነ ጉታ ጌተትድ ፄገቴስ። 13 ያፐ ደንድድ ደረይ ዳርያ ኤፍሬማ ቢታን ደእያ ምካ ሶ ይዶሶና። 14 ላይሻ ቢታ ዎቻናዉ ብዳ እቻሹ አሳት ባንታ እሻታኮ፥ “ሀ በሳን፥ ሀ ኬታፐ እሱዋን ኤፉደይ፥ ሶ ግዶ ኤቃ ምስለትነ ምፈ ኦድ ብራ ሼሽድ ትይዳ ምስለይ ደኤይሳ ኤሬቲ? አነ አይ ኦናዉ ኮሽያኮ ቆፕተ” ያግዶሶና። 15 ኤንቲ ኦግያፐ ስሚድ፥ ሌወ ኮቸ ግድዳ ናአተ ካህነይ ደእያ ምካ ሶ ብድ እያ ሳሮዶሶና። 16 ሄ ዎደ ኡሱፑን ፄቱ ዳነ ኦላንቾት ኦላ ሚሸ ኦይክድ ፐንገ ቦላ ኤቅዶሶና። 17 ኤንቲ ሄ ካህንያራ ያን ኤቅዳሽን፥ ቢታ ዎችያ እቻሹ አሳት ምካ ሶ ገልድ፥ ምፈ ኦድ፥ ብራ ሼሽድ፥ ትይዳ ኤቃ ምስልያ፥ ኤፉድያነ ሶ ግዶ ኤቃ ምስለታ ኤክዶሶና። 18 ሄ ዎደ ካህነይ ኤንታ፥ “ዋተቲ?” ያግድ ኦይችስ። 19 ኤንቲ እያ፥ “ሀይዛ፥ እስ ቃላካ ፖጎፓ። ኑራ ባዳ ኑስ አዋነ ካህነ ግዳ። እስ ኬ አሳስ ካህነ ግደይሳፈ እስራኤለ ግድያ እስ ኮቻስ ካህነ ግደይስ ነዉ ሎኤኔ?” ያግዶሶና። 20 ካህነይ ሄሳ ስእድ ኡፋይትድ ኤፉድያ፥ ሶ ግዶ ኤቃ ምስለታነ ምፈ ኦድ ብራ ሼሽድ ትይዳ ምስልያ ኤክድ ኤንታራ ብስ። 21 ያፐ ደንድድ፥ ባንታ ናይታ፥ ባንታ መህያነ ባንታዉ ደእያባ ኡባ ስን አድ ብዶሶና። 22 ኤንቲ ምካ ሶፐ ሃክድ ብዳፐ ጉየ፥ ሚክ ባ ሾሮታ ፄግን፥ ዳነ አሳታ ካልድ ጋክዶሶና። 23 ኤንታ ጋክድ ዋስን፥ ዳነ አሳት ጉየ ስሚድ፥ “ዋናዲ? ሀ አሳ ኡባ አይስ ሺሻዲ?” ያግድ ምካ ኦይችዶሶና። 24 ሚክ ዛሪድ፥ “ታኒ መዳ ታ ፆሳታነ ታዉ ኦያ ካህንያ ቦንቅደታ። ያትን ታዉ አትዳባይ አይቤ? ታና፥ ‘ዎይግድ ዋናድ፥ ጌቲ?’ " ያግስ። 25 ዳነ አሳት፥ “አነ ዶና ፖጋዳ ነና ኤራ! ሀ ሸነራ ደእያ አሳ ኔኒ ደንኮ፥ ኤንቲ ነ ቦላ ደንዳና፤ ነናነ ሶ አሳ ኡባ ይሳና” ያግዶሶና። 26 ዳነ አሳት ባንታ ኦግያ ብዶሶና። ምክካ ኤንቲ ባፐ ዳሮ ምኖ ግደይሳ በእድ ባ ሶ ስምስ። 27 ዳነ አሳት ሚክ መዳ ፆሳታነ እያ ካህንያ ኤክድ፥ ሌሳን ኦናካ ስና ሳሮ ደእያ አሳታኮ ብድ፥ አሳ ኡባ ማሻን ዎድ ካታማ ታማን ፁግዶሶና። 28 ላይሻ ካታማይ ስዶናፐ ሃክድ ደእያ ግሾነ ኤንቲ ሀራ አሳራ ጋሄትድ ኤሮና ግሾ ኤንታ አሻናዉ ኦንካ ዳንዳእቤና። ላይሻ ካታማይ ቤት-ረሆባ ጌተትያ በሳ ማታን ደእያ ዛንጋራን ደኤስ። ዳነ አሳት ካታማ ዛር ኬፅድ ያን ደእዶሶና። 29 ካታማ ሱን በን ባንታ ማይዛ ያይቆባ ናኣ ዳነ ሱንን ላምድ፥ ዳነ ያግድ ሱንዶሶና፤ ሽን ኮይሮ ሄ ካታማይ ላይሻ ጌተቴስ። 30 ዳነ አሳት ባንታዉ ኤቃ ምስልያ ያን ዎድ፥ ሙሰ ናኣ ገድሶናፐ የለትዳ ዮናታና ባንታ ካህነ ኦዶሶና። እያ ኮቻት አሳይ ድኤትድ ብዳ ዎደ ጋካናዉ ያን ካህነ ግድዶሶና። 31 ሄሳዳ ሀንድ፥ ጌሻ ዱንካነይ ሴሎን ደእዳ ላይ ኡባን ሚክ ኦዳ ምስለት ያን ጋምእዶሶና።