ኤርምያሳ ማፃፋ 17

1 “ይሁዳ ናጋራይ ብራታ ቢረን ፃፈትስ፤ ኤንታ ዎዛና ቦላነ ያርሾ በሳን ደእያ ካጭያ ቦላ አልማዘ ጌተትያ ሹቻ ፄራን ፃፈትስ። 2 ኤንታ ናይት እርፃ ም ጋርሳን፥ ዙማታ ቦላነ ደረታ ቦላ ጊግስዳ ያርሾ በሳን አሼራ ጌተትያ ፆሴስ ኤስዳ ምስልያ ጎይኖሶና። 3 ህንተ ቢታ ቦላ ኦዳ ናጋራ አጩዋ ቃንፅሳናዉ ህንተ ሻሉዋነ ህንተ ሚሽያ ህንተ ሞርከታስ እማና። 4 ህንተ መርናዉ ኤፅያ ታ ሸንያ ደንዳ ግሾ፥ ህንተና ላትስዳ ቢታፈ ሾዳና፤ ህንተ ኤሮና ቢታን ህንተ ሞርከታስ አይለ ኦና” ያጌስ ጎዳይ። 5 ጎዳይ ሀይሳዳ ያጌስ፦ “አሳን አማነተይ፥ አሾ ማእዳ አሳን ጬቀተይነ ባ ዎዛና ፆሳፈ ሃሰይ ባደትዳይሳ ግዶ። 6 ሄሳ መላ አስ ባዞን ደእያ ቱሸ መላ፤ ሎኦባይ ያ ዎደ እ በኤና። እ ባዞን፥ መላ በሳን፥ አስ ዶና ማፅነ ቢታን ዳና። 7 “ጎዳን አማነትያ አስ፥ እያ ጬቆይ ጎዳ ግድዳ አስ አንጀትዳይሳ። 8 እ ሃ ማታን ቶከትድ፥ ባ ፃጱዋ ጎግያ ሃን የድዳ ም መላ። እ አዋ ሱላስ ያየና። ሄ ም ሀይይ ጭልኦሽን ደኤስ። እር ቡኮና ላይን ህርገና፤ ኡባ ዎደ አይፈ አገና። 9 “አሳ ዎዛን ኡባፈ አድ ጭሜስነ ኢታ፤ እያ ጋ ቆፋ ኦን ኤራናዉ ዳንዳኢ? 10 ታኒ ጎዳይ፥ አሳ ኡባስ እያ ኦግያዳነ እያ ኦሱዋዳ እማናዉ፥ አሳ ዎዛና ፕልጋይስ፤ እያ ካሃ ፓጫይስ” ያጌስ ጎዳይ። 11 በሶና ኦገን ሻሎ ሺሽያ አስ ባባ ግዶና ጱጱለ ቆፅያ ኩራቾ መላ። ባ ላይ ባጋ ዛዋን አግድ ባና፤ ዉርሰን እያ ኤያተይ ቆንጫና። 12 ኑ ፆሳ ኬይ ኮይሮፐ ዶምድ፥ ቦንቾ ካዎተ አራታዳ ቃ ደርያ ቦላ ደኤስ። 13 አቤት ጎዳዉ፥ እስራኤለ ኡፋይሳዉ፥ ነና አግዳ ኡባይ ዬላታና። ደኦ ፑልቶ ሃ፥ ነና ጎዳ ኤንቲ አግዳ ግሾ ባናን ፃፈትዳ ሱንዳ ያና። 14 አቤት ጎዳዉ፥ ነ ታ ጋላታ ግድያ ግሾ፥ ታና ፓ፤ ታ ፓፃና፤ ታና አሻ፤ ታ አታና። 15 አሳይ ታኮ፥ " ‘ጎዳይ ታዉ ኦድስ’ ያጋዳ ነ ኦድዳ ቃላይ አዉን ደኢ? እ አይስ ፖለተኔ?” ያጎሶና። 16 ታኒ ሄንንቾ ግዳዳ ነና ሀጋዞ አጋብከ፤ ኤንቲ መቶታና ጋላሳ ታ አሞታብከ። ታ ዶናፐ ከይዳ ቃላ ነ ኤራሳ። 17 ታና ዳጋንፋ፤ መቶ ጋላስ ታኒ ባቃታዳ አትያ በሳይ ነና። 18 ታና የደይሳት ዬላቶ፤ ሽን ታና ዬላዮፓ። ኤንታ ዳጋን፤ ሽን ታና ዳጋንፋ። ኤንታ ቦላ መቶ ኤሀ፤ ኤንታ ናምኡ ኩሸ ሴራ። 19 ጎዳይ ታኮ፥ “ኮይሮ ባዳ ይሁዳ ካዎት ካታማ ገልያነ ከይያ፥ አሳይ ገልያ ፐንግያንነ ሀራ የሩሳላመ ፐንገታ ኡባን ኤቃ። 20 አሳኮ ሀይሳዳ ያጋ፦ ‘ህንተኖ ይሁዳ ካዎቶ፥ ህንተኖ ይሁዳ አሳዉ፥ ህንተኖ የሩሳላመ አሳዉ፥ ሀ ፐንገታራ ገልያ አሳዉ፥ ኡባይ ጎዳ ቃላ ስእተ። 21 ሳምባታ ጋላስ ቶሆ ቶክድ የሩሳላመ ፐንግያራ ገሎና መላ ናገትተ። 22 ሳምባታ ጋላስ ህንተ ኬፈ ቶሆ ቶክድ ከሶፍተ፥ ዎይኮ አይብ ኦሶካ ኦፕተ። ካሰ ህንተ አዋታ ታ ኪትዳይሳዳ ሳምባታ ጋላስ ቦንችተ። 23 ግዶሽን፥ ኤንቲ ስእቦኮና፤ ባንታ ሀይ ታኮ ዛርቦኮና። ኤንቲ ታና ስኦናነ ታፐ ታማሮና እፅዶሶና። 24 ሽን ህንተ ታዉ ኪተትኮ፥ ሳምባታ ጋላሳን ቶሆ ቶክድ፥ ሀ ካታማ ፐንገታራ ገሎና አግኮ፥ ሳምባታ ጋላስ አይኮካ ኦና ዱማይድ ቦንችኮ፥ 25 ዳዊታ አራታን ኡትያ ካዎት ባንታ ሞርናታራ ፓራታነ ፓራ ጋረታ ቶግድ፥ ሀ ፐንገታራ ገላና። ኤንቲ ይሁዳ አሳራነ የሩሳላመ ካታማን ደእያ አሳራ ገላና፤ ሀ ካታማይ መርናዉ አስ ደእያ ካታማ ግዳና። 26 አሳይ ፁሳ ያርሾ፥ ሀራ ያርሾ፥ ካ ያርሾ፥ እፃነነ ጋላታ ያርሾ ኤክድ፥ ይሁዳ ካታማታፐ፥ የሩሳላመ ዩሹዋን ደእያ ጉታታፐ፥ ብንያመ ቢታፈ፥ ጋፐ፥ ደረይ ዳርያ ቢታፈነ፥ ነገባፐ ጎዳ ፆሳ ኬ ያና። 27 ሽን ህንተ ሳምባታ ጋላሳ ዱማይድ ቦንቾና አግድ፥ ሳምባታ ጋላሳን ቶሆ ቶክድ፥ የሩሳላመ ፐንገታራ ገልድ፥ ታ ህግያ መንኮ፥ ታ ሄ ፐንገታን ታማ ኦይና። የሩሳላመ ካዎ ኬታ ማና፤ ሄ ታማይ ቶኤና’ " ያጌስ ጎዳ-ይ።